ዬሱሲ ኪቴዳዋንቱ ኦሱዋ 10:1-16 in Dawro

¹ ቂሳሪያን «ፃላቱዋ ኦላ ኣሳቱዋ» ጌቴቲያ ኦላንቻቶ ኢቲ ፄታቱዋ ካፑ ቆርኔሊዮሳ ጊያዌ ዴዔ።

² ቆርኔሊዮሲ ፆሳ ሎይꬂዴ ኣማኒያ ኣሳኔ፥ ባሬ ሶይ ኣሳ ኡባና ኢቲፔ ፆሳሲ ጎዪኒያ ኣሳ፤ ኣዪሁዳ ሂዬሳካ ኢ ዳሮ ማዴ፤ ቃሲ ፆሳ ኡባ ዎዴ ዎሴ።

³ ኢቲ ጋላሲ ኡዱፑ ሳቲያ ሄራን፥ «ቆርኔሊዮሳ» ጊዴ ፄሲያ ፆሳ ኪታንቻይ ባሬኮ ጌሊሺን፥ ቆርኔሊዮሲ ሳፃን ጌሺዴ ቤዔዳ።

⁴ ቆርኔሊዮሲ ያዪዴ፥ ኪታንቻ ጫዲ ፄሊዴ፥ «ታ ጎዳው፥ ኢ ኣዬ?» ያጌዳ። ኪታንቻይ ዛሪዴ፥ ሃዋዳን ያጌዳ፤ «ኔ ዎሳይኔ ኔኒ ሂዬሳ ማዲያዌ ፆሳ ሲንꬃን ሃሳዬታናው ሳሉዋ ቤዳ።

⁵ ሃዒ ዮጴ ኣሳ ኪታዴ፥ ጴፂሮሳ ጌቴቲያ ሲሞና ኣሂሳ።

⁶ ጴፂሮሲ ኣባ ዶናን ዴዒያ ጋልባ ቃጪያ ሲሞና ጎሌን ኢማꬃቴꬃኒ ኡቴዳ፤ ኔኒ ኦꬃናው ቤሲያዋ ኢ ኔው ኦዳናዋ» ያጌዳ።

⁷ ቆርኔሊዮሲ ባሬው ኦዴዳ ኪታንቻይ ቢና፥ ባሬ ቆማቱዋፔ ላዓቱዋኔ ፆሳሲ ጎዪኒያ ባሬፔ ሻኬቴና ዎታዳራቱዋፔ ኢቱዋ ፄሲዴ፥

⁸ ኡንቱንቶ ኡባባ ኦዲዴ፥ ኡንቱንታ ዮጴ ኪቴዳ።

⁹ ዎንቴꬃ ጋላሲ ኡንቱንቱ ቢዴ፥ ዮጴ ካታማኮ ማቲሺን፥ ጴፂሮሲ ኡሱፑን ሳቲያ ሄራን ጎሊያ ቦላን ዴምባዪዴ ኦꬄዳሳ ፆሳ ዎሳናው ኬሴዳ።

¹⁰ ቃሲ ኮሻቲዴ፥ ቁማ ማናው ኮዬዳ፤ ሺን ቁማይ ካዒሺን፥ ሳፃ ቤዔዳ።

¹¹ ሳሉ ዶዬቲና፥ ዎልቃማ ማዩዋ ማላቲያባይ ኦይዱ ባጋና ኦይቄቲዴ፥ ሳዓን ዎꬊሺን፥ ጴፂሮሲ ቤዔዳ።

¹² ሄዋን ኦይዱ ጌዲያና ዴዒያ ሜሂ፥ ዶዓይ፥ ሾሻይ፥ ዛሪኔ ካፉ ኡባይ ዴዔ።

¹³ «ጴፂሮሳ፥ ዴንዳ ኤቃዴ ሹካ ማ» ጊያ ቃላይ ኣኮ ዬዳ።

¹⁴ ሺን ጴፂሮሲ፥ «ታ ጎዳው፥ ሃኔና! ታኒ ቱናባኔ ሼኔዪያባ ኡባካ ማ ኤሪኬ» ያጌዳ።

¹⁵ ቃሲ ላዔንꬁዋ፥ «ፆሳይ ጌሼዳዋ ኔኒ ቱኒሶፓ» ጊያ ቃላይ ኣኮ ዬዳ።

¹⁶ ሄዙ ጌዴ ሄዋዳን ጌዳ፤ ሄዋፔ ጉዪያን፥ ኤሌካ ሄ ዎልቃማ ማዩዋ ማላቲያዌ ፑዴ ሳሉዋ ኣኬቲ ኣጌዳ።

¹ Qiisaariyaan “Xaalatuwaa Olaa asatuwaa” geetettiyaa olanchchatoo itti xeetatuwaa kaappuu Qornneliyoosa giyaawe de7ee.

² Qornneliyoosi Xoossaa loythiide ammaniyaa asanne, bare soy asaa ubbaanna ittippe Xoossaassi goyinniyaa asa; Ayihuda hiyyeesaakka I daro maaddee; qassi Xoossaa ubba wode woossee.

³ Itti gallassi udduppu saatiyaa heeran, “Qornneliyoosa” giide xeesiyaa Xoossaa kiitanchchay barekko gelishshin, Qornneliyoosi saxaan geeshshiide be7eedda.

⁴ Qornneliyoosi yayyiide, kiitanchchaa caddi xeelliide, “Ta Godaw, I ayee?” yaageedda. Kiitanchchay zaariide, hawaadan yaageedda; “Ne woosaynne neeni hiyyeesaa maaddiyawe Xoossaa sinthan hassayettanaw saluwaa beedda.

⁵ Ha77i Yoophphe asaa kiittaade, Phexiroosa geetettiyaa Simoona ahissa.

⁶ Phexiroosi abbaa doonan de7iyaa galbbaa qaaciyaa Simoona gollen imathatethaani utteedda; neeni oothanaw bessiyaawaa I new odanawaa” yaageedda.

⁷ Qornneliyoosi barew odeedda kiitanchchay biina, bare qoomatuwaappe laa77atuwaanne Xoossaassi goyinniyaa bareppe shaakettenna wottaaddaratuwaappe ittuwaa xeesiide,

⁸ unttunttoo ubbabaa odiide, unttuntta Yoophphe kiitteedda.

⁹ Wonttetha gallassi unttunttu biide, Yoophphe katamaakko matishshin, Phexiroosi usuppun saatiyaa heeran golliyaa bollan dembbayiide ootheeddasaa Xoossaa woossanaw keseedda.

¹⁰ Qassi koshattiide, qumaa maanaw koyyeedda; shin qumay ka77ishshin, saxaa be7eedda.

¹¹ Saluu dooyettina, wolqqaama mayuwaa malatiyaabay oyddu bagganna oyqettiide, sa7aan wodhdhishshin, Phexiroosi be7eedda.

¹² Hewaan oyddu gediyaanna de7iyaa mehii, do7ay, shooshshay, zariinne kafuu ubbay de7ee.

¹³ “Phexiroosaa, dendda eqqaade shukka ma” giyaa qaalay aakko yeedda.

¹⁴ Shin Phexiroosi, “Ta Godaw, hanenna! Taani tunabaanne sheneyiyaabaa ubbakka ma erikke” yaageedda.

¹⁵ Qassi laa7enthuwaa, “Xoossay geeshsheeddawaa neeni tunissoppa” giyaa qaalay aakko yeedda.

¹⁶ Heezzu gede hewaadan geedda; hewaappe guyyiyan, ellekka he wolqqaama mayuwaa malatiyaawe pude saluwaa aketti aggeedda.