ሮሚያ 7:7-19 in Dawro

⁷ ያቲና፥ ኑኒ ዋጋኔ? ሂጊ ባሬ ሁጴው ናጋሬ? ሄዋ ጊዴና፤ ሺን ሂጊ ናጋራይ ኣዬንቶ ታና ኤሪሴዳ። ኣዪሲ ጎፔ፥ ታኒ ሂጊ፥ «ኣሳባ ኣሞቶፓ» ጊቤኔንቶ፥ ኣሳባ ኣሞቲያዌ ኣዬንቶ ኤሪኬ።

⁸ ሺን ናጋራይ ታኒ ኡባባ ኣሞታና ማላ፥ ኣዛዙዋ ባጋና ታ ቦላ ኦጊያ ዴሜዳ፤ ኣዪሲ ጎፔ፥ ሂጊ ባዌንቶ፥ ናጋራው ዎልቃይ ባዋ።

⁹ ካሴ ሂጊ ባይና ዎዴ ታኒ ፓፃ፤ ሺን ኣዛዙ ዬዳ ዎዴ ናጋራይ ዴዖ ሲሚና፥

¹⁰ ታኒ ቃሲ ሃይቃዲ፤ ታና ፓፃ ዎꬃናው ፆሳይ ቆፔዳ ኣዛዙ፥ ታው ሃይቁዋ ኣሄዳ።

¹¹ ኣዪሲ ጎፔ፥ ናጋራይ ኣዛዙዋ ባጋና ታና ጪሚያ ኦጊያ ዴሚዴ፥ ሄ ኣዛዙዋን ታና ዎꬌዳ።

¹² ሄዋ ዲራው፥ ሂጊ ጌሻ፤ ኣዛዙካ ጌሻ፥ ፂላኔ ሎዓ።

¹³ ያቲና፥ ሎዖባይ ታው ሃይቁዋ ኣሄዴ? ሄዋ ጊዴና፤ ሺን ታው ሄዋ ናጋራይ ኣሄዳ፤ ኣሳይ ናጋራይ ኣዬንቶ ሻኪዴ ኤራና ማላ፥ ናጋራይ ሎዖባ ባጋና፥ ታው ሃይቁዋ ኣሄዳ። ቃሲ ኣዛዙ፥ «ኦኒኔ ናጋራ ኦꬃናው ቤሴና» ያጊያ ዲራው፥ ናጋራይ ካሴዋፔ ኣꬊ ኢቴዳ።

¹⁴ ኑኒ ሂጊ ፆሳዋ ጊዲያዋ ኤሬቶ፤ ሺን ታኒ ታና ናጋራው ዛሊዔዳ ሃይቂያ ኣሳ፤

¹⁵ ታኒ ኦꬂያዋ ዎዛና ኣꬂኬ፤ ኣዪሲ ጎፔ፥ ታኒ ኢፂያዋ ኦꬃይፔ ኣቲን፥ ታኒ ኦꬃናው ዶሲያዋ ኦꬂኬ።

¹⁶ ታኒ ኢፂያዋ ኦꬂያዋ ጊዶፔ፥ ሂጊ ሎዓ ጊዲያዋ ማርካታይ።

¹⁷ ሄዋ ጊዶፔ፥ ሄ ዬዉዋ ታ ቦላ ዴዒያ ናጋራይ ኦꬂያዋፔ ኣቲን፥ ሃዒ ታኒ ኦꬂኬ።

¹⁸ ታናን፥ ሄዌኔ ታ ኣሳቴꬃን ሎዖባይ ዴዔናዋ ታኒ ኤራይ፤ ኣዪሲ ጎፔ፥ ሎዖባ ኦꬂያ ኣሙ ታ ቦላ ዴዖፔካ፥ ታኒ ሄ ሎዖባ ኦꬃናናው ዳንዳዪኬ።

¹⁹ ታኒ ኢፂያ ኢታባ ኦꬃይፔ ኣቲን፥ ታኒ ዶሲያ ሎዖባ ኦꬂኬ።

⁷ Yaatina, nuuni waaganee? Higgii bare huuphew nagaree? Hewaa gidenna; shin higgii nagaray ayentto taana erisseedda. Ayissi gooppe, taani higgii, “Asaabaa amottoppa” gibeennentto, asaabaa amottiyaawe ayentto erikke.

⁸ Shin nagaray taani ubbabaa amottana mala, azazuwaa bagganna ta bolla ogiyaa demmeedda; ayissi gooppe, higgii baawentto, nagaraw wolqqay baawa.

⁹ Kase higgii baynna wode taani paxa; shin azazuu yeedda wode nagaray de7oo simmina,

¹⁰ taani qassi hayqqaaddi; taana paxa wothanaw Xoossay qoppeedda azazuu, taw hayquwaa aheedda.

¹¹ Ayissi gooppe, nagaray azazuwaa bagganna taana cimmiyaa ogiyaa demmiide, he azazuwan taana wodheedda.

¹² Hewaa diraw, higgii geeshsha; azazuukka geeshsha, xillanne lo77a.

¹³ Yaatina, lo77obay taw hayquwaa aheeddee? Hewaa gidenna; shin taw hewaa nagaray aheedda; asay nagaray ayentto shaakkiide erana mala, nagaray lo77obaa bagganna, taw hayquwaa aheedda. Qassi azazuu, “Ooninne nagaraa oothanaw bessenna” yaagiyaa diraw, nagaray kasewaappe aadhdhi iiteedda.

¹⁴ Nuuni higgii Xoossawaa gidiyaawaa ereetto; shin taani taana nagaraw zali77eedda hayqqiyaa asa;

¹⁵ taani oothiyaawaa wozanaa aathikke; ayissi gooppe, taani ixxiyaawaa oothayppe attin, taani oothanaw dosiyaawaa oothikke.

¹⁶ Taani ixxiyaawaa oothiyaawaa gidooppe, higgii lo77a gidiyaawaa markkattay.

¹⁷ Hewaa gidooppe, he yewuwaa ta bolla de7iyaa nagaray oothiyaawaappe attin, ha77i taani oothikke.

¹⁸ Taanan, hewenne ta asatethaan lo77obay de7ennawaa taani eray; ayissi gooppe, lo77obaa oothiyaa amuu ta bolla de7ooppekka, taani he lo77obaa oothananaw danddayikke.

¹⁹ Taani ixxiyaa iitabaa oothayppe attin, taani dosiyaa lo77obaa oothikke.