ዬሱሲ ኪቴዳዋንቱ ኦሱዋ 14:3-19 in Dawro

³ ዬሱሲ ኪቴዳዋንቱ ሄዋን ዳሮ ዎዲያ ጋሚዔዲኖ፤ ኡንቱንቱ ጎዳባ ያዬናን ኦዴዲኖ፤ ጎዳይ ማላታኔ ኦራꬃባ ኡንቱንቱ ኦꬃና ማላ፥ ኡንቱንቶ ዎልቃ ኢሜዳዋን ባሬ ኣꬎ ኬካቴꬃ ቃላባይ ቱማ ጊዴዳዋ ማርካቴዳ።

⁴ ሺን ካታማ ኣሳይ ሻኬቲ፥ ባጋይ ኣዪሁዳቱዋኮ፥ ባጋይ ዬሱሲ ኪቴዳዋንቱኮ ሲሜዲኖ።

⁵ ኣዪሁዳ ጊዴናዋንቱኔ ኣዪሁዳቱ ባሬንቱ ካፓቱዋና ኢቲፔ ዬሱሲ ኪቴዳዋንታ ቆሃናዉኔ ሹቻን ጫዳናው ቆፔዳ ዎዴ፥

⁶ ዬሱሲ ኪቴዳዋንቱ ሄዋ ኤሪዴ፥ ሊስፂራኔ ዴርቤ ጌቴቲያ ሊቃዖኒያ ካታማቱዋኔ ኡንቱንቱ ሄራን ዴዒያ ጋዲያ ቢ ኣጌዲኖ፤

⁷ ሄዋን ዎንጋላ ሚሺራቹዋ ኦዲኖ።

⁸ ባሬ ዳዪ ኡሉዋፔ ዬሌቶዴፔ ዶሚዴ፥ ላዑ ጌዲ ሲሊና፥ ኡባካ ሃሜቴና ኢቲ ቢታኒ ሊስፂራን ዴዔ።

⁹ ሄ ቢታኒ ጳዉሎሲ ኦዲሺን ሲሴ፤ ጳዉሎሲ ኣ ጫዲ ፄሊያ ዎዴ፥ ፓፃናው ኣው ኣማኑ ዴዒያዋ ቤዒዴ፥

¹⁰ ኮሻ ꬎቂሲዴ ኣ፥ «ሲቲ ጋዴ ኔ ጌዲያን ኤቃ» ያጌዳ፤ ጉፒ ዴንዲዴ፥ ሃሜታ ዶሜዳ።

¹¹ ጳዉሎሲ ኦꬄዳዋ ኣሳይ ቤዒዴ፥ ባሬ ኮሻ ሊቃዖኒያ ቃላን ꬎቁ ኦꬂዴ፥ «ፆሳቱ ኣሳ ማላቲዴ ኑኮ ዎꬌዲኖ» ያጌዳ።

¹² ኣሳይ ባርናባሳ፥ «ዲያ» ጊዴ፥ ጳዉሎሲ ሃሳያሲ ዋናቲያ ዲራው፥ ኣ፥ «ሄርሜሳ» ጊዴ ሱንꬄዳ።

¹³ ጌሻ ጎሊ ካታማ ማታን ዴዒያ ዲያ ቄሳይኔ ኣሳይ ኮሩማቱዋኔ ዳሪ ሎዒያ ጪሻቱዋ ዬሱሲ ኪቴዳዋንቱሲ ያርሹዋ ያርሻናው ኮዪዴ፥ ፔንጊያ ኣሄዲኖ።

¹⁴ ሺን ዬሱሲ ኪቴዳ ባርናባሲኔ ጳዉሎሲ ሄዋ ሲሴዳ ዎዴ ባሬንቱ ማዩዋ ፔꬊዴ፥ ኣሳ ጊዶ ዎፂዴ፥

¹⁵ ባሬንቱ ኮሻ ꬎቁ ኦꬂዴ፥ ሃዋዳን ያጌዲኖ፤ «ኣሳው፥ ሃዋ ኣዪሲ ኦꬂቴ? ኑኒካ ሂንቴንቱዋዳን ሜꬌቴዳ ኣሳ፤ ሃ ፓꬄና ዬዉዋፔ ሳሉዋኔ ሳዓ፥ ኣባኔ ኡንቱንቱ ጊዶን ዴዒያ ኡባባ ሜꬌዳ ዴዑዋ ፆሳኮ ሂንቴ ሲማና ማላ፥ ሂንቴንቶ ኑኒ ዎንጋላ ሚሺራቹዋ ኦዴቶ።

¹⁶ ኢ ቤኒ ኣሳ ዜሬꬃይ ኡባይ ባሬንቱ ኦጊያ ባና ማላ ዬዲ ኣጌዳ።

¹⁷ ሂንቴንቶ ኢራ ሳሉዋፔ ቡኪሴዳ፤ ካꬃካ ኢ ዎዲያን ኢሜዳ፤ ቃሲ ቁማ ኢሚዴ፥ ሂንቴንታ ሎይꬂ ናሼቼ፤ ያቲዴ ሂንቴንቶ ሎዖባ ኦꬂዴ፥ ኡባ ዎዴካ ባሬው ማርካ ꬋዪቤና» ያጌዲኖ።

¹⁸ ዬሱሲ ኪቴዳዋንቱ ሄዋ ጊዴ፥ ባሬንቶ ኣሳይ ያርሼና ማላ፥ ሜቶቲዴ ዲጌዲኖ።

¹⁹ ኣንፆኪያፔኔ ኢቆኒዮኔፔ ዬዳ ኣዪሁዳቱ ኣሳ ባሬንቱ ባጋ ዛሪዴ፥ ሹቻን ጳዉሎሳ ጫዴዲኖ፤ ኡንቱንቶ ሃይቄዳዋ ማላቲና፥ ካታማፔ ካሬው ኣ ጎቺ ኬሴዲኖ።

³ Yesuusi kiitteeddawanttu hewaan daro wodiyaa gami77eeddino; unttunttu Godaabaa yayyennaan odeeddino; Goday malaataanne oorathabaa unttunttu oothana mala, unttunttoo wolqqaa immeeddawaan bare aadho keekatethaa qaalaabay tuma gideeddawaa markkatteedda.

⁴ Shin katamaa asay shaaketti, baggay Ayihudatuwakko, baggay Yesuusi kiitteeddawanttukko simmeeddino.

⁵ Ayihuda gidennawanttunne Ayihudatuu barenttu kaappatuwaanna ittippe Yesuusi kiitteeddawantta qohanawunne shuchchan caddanaw qoppeedda wode,

⁶ Yesuusi kiitteeddawanttu hewaa eriide, Lisxxiraanne Derbbe geetettiyaa Liqaa7ooniyaa katamatuwaanne unttunttu heeran de7iyaa gadiyaa bii aggeeddino;

⁷ hewaan wonggalaa mishiraachchuwaa odiino.

⁸ Bare dayi uluwaappe yelettoodeppe doommiide, laa77u gedi silina, ubbakka hamettenna itti bitani Lisxxiraan de7ee.

⁹ He bitani Phawuloosi odishshin sisee; Phawuloosi A caddi xeelliyaa wode, paxanaw aw ammanuu de7iyaawaa be7iide,

¹⁰ kooshshaa dhoqqissiide A, “Sitti gaade ne gediyaan eqqa” yaageedda; guppi denddiide, hametaa doommeedda.

¹¹ Phawuloosi ootheeddawaa asay be7iide, bare kooshshaa Liqaa7ooniyaa qaalaan dhoqqu oothiide, “Xoossatuu asaa malatiide nuukko wodhdheeddino” yaageedda.

¹² Asay Barnaabaasa, “Diyaa” giide, Phawuloosi haasayaassi waannatiyaa diraw, A, “Hermeesa” giide suntheedda.

¹³ Geeshsha Golli katamaa matan de7iyaa Diyaa qeesaynne asay korumatuwaanne darii lo77iyaa ciishshatuwaa Yesuusi kiitteeddawanttussi yarshshuwaa yarshshanaw koyyiide, penggiyaa aheeddino.

¹⁴ Shin Yesuusi kiitteedda Barnnaabaasinne Phawuloosi hewaa siseedda wode barenttu mayuwaa peedhiide, asaa giddo woxxiidde,

¹⁵ barenttu kooshshaa dhoqqu oothiide, hawaadan yaageeddino; “Asaw, hawaa ayissi oothiitee? Nuunikka hinttenttuwaadan medhetteedda asaa; ha pathenna yewuwaappe saluwaanne sa7aa, abbaanne unttunttu giddon de7iyaa ubbabaa medhdheedda de7uwaa Xoossaakko hintte simmana mala, hinttenttoo nuuni wonggalaa mishiraachchuwaa odeetto.

¹⁶ I beni asaa zerethay ubbay barenttu ogiyaa baana mala yeddii aggeedda.

¹⁷ Hinttenttoo iraa saluwaappe bukisseedda; kathaakka I wodiyaan immeedda; qassi qumaa immiide, hinttentta loythi nashechchee; yaatiide hinttenttoo lo77obaa oothiide, ubba wodekka barew markkaa dhayibeenna” yaageeddino.

¹⁸ Yesuusi kiitteeddawanttu hewaa giide, barenttoo asay yarshshenna mala, metootiide diggeeddino.

¹⁹ Anxxookiyaappenne Iqooniyooneppe yeedda Ayihudatuu asaa barenttu bagga zaariide, shuchchan Phawuloosa caddeeddino; unttunttoo hayqqeeddawaa malatina, katamaappe karew A goochchi kesseeddino.