ዬሱሲ ኪቴዳዋንቱ ኦሱዋ 11:15-24 in Dawro

¹⁵ «ታኒ ሃሳያናው ዶሚያዋን ጌሻ ኣያናይ ኮይሮ ኑ ቦላ ዎꬌዳዋዳን፥ ኡንቱንቱ ቦላካ ዎꬊ ኣጌዳ።

¹⁶ ጎዳይ፥ ‹ዮሃኒሲ ሃꬃን ፃማቄዳ፤ ሺን ሂንቴንቱ ጌሻ ኣያናን ፃማቄታኒታ› ያጌዳ ቃላ ታኒ ሃሳያዲ።

¹⁷ ፆሳይ ኑሲ ጎዳ ዬሱሲ ኪሪስቶሳ ኣማኔዳዋንቱሲ ኢሜዳ ኢሞታ ማላ ኣዪሁዳ ጊዴናዋንቶካ ቃሲ ኢሞፔ፥ ሲሚ ፆሳ ዲጋናው ታኒ ኦኔ?» ያጌዳ።

¹⁸ ኡንቱንቱ ሃዋ ሲሴዳ ዎዴ ባሬንቱ ፓሉማ ኣጊዴ፥ «ያቲና፥ ፆሳይ ኣዪሁዳ ጊዴናዋንቱካ ቃሲ ናጋራፔ ሲሚዴ ዴዓናዳን፥ ኡንቱንታ ቃዴዳ» ያጊዴ ፆሳ ጋላቴዲኖ።

¹⁹ ኢስፂፋኖሳ ቦላ ጋኬዳ ዋዪያ ጌዱዋን ላሌቴዳ ኣማኒያዋንቱ ቃላ ኣዪሁዳቱዋ ፃላላፔ ኣቲን፥ ሃራሲ ኢቱዋሲኔ ኦዴናን፥ ፒንቄ፥ ቆጲሮሳኔ ኣንፆኪያ ጋካናው ዩዬዲኖ።

²⁰ ሺን ቆጲሮሳፔኔ ቄሬናፔ ዬዳ ኢቲ ኢቲ ኣማኒያ ኣሳቱ ኣንፆኪያ ቢዴ፥ ጎዳ ዬሱሳ ዎንጋላ ሚሺራቹዋ ኦዲዴ፥ ጊሪኬ ኣሳሲካ ኦዴዲኖ።

²¹ ጎዳ ዎልቃይ ኡንቱንቱና ዴዔ፤ ቃሲ ጮራ ኣሳይ ኣማኒዴ፥ ጎዳኮ ሲሜዲኖ።

²² ሃ ዬዉ ዬሩሳላሜን ዴዒያ ኣማኒያ ኣሳሲ ሲሴቲና፥ ኣማኒያ ኣሳይ ባርናባሳ ኣንፆኪያ ኪቴዳ።

²³ ባርናባሲ ኣንፆኪያ ቤዳ ዎዴ፥ ፆሳ ኣꬎ ኬካቴꬃ ኦሱዋ ቤዒዴ ናሼቴዳ፤ ኡንቱንቱ ኡባይ ጎዳን ባሬንቱ ኩሜንꬃ ዎዛናፔ ሚኒ ዴዓናዳን፥ ኡንቱንታ ዞሬዳ።

²⁴ ኣዪሲ ጎፔ፥ ባርናባሲ ጌሻ ኣያናይኔ ኣማኑ ኩሜዳ ሎዖ ኣሳ፤ ሄ ጋሱዋን ጮራ ኣሳይ ጎዳኮ ዬዲኖ።

¹⁵ “Taani haasayanaw doommiyaawan Geeshsha Ayyaanay koyro nu bolla wodhdheeddawaadan, unttunttu bollaakka wodhdhii aggeedda.

¹⁶ Goday, ‘Yohaannisi haathaan xammaqeedda; shin hinttenttu Geeshsha Ayyaanaan xammaqettanita’ yaageedda qaalaa taani hassayaaddi.

¹⁷ Xoossay nuussi Godaa Yesuusi Kiristtoosa ammaneeddawanttussi immeedda imotaa malaa Ayihuda gidennawanttookka qassi immooppe, simmi Xoossaa digganaw taani oonee?” yaageedda.

¹⁸ Unttunttu hawaa siseedda wode barenttu palumaa aggiide, “Yaatina, Xoossay Ayihuda gidennawanttukka qassi nagaraappe simmiide de7anaadan, unttuntta qaadeedda” yaagiide Xoossaa galateeddino.

¹⁹ Isxxifaanoosa bolla gakkeedda waayyiyaa geeduwan laaletteedda ammaniyaawanttu qaalaa Ayihudatuwaa xalalaappe attin, haraassi ittuwaassinne odennaan, Pinqqe, Qophiroosanne Anxxookiyaa gakkanaw yuuyyeeddino.

²⁰ Shin Qophiroosappenne Qereenappe yeedda itti itti ammaniyaa asatuu Anxxookiyaa biide, Godaa Yesuusa wonggalaa mishiraachchuwaa odiidde, Giriike asaassikka odeeddino.

²¹ Godaa wolqqay unttunttunna de7ee; qassi cora asay ammaniide, Godaakko simmeeddino.

²² Ha yewuu Yeerusalaamen de7iyaa ammaniyaa asaassi sisettina, ammaniyaa asay Barnaabaasa Anxxookiyaa kiitteedda.

²³ Barnaabaasi Anxxookiyaa beedda wode, Xoossaa aadho keekatethaa oosuwaa be7iide nashetteedda; unttunttu ubbay Godan barenttu kumentha wozanaappe minni de7anaadan, unttuntta zoreedda.

²⁴ Ayissi gooppe, Barnaabaasi Geeshsha Ayyaanaynne ammanuu kumeedda lo77o asaa; he gaasuwan cora asay Godaakko yeeddino.