ሮሚያ 2:3-18 in Dawro

³ ኔኖ፥ ሃዋ ማላ ኦሱዋ ኦꬂያዋንቱ ቦላ ፒርዲያዎ፥ ቃሲ ሄ ኔኒ ፒርዲያዋ ማላ ኦꬂያዎ፥ ኔኒ ፆሳ ፒርዳፔ ኣቲያዋ ማላቲ?

⁴ ዎይ ፆሳ ዎልቃማ ኬካቴꬃ፥ ጌንጩዋኔ ዳንዳያ ካꬋዪሻ? ፆሳይ ኔና ናጋራፔ ዛራናው ኮዪያ ዲራው፥ ኢ ኬካ ጊዲያዋ ኔኒ ኤራሳ።

⁵ ሺን ሂንቴንቶ ጉዙማ ዎዛናይኔ ናጋራፔ ሲሜና ዎዛናይ ዴዔ፤ ሄዋ ዲራው፥ ፆሳ ሃንቁኔ ፂሎ ፒርዳይ ቆንጪያ ጋላሲ፥ ኔኒ ኔ ቦላ ሃንቁዋ ካሴዋፔ ዳሪሳሳ።

⁶ ፆሳይ ኣሳ ኡባው ኣ ኦሱዋ ማላ ኢማናዋ።

⁷ ኢቲ ኢቲ ኣሳቱ ሎዖባ ዳንዳያን ኦꬂኖ፤ ቃሲ ጋላታ፥ ቦንቹዋኔ ባዬና ዴዑዋ ኮዪኖ፤ ኡንቱንቶ ፆሳይ ሜꬊና ዴዑዋ ኢማና።

⁸ ሺን ሃራንቱ ኢታባ ኦꬃናው ያሬቲኖኔ ቱማቴꬃ ኢፂኖ፤ ፆሳይ ኡንቱንቱ ቦላ ባሻኔ ሃንቁዋ ዬዳና።

⁹ ኢታባ ኦꬂያ ኣሳይ ኡባይ ሜቶታናኔ ዋዬታና፤ ሄዌ ካሴቲዴ፥ ኣዪሁዳ ኣሳ ጋካና፤ ሄዋፔ ቃሲ ኣዪሁዳ ጊዴና ኣሳ ጋካና።

¹⁰ ሺን ፆሳይ ሎዖ ኦሱዋ ኦꬂያ ኡባቶ ጋላታ፥ ቦንቹዋኔ ሳሮቴꬃ ኢማና። ካሴቲዴ ኣዪሁዳቶ ኢማና፤ ሄዋፔ ቃሲ ኣዪሁዳ ጊዴናዋንቶ ኢማና።

¹¹ ኣዪሲ ጎፔ፥ ፆሳ ኣዪፊያን ኣሳይ ኡባይ ኢቲ ማላ።

¹² ሙሴ ሂጊ ባይናን ናጋራ ኦꬄዳ ኡባይ ሂጊ ባይናን ꬋያና። ሙሴ ሂጊ ዴዒሺን፥ ናጋራ ኦꬄዳ ኡባይ ሂጊያን ፒርዴታና።

¹³ ኣዪሲ ጎፔ፥ ፆሳ ሲንꬃን ሂጊያ ናጊያዋንቱ ፂሊኖፔ ኣቲን፥ ሂጊያ ሲሲያዋንቱ ፂሊኪኖ።

¹⁴ ኣዪሁዳ ጊዴና ኣሳው ሂጊ ባዋ፤ ሺን ባሬንቱ ቲላ ቆፋን ሂጊ ኣዛዚያዋ ኦꬂኖ፤ ኡንቱንቶ ሂጊ ꬋዮፔካ፥ ኡንቱንቱ ባሬንቱ ሁጴው ሂጌ።

¹⁵ ሂጊ ኣዛዚያዌ ኡንቱንቱ ዎዛና ጊዶን ፃፌቴዳዋ ኡንቱንቱ ሃኖታይ ቤሴ፤ ኢቲ ኢቲ ካላ ኡንቱንቱ ቲላ ቆፋይ ኡንቱንቶ ማርካቲያ ዲራዉኔ ቃሲ ኢቲ ኢቲ ካላ ኡንቱንቱ ቆፋይ ኡንቱንታ ሞቲያ ዲራው፥ ዎይ ቃሲ ኡንቱንቱና ጋዳቲያ ዲራው፥ ሄዌ ቱማ ጊዲያዋ ኤሪሴ።

¹⁶ ታኒ ታማሪሴዳ ሚሺራቹዋ ቃላዳን፥ ኣሳ ዎዛናን ጌሜዳ ቆፋ ፆሳይ ዬሱሲ ኪሪስቶሳ ባጋና ሃዋዳን ፒርዳና።

¹⁷ ሺን ኔኒ ኔና ኣዪሁዳ ጋሳ፤ ሂጊያን ዜምፓዴ ፆሳን ጬቄታሳ።

¹⁸ ኔኒ ኦꬃና ማላ፥ ፆሳይ ኮዪያዌ ኣዬንቶ ኤራ፤ ቃሲ ቱማ ጊዲያዋ ዶራናው ሂጊያፔ ታማራዳ።

³ Neenoo, hawaa mala oosuwaa oothiyaawanttu bolla pirddiyaawoo, qassi he neeni pirddiyaawaa malaa oothiyaawoo, neeni Xoossaa pirddaappe attiyaawaa malatii?

⁴ Woy Xoossaa wolqqaama keekatethaa, genccuwaanne danddayaa kadhayishsha? Xoossay neena nagaraappe zaaranaw koyyiyaa diraw, I keeka gidiyaawaa neeni eraasa.

⁵ Shin hinttenttoo guzuma wozanaynne nagaraappe simmenna wozanay de7ee; hewaa diraw, Xoossaa hanqquunne xillo pirdday qoncciyaa gallassi, neeni ne bolla hanqquwaa kasewaappe darissaasa.

⁶ Xoossay asaa ubbaw A oosuwaa malaa immanawaa.

⁷ Itti itti asatuu lo77obaa danddayan oothiino; qassi galataa, bonchchuwaanne bayenna de7uwaa koyyiino; unttunttoo Xoossay medhinaa de7uwaa immana.

⁸ Shin haranttu iitabaa oothanaw yaaretiinonne tumatethaa ixxiino; Xoossay unttunttu bolla bashshaanne hanqquwaa yeddana.

⁹ Iitabaa oothiyaa asay ubbay metootananne waayyettana; hewe kasetiide, Ayihuda asaa gakkana; hewaappe qassi Ayihuda gidenna asaa gakkana.

¹⁰ Shin Xoossay lo77o oosuwaa oothiyaa ubbatoo galataa, bonchchuwaanne sarotethaa immana. Kasetiide Ayihudatoo immana; hewaappe qassi Ayihuda gidennawanttoo immana.

¹¹ Ayissi gooppe, Xoossaa Ayifiyan asay ubbay itti mala.

¹² Muse higgii baynnaan nagaraa ootheedda ubbay higgii baynnaan dhayana. Muse higgii de7ishshin, nagaraa ootheedda ubbay higgiyan pirddettana.

¹³ Ayissi gooppe, Xoossaa sinthan higgiyaa naagiyaawanttu xilliinoppe attin, higgiyaa sisiyaawanttu xillikkino.

¹⁴ Ayihuda gidenna asaw higgii baawa; shin barenttu tilla qofaan higgii azaziyaawaa oothiino; unttunttoo higgii dhayooppekka, unttunttu barenttu huuphew higge.

¹⁵ Higgii azaziyaawe unttunttu wozanaa giddon xaafetteeddawaa unttunttu hanotay bessee; itti itti kaalla unttunttu tilla qofay unttunttoo markkattiyaa dirawunne qassi itti itti kaalla unttunttu qofay unttuntta mootiyaa diraw, woy qassi unttunttunna gaaddatiyaa diraw, hewe tuma gidiyaawaa erissee.

¹⁶ Taani tamaarisseedda mishiraachchuwaa qaalaadan, asaa wozanaan geemmeedda qofaa Xoossay Yesuusi Kiristtoosa bagganna hawaadan pirddana.

¹⁷ Shin neeni neena Ayihuda gaasa; higgiyan zemppaade Xoossaan ceeqettaasa.

¹⁸ Neeni oothana mala, Xoossay koyyiyaawe ayentto eraa; qassi tuma gidiyaawaa dooranaw higgiyaappe tamaaraadda.