8 ዒንሢኮ ፆኦሲ ጉሙርቂፆ ሓይሳ ዓጮ'' ቢያይዳ ዋይዚንቴሢሮ ቢያፓ ቤርታሲ ዬሱስ ኪሪስቶሴ ዛሎ''ና ዒንሢ ቢያሢ ዛሎ''ሮ ታ ፆኦዛሢ ታኣኒ ጋላታኔ።
9 ቢያ ኬሊ'' ታ ሺኢቃ ዎዶ''ና ዒንሢ ዛሎ'' ዋሉ''ዋያ ማዒፆኮ ዒዛ ናኣዚ'' ዛሎ'' ኮዦ ሓይሶ ቃኣሎ'' ኬኤዚ ኬኤዚ ጉቤ ዒናፓ ታ ዒዛም ማዻ ፆኦዛሢ ታኣኮ ማርካኬ።
10 ፆኦሲ ጌዔቴ ጋፒንፃ ሓሢ ዒንሢ ኮራ ታ ሙካንዳ ጎይሢ ዒ ጊኢጊሻንዳጉዲ ቢያ ኬሊ'' ታ ሺኢቃኔ።
11 ዓይጎሮ ጌዔቴ ዒንሢ ፆኦሲ ጉሙርቂፆና ዶዳንዳጉዲ ማሃ ዓያኖ ዒንጊፆ ታ ዒንሢም ኬኤዛኒ ኮዓሢሮ ታ ዒንሢ ዛጋኒ ኮሺ'' ማላኔ።
12 ዬያ ታ ጋዓሢ ታኣኒ ዒንሢ ጉሙርቂፆ ዛሎ''ና ዒንሢያ ታ ጉሙርቂፆ ዛሎ''ና ዎሊ ኑ ዶዲሻኒ ኮዒኬ።
13 ታ ዒሾንሦ! ታ ሚሾንሦ! ሜሌ'' ዓይሁዴ ማዒባኣ ዓሶ ታ ዔርዚ ሚርጌ ኪሪስቶሴ ጉሙርቃ ዓሲ ዴንቄኔ፤ ዬያጉዲ ሃሣ ዒንሢ ባኣኮ''ይዳኣ ታ ዔርዚ ኪሪስቶሴ ጉሙርቃ ዓሲ ዴንቃኒ ማሌኔ፤ ጋዓንቴ ዒንሢ ባንሢ ሙካኒ ሚርጌና ታ ማሌም ሓኖ'' ሄላ''ንዳኣና ታኣም ጊኢጊባኣሢ ዒንሢ ዔራንዳጉዲ ታ ኮዓኔ።
14 ጊሪኮ ዓጮ'' ናንጎና ሙኡጮና ዔራ ዓሶና ዔሩዋ ዓሶናም፥ ጪንጮ ዓሶና ቦኦዞ ዓሶናም ኮዦ ሓይሶ ዔርዛንዳያ ታና ኮይሳኔ።
15 ዬያሮኬ ዒንሢ፥ ሮሜይዳ ናንጋዞንሢም ኮዦ ሓይሶ ኬኤዛኒ ታ ኮዓሢ።
16 ታኣኒ ኮዦ ሓይሶ ቃኣሎ'' ኬኤዛኒ ቦርሲንቱዋሴ፤ ዓይጎሮ ጌዔቶ ኮዦ ሓይሶ ቃኣላ'' ቤርታዺ ዓይሁዴ ዓሶ፥ ሄሊ''ሳዖ ዓይሁዴ ማዒባኣ ዓሶ፤ ጌይፃ፦ ጉሙርቃ ዓሶ ቢያ ዻቂሻኒ ዳንዳዓ ፆኦሲ ዎልቄኬ።
17 ዬይ ኮዦ ሃይሶ ቃኣላ'' ፆኦሲ' ዓሲ ፂሎ'' ማሂ ዛጋሢ ኪሪስቶሴ ጉሙርቄቶ ሌሊ ማዔሢ ኬኤዛኔ፤ ዓይጎሮ ጌዔቴ፦ «ፆኦሲ ጉሙርቃ ዓሲ ፆኦሲ' ፂሎ'' ማሂ ዛጋኔ፤ ናንጊያ ዴንቃንዳኔ» ጌይንቲ ፃኣፒንቴኔ።
