ሮሜ 14:8-19 in Gofa

⁸ ኑ ዴዖን ዴዒኮ ጎዳስ ዴዖስ፤ ቃሲ ሃይቂኮካ ጎዳስ ሃይቆስ። ሂዛ፥ ኑ ዴዖን ዴዒን ዎይኮ ሃይቂን ጎዳሳ።

⁹ ኪሪስቶሲ ሃይቂዲ ሃይቆፔ ዴንዲዳይ፥ ዴዖን ዴዔይሳታሲኔ ሃይቂዳይሳታስ ጎዳ ጊዳናሳ።

¹⁰ ያቲን፥ ኔኒ ኔ ኢሻ ቦላ ኣይስ ፒርዳይ? ዎይኮ ኔኒ ኔ ኢሻ ኣይስ ካꬋይ? ኑኒ ኡባይ ፆሳ ፒርዳ ኣራታ ሲንꬃን ኤቃና።

¹¹ ጌሻ ማፃፋን ጎዳይ፥ «ታኒ ዴዖን ዴዓይስ፤ ኣሳ ኡባይ ታ ሲንꬃን ጉልባታና፤ ታኒ ፆሴ ጊዴይሳ ማርካታና» ያጌስ።

¹² ሂዛ፥ ኑ ኦꬂዳባስ ኑ ሁዔን ሁዔን ፆሳ ሲንꬃን ሺቂዲ ዛሮ ኢማና።

¹³ ሄሳ ጊሾ፥ ኑኒ ኢሶይ ኢሱዋ ቦላ ፒርዴይሳ ኣጎስ። ሺን ሂንቴ ኢሻ ꬉብሲዲ ዎይኮ ቃፂዲ ናጋራን ጌልሲያባ ኦꬆናዳ ናጌቲቴ።

¹⁴ ጎዳ ዬሱሳ ኣማኒያ ኣሳዳ፥ ባ ሁዔን ቱና ጊዲዳ ካꬂ ባይናይሳ ታኒ ጌሻዳ ኤራይስ። ሺን ኢሲ ኣሲ ኢሲባ ቱና ጊዲ ቆፒኮ ሄሲ ኢያው ቱና ጊዴስ።

¹⁵ ኔ ሚያ ካꬃ ጊሾ ኔ ኢሻ ꬉቢያባ ጊዲኮ፥ ኪሪስቶሳን ዴዒያ ኔ ኢሻ ሲቃካ። ኪሪስቶሲ ኢያ ጊሾ ሃይቂዳ ኡራ ኔ ሚያ ካꬃን ኢያ ኣያና ዴዑዋ ꬋይሶፋ።

¹⁶ ሂዛ፥ ሂንቴው ዴዒያ ላዓቴꬃ ሃራቲ ቦራና ሜላ ኦꬆፊቴ።

¹⁷ ፆሳ ካዎቴꬃይ ጌሻ ኣያናን ቤንቲያ ፂሎቴꬂ፥ ሳሮቴꬂኔ ቱማ ኡፋይሲፌ ኣቲን ሙሳባኔ ኡሻባ ጊዴና።

¹⁸ ሄሳዳ ኪሪስቶሳስ ኦꬂያ ኣሲ ፆሳ ኡፋይሴስ፤ ኣሳንካ ኣንጄቴስ።

¹⁹ ሄሳ ጊሾ፥ ኣኔ ኑኒ ሳሮቴꬂ ቤንቲያ ኦጊያኔ ኢሱዋ ኢሱዋ ኣማኖን ሚንꬂያ ኦጊያ ኮዮስ።

⁸ Nu de7on de7ikko Godaas de7oos; qassi hayqqikokka Godaas hayqqoos. Hiza, nu de7on de7in woykko hayqqin Godaassa.

⁹ Kiristtoosi hayqqidi hayqoppe denddiday, de7on de7eyssatasinne hayqqidayssatas Goda gidanaassa.

¹⁰ Yaatin, neeni ne ishaa bolla ays pirdday? Woykko neeni ne ishaa ays kadhay? Nuuni ubbay Xoossaa pirdda araata sinthan eqqana.

¹¹ Geeshsha Maxaafan Goday, “Taani de7on de7ays; asa ubbay ta sinthan gulbbatana; taani Xoosse gideyssa markkattana” yaagees.

¹² Hiza, nu oothidabaas nu huu7en huu7en Xoossaa sinthan shiiqidi zaaro immana.

¹³ Hessa gisho, nuuni issoy issuwa bolla pirddeyssa aggoos. Shin hintte ishaa dhubsidi woykko qaxxidi nagaran gelssiyaba oothonnaada naagettite.

¹⁴ Godaa Yesuusa ammaniyaa asada, ba huu7en tuna gidida kathi baynnayssa taani geeshshada erays. Shin issi asi issibaa tuna gidi qoppiko hessi iyaw tuna gidees.

¹⁵ Ne miya katha gisho ne ishaa dhubbiyabaa gidikko, Kiristtoosan de7iya ne ishaa siiqakka. Kiristtoosi iya gisho hayqqida uraa ne miya kathan iya ayyaana de7uwa dhayssofa.

¹⁶ Hiza, hinttew de7iya la77atethaa harati borana mela oothofite.

¹⁷ Xoossa kawotethay Geeshsha Ayyaanan benttiya xillotethi, sarotethinne tuma ufayssife attin muussabaanne ushshabaa gidenna.

¹⁸ Hessada Kiristtoosas oothiya asi Xoossaa ufayssees; asankka anjjettees.

¹⁹ Hessa gisho, ane nuuni sarotethi benttiya ogiyanne issuwa issuwa ammanon minthiya ogiya koyoos.