ዬሱሲ ኪቴዳዋንቱ ኦሱዋ 13:16-51 in Dawro

¹⁶ ጳዉሎሲ ዴንዲ ኤቂዴ፥ ባሬ ኩሺያን ፆርሲዴ፥ ሃዋዳን ያጌዳ፤ «ኢስራዔሊያ ኣሳቶ፥ ፆሳሲ ያዪያዋንቶ ሲሲቴ።

¹⁷ ሃ ኢስራዔሊያ ኣሳ ፆሳይ ኑ ኣዋቱዋ ዶሪዴ፥ ጊብፄ ጋዲያን ኢማꬃቴꬃን ኡንቱንቱ ዴዒሺን፥ ኡንቱንታ ጮሪሴዳ፤ ባሬ ዎልቃማ ዎልቃኒካ ጊብፄ ጋዲያፔ ኡንቱንታ ኬሴዳ።

¹⁸ ባዙዋን ኦይታሙ ላይꬃ ኬና ኑ ኣዋቱዋ ኢ ዳንዳዬዳ።

¹⁹ ካናኔ ጊያ ጋዲያን ኣዪሁዳ ጊዴና ላፑ ካዉቴꬃ ꬋዪሲዴ፥ ኡንቱንቱ ጋዲያ ባሬ ኣሳ ላቲሴዳ።

²⁰ ሄዋፔ ጉዪያን፥ ናቢያ ሳሜላ ዎዲያ ጋካናሲ፥ ኦይዱ ፄታኔ ኢሻታሙ ላይꬃ ኬና ዳናቱዋ ኡንቱንቶ ኢሜዳ።

²¹ ሄዋፔ ጉዪያን፥ ኡንቱንቱ ባሬንቶ ካቲያ ኢማና ማላ ዎሲና፥ ፆሳይ ቢኒያማ ዛሪያፔ ቂሳ ናዓ ሳዖላ ኦይታሙ ላይꬃው ካዉታና ማላ፥ ኡንቱንቶ ኢሜዳ።

²² ፆሳይ ሳዖላ ሻሬዳዋፔ ጉዪያን፥ ኡንቱንቱ ቦላ ዳዊቴ ካዉታና ማላ፥ ኣ ዴንꬄዳ፤ ዳዊቴባ ማርካቲዴ፥ ‹ታኒ ኮዪያ ኡባባ ታ ዎዛናዳን ኦꬂያ ኢሴይ ናዓ ዳዊታ ዴማዲ› ያጌዳ።

²³ «ፆሳይ፥ ‹ታኒ ዳዊታ ዛሪያፔ ኢስራዔሊያ ኣሳ ኣሺያዋ ኣሃና› ቃላ ጌሌዳዋዳንካ፥ ዬሱሳ ኣሄዳ።

²⁴ ዬሱሲ ያናፔ ካሴ ኢስራዔሊያ ኣሳይ ኡባይ ባሬንቱ ናጋራፔ ሲሚዴ ፃማቄታና ማላ፥ ዮሃኒሲ ቃላ ኦዴዳ።

²⁵ ቃሲ ዮሃኒሲ ባሬ ኦሱዋ ዉርሳና ሃኒዴ ኣሳ፥ ‹ታና ኦና ጊዴ ቆፒቴ? ታኒ ሂንቴ ናጊያዋ ጊዲኬ፤ ሺን ቤዒቴ፥ ኣ ጌዲያ ጫማ ቃሹዋካ ጌዲያፔ ቢላናው ታው ቤሴናዌ ታፔ ጉዬና ዬ› ያጌዳ።

²⁶ «ታናዳን ኣማኒያዋንቶ፥ ኣብራሃሜ ዜሬꬃቶ፥ ቃሲ ሃዋን ኣዪሁዳ ጊዴናዋንቶ ፆሳሲ ያዪያዋንቶ፥ ሃ ኣቶቴꬃ ቃላይ ኑሲ ኪቴቴዳ።

²⁷ ኣዪሲ ጎፔ፥ ዬሩሳላሜን ዴዒያ ኣሳይኔ ኡንቱንቱ ካፓቱ ዬሱሳኔ ሳምባታ ጋላሳ ኡባን ናባቤቲያ ናባቱዋ ቃላ ኣኬኪቤና ዲራው፥ ኣ ቦላ ፒርዲዴ፥ ናባቱዋ ቃላ ፖሌዲኖ።

²⁸ ዬሱሳ ዎꬊሳናው ኢቲ ጋሱካ ኡንቱንቶ ቤቴናን ኢፂና፥ ጲላፆሲ ኣ ዎꬋና ማላ ዎሴዲኖ።

²⁹ «ኡንቱንቱ ዬሱሳባይ ፆሳ ማፃፋን ፃፌቴዳዋ ኡባ ፖሌዳ ዎዴ፥ ማስቃሊያፔ ኣ ዎꬂዴ ሞጌዲኖ።

³⁰ ሺን ፆሳይ ሃይቁዋፔ ዬሱሳ ዴንꬄዳ።

³¹ ሄዋፔ ጉዪያን ኢ ባሬናና ጋሊላፔ ዬሩሳላሜ ዬዳ ኣሳቶ ጮራ ጋላሳ ቤቴዳ ኡንቱንቱ ሃዒ ኣባ ኣሳሲ ማርካቲኖ።

³² «ፆሳይ ኑ ኣዋቱዋሲ ኢማና ጌዳ ዎንጋላ ሚሺራቹዋ ኑኒ ሂንቴንቶ ኦዴቶ።

³³ ዳዊቴ ማዚሙሪያ ማፃፋን ላዔꬆ ሼምፑዋን፥ ‹ኔኒ ታ ናዓ። ሃቼ ታኒ ኔ ኣዉዋ ጊዳዲ› ጌቴቲዴ ፃፌቴዳዋዳን፥ ፆሳይ ዬሱሳ ዴንꬂዴ፥ ኑ ኣዋቱዋሲ ኢማና ጌዳዋ ኑሲ ኡንቱንቱ ናናሲ ፖሌዳ።

³⁴ ላዔንꬁዋ ኢ ሃይቄና ማላ፥ ሃይቁዋፔ ኣ ዴንꬄዳዋሲ ፆሳይ፥ ‹ታኒ ዳዊቴው ኢማና ጌዳ ኣማኔቴዳ ጌሻ ኣንጁዋ ሂንቴንቶ ኢማና› ያጊዴ ሃሳዬዳ።

³⁵ ሄዋ ዲራው፥ ማዚሙሪያ ማፃፋን ሃራሳን ቃሲ፥ ‹ኔ ጌሻ ናዓ ኣኃካ ሙሲሳካ› ያጌዳ።

³⁶ ኣዪሲ ጎፔ፥ ዳዊቴ ባሬ ዎዲያን ፆሳ ቆፋ ኦꬄዳዋፔ ጉዪያን ሃይቂዴ፥ ባሬ ኣዋቱዋና ሃይቂ ሙሴዳ።

³⁷ ሺን ፆሳይ ሃይቁዋፔ ዴንꬄዳዌ ሙሲቤና።

³⁸ «ሄዋ ዲራው፥ ታናዳን ኣማኒያዋንቶ፥ ናጋራ ኣቶ ጌቴቴዳዌ ሂንቴንቶ ዬሱሳ ባጋና ኦዴቴዳዌኔ፥ ሙሴ ሂጊያን ፂላናው ሂንቴንቶ ዳንዳዬቴና ኡባባፔ ኣኒ ኣማኒያ ኡባይ ፂላናዌ ሂንቴንቶ ኤሬቶ።

⁴⁰ ሄዋ ዲራው፥ ናባቱ ጌዳዌ ሂንቴ ቦላ ጋኬና ማላ ናጌቲቴ፤

⁴¹ ‹ፆሳይ ጌዳባ ቂሊጪያዋንቶ፥ ቤዒቴ፤ ሃራይ ኣቶ ኢቲ ኡራይ ሂንቴንቶ ኦዲንቶካ፥ ሂንቴ ኣማኔና ኦሱዋ ታኒ ሂንቴንቱ ዎዲያን ኦꬂያ ዲራው፥ ፖራ ጊቴ፤ ሃይቂቴ› ጌዲኖ» ያጌዳ።

⁴² ጳዉሎሲኔ ባርናባሲ ኣዪሁዳ ዎሳ ጎሊያፔ ኬሲሺን፥ ኣሳይ ኡንቱንታ ላዔንꬁዋ ሳምባታንካ ሄዋ ጉጂዴ ኦዳና ማላ ዎሴዲኖ።

⁴³ ሺቁ ላሌቴዳዋፔ ጉዪያን፥ ጮራ ኣዪሁዳቱኔ ኣዪሁዳቱዋ ኣማኑዋን ጌሊዴ ፆሳው ያዪያ ጮራቱ፥ ጳዉሎሳኔ ባርናባሳ ካሌዲኖ፤ ዬሱሲ ኪቴዳዋንቱ ፆሳ ኣꬎ ኬካቴꬃን ሚኒ ዴዓና ማላ፥ ኡንቱንቶ ኦዲዴ ሚኒሴዲኖ።

⁴⁴ ላዔንꬁዋ ሳምባታን ኣማሬዳ ኣሳቱዋፔ ኣቲን፥ ካታማ ኣሳይ ኡባይ ፆሳ ቃላ ሲሳናው ሺቄዳ።

⁴⁵ ሺን ኣዪሁዳቱ ጮራ ኣሳ ቤዔዳ ዎዴ፥ ጳዉሎሳ ቃናቴዲኖ፤ ኣ ሃሳያ ጳልቂዴ፥ ኣ ቦሬዲኖ።

⁴⁶ ጳዉሎሲኔ ባርናባሲ ፃሊዴ፥ «ፆሳ ቃላይ ካሴቲዴ ሂንቴንቶ ኦዴታናው ኮሼ፤ ሺን ቃላ ሂንቴ ኢፄዳ ዲራዉኔ ሜꬊና ዴዑዋ ኣካናው ሂንቴንቶ ቤሴና ጊዴ፥ ሂንቴ ሂንቴንቱ ሁጲያን ፒርዴዳ ዲራው፥ ቤዒቴ፥ ኑኒ ኣዪሁዳ ጊዴናዋንቱኮ ሲሜቶ።

⁴⁷ ኣዪሲ ጎፔ፥ ጎዳይ ኑና፥ « ‹ኣሳይ ኡባይ ሂንቴ ባጋና ኣታና ማላ፥ ሂንቴንታ ታኒ ኣዪሁዳ ጊዴናዋንቶ ፖዑዋ ኦꬃዲ› ያጊ ኣዛዜዳ» ያጌዲኖ።

⁴⁸ ኣዪሁዳ ጊዴናዋንቱ ሄዋ ሲሴዳ ዎዴ፥ ናሼቲዴ ፆሳ ቃላ ቦንቼዲኖ፤ ቃሲ ሜꬊና ዴዑዋሲ ዶሬቴዳ ኡባይ ኣማኔዲኖ።

⁴⁹ ጎዳ ቃላይ ሄ ጋዲያ ኡባ ጋኬዳ።

⁵⁰ ሺን ኣዪሁዳቱ ፆሳው ጎዪኒያ ቦንቼቴዳ ማጫዋንታኔ ካታማን ዴዒያ ዎልቃማ ኣሳቱዋ ጳዉሎሳ ቦላኒኔ ባርናባሳ ቦላ ዴንꬄꬂና፥ ኣሳቱ ኡንቱንታ ዬዴርሱዋ ዶሚዴ፥ ባሬንቱ ጋዲያፔ ኬሴዲኖ።

⁵¹ ሺን ዬሱሲ ኪቴዳዋንቱ ኡንቱንታ ኢፂያዋንቱሲ ማላታ ጊዳና ማላ፥ ባሬንቱ ጌዲያፔ ባና ሾጪዴ፥ ኢቆኒዮኔ ካታማ ቤዲኖ።

¹⁶ Phawuloosi denddi eqqiide, bare kushiyan xorssiide, hawaadan yaageedda; “Israa7eeliyaa asatoo, Xoossaassi yayyiyaawanttoo sisite.

¹⁷ Ha Israa7eeliyaa asaa Xoossay nu aawatuwa dooriide, Gibxe gadiyan imathatethaan unttunttu de7ishshin, unttuntta corisseedda; bare wolqqaama wolqqaanikka Gibxe gadiyaappe unttuntta kesseedda.

¹⁸ Bazzuwan oytamu laythaa keenaa nu aawatuwa I danddayeedda.

¹⁹ Kanaane giyaa gadiyan Ayihuda gidenna laappu kawutethaa dhayissiide, unttunttu gadiyaa bare asaa laatisseedda.

²⁰ Hewaappe guyyiyan, nabiyaa Saameela wodiyaa gakkanaassi, oyddu xeetanne ishatamu laythaa keenaa daannatuwaa unttunttoo immeedda.

²¹ Hewaappe guyyiyan, unttunttu barenttoo kaatiyaa immana mala woossina, Xoossay Biiniyaama zariyaappe Qiisa na7aa Saa7oola oytamu laythaw kawutana mala, unttunttoo immeedda.

²² Xoossay Saa7oola shaareeddawaappe guyyiyan, unttunttu bolla Daawite kawutana mala, A dentheedda; Daawitebaa markkattiidde, ‘Taani koyyiyaa ubbabaa ta wozanaadan oothiyaa Issey na7aa Daawita demmaaddi’ yaageedda.

²³ “Xoossay, ‘Taani Daawita zariyaappe Israa7eeliyaa asaa ashshiyaawaa ahana’ qaalaa geleeddawaadankka, Yesuusa aheedda.

²⁴ Yesuusi yaanaappe kase Israa7eeliyaa asay ubbay barenttu nagaraappe simmiide xammaqettana mala, Yohaannisi qaalaa odeedda.

²⁵ Qassi Yohaannisi bare oosuwaa wurssana haniidde asaa, ‘Taana oona giide qoppiitee? Taani hintte naagiyaawaa gidikke; shin be7ite, A gediyaa caammaa qashuwaakka gediyaappe billanaw taw bessennawe taappe guyyenna yee’ yaageedda.

²⁶ “Taanaadan ammaniyaawanttoo, Abraahaame zerethatoo, qassi hawaan Ayihuda gidennawanttoo Xoossaassi yayyiyaawanttoo, ha atotethaa qaalay nuussi kiitetteedda.

²⁷ Ayissi gooppe, Yeerusalaamen de7iyaa asaynne unttunttu kaappatuu Yesuusanne Sambbata gallassaa ubbaan nabbabettiyaa nabatuwaa qaalaa akeekibeenna diraw, A bolla pirddiide, nabatuwaa qaalaa poleeddino.

²⁸ Yesuusa wodhissanaw itti gaasuukka unttunttoo beettennaan ixxina, Philaaxoosi A wodhana mala woosseeddino.

²⁹ “Unttunttu Yesuusabay Xoossaa Maxaafan xaafetteeddawaa ubbaa poleedda wode, masqqaliyaappe A wothiide moogeeddino.

³⁰ Shin Xoossay hayquwaappe Yesuusa dentheedda.

³¹ Hewaappe guyyiyan I barenanna Galiilaappe Yeerusalaame yeedda asatoo cora gallassaa beetteedda unttunttu ha77i aabaa asaassi markkattiino.

³² “Xoossay nu aawatuwassi immana geedda wonggalaa mishiraachchuwaa nuuni hinttenttoo odeetto.

³³ Daawite Mazimuriyaa Maxaafaan laa7etho shemppuwaan, ‘Neeni Ta Na7aa. Hachche Taani ne Aawuwaa gidaaddi’ geetettiide xaafetteeddawaadan, Xoossay Yesuusa denthiide, nu aawatuwassi immana geeddawaa nuussi unttunttu naanaassi poleedda.

³⁴ Laa7enthuwaa I hayqqenna mala, hayquwaappe A dentheeddawaassi Xoossay, ‘Taani Daawitew immana geedda ammanetteedda geeshsha anjjuwaa hinttenttoo immana’ yaagiide haasayeedda.

³⁵ Hewaa diraw, Mazimuriyaa Maxaafaan harasaan qassi, ‘Ne Geeshsha Na7aa anhaakka musissakka’ yaageedda.

³⁶ Ayissi gooppe, Daawite bare wodiyaan Xoossaa qofaa ootheeddawaappe guyyiyan hayqqiide, bare aawatuwanna hayqqi museedda.

³⁷ Shin Xoossay hayquwaappe dentheeddawe musibeenna.

³⁸ “Hewaa diraw, taanaadan ammaniyaawanttoo, nagaraa atto geetetteeddawe hinttenttoo Yesuusa bagganna odetteeddawenne, Muse higgiyan xillanaw hinttenttoo danddayettenna ubbabaappe aani ammaniyaa ubbay xillanawe hinttenttoo eretto.

⁴⁰ Hewaa diraw, nabatuu geeddawe hintte bolla gakkenna mala naagettite;

⁴¹ ‘Xoossay geeddabaa qilliicciyaawanttoo, be7ite; haray atto itti uray hinttenttoo odinttokka, hintte ammanenna oosuwaa taani hinttenttu wodiyaan oothiyaa diraw, poora giite; hayqqite’ geeddino” yaageedda.

⁴² Phawuloosinne Barnaabaasi Ayihuda woosa golliyaappe kesishshin, asay unttuntta laa7enthuwaa Sambbatankka hewaa gujjiide odana mala woosseeddino.

⁴³ Shiiquu laaletteeddawaappe guyyiyan, cora Ayihudatuunne Ayihudatuwaa ammanuwan geliide Xoossaw yayyiyaa coratuu, Phawuloosanne Barnaabaasa kaalleeddino; Yesuusi kiitteeddawanttu Xoossaa aadho keekatethaan minni de7ana mala, unttunttoo odiide minisseeddino.

⁴⁴ Laa7enthuwaa Sambbataan amareedda asatuwaappe attin, katamaa asay ubbay Xoossaa qaalaa sisanaw shiiqeedda.

⁴⁵ Shin Ayihudatuu cora asaa be7eedda wode, Phawuloosa qanaateeddino; A haasayaa phalqqiide, A boreeddino.

⁴⁶ Phawuloosinne Barnaabaasi xaliide, “Xoossaa qaalay kasetiide hinttenttoo odettanaw koshshee; shin qaalaa hintte ixxeedda dirawunne medhinaa de7uwaa akkanaw hinttenttoo bessenna giide, hintte hinttenttu huuphiyan pirddeedda diraw, be7ite, nuuni Ayihuda gidennawanttukko simmeetto.

⁴⁷ Ayissi gooppe, Goday nuuna, “ ‘Asay ubbay hintte bagganna attana mala, hinttentta taani Ayihuda gidennawanttoo poo7uwaa oothaaddi’ yaagi azazeedda” yaageeddino.

⁴⁸ Ayihuda gidennawanttu hewaa siseedda wode, nashettiide Xoossaa qaalaa bonchcheeddino; qassi medhinaa de7uwaassi dooretteedda ubbay ammaneeddino.

⁴⁹ Godaa qaalay he gadiyaa ubbaa gakkeedda.

⁵⁰ Shin Ayihudatuu Xoossaw goyinniyaa bonchchetteedda maccawanttanne katamaan de7iyaa wolqqaama asatuwaa Phawuloosa bollaninne Barnaabaasa bolla denthethina, asatuu unttuntta yederssuwaa doommiide, barenttu gadiyaappe keseeddino.

⁵¹ Shin Yesuusi kiitteeddawanttu unttuntta ixxiyaawanttussi malaata gidana mala, barenttu gediyaappe baanaa shociide, Iqooniyoone katamaa beeddino.