ሮሚያ 14:1-14 in Dawro

¹ ኣማኑዋን ኣዛሊያ ኡራ ሺሺ ኣኪቴ። ሺን ኢ ባሬ ሁጴው ቆፒያባን ኣናና ፓሉሜቶፒቴ።

² ኢቲ ኡራ ኣማኑ ኢ ኣያ ሚናኔ ዲጌና። ሺን ኣማኑዋን ኣዛሊያ ኡራይ ጋዴን ሞኬዳባ ፃላላ ሜ።

³ ኡባባ ሚያ ኡራይ ኡባባ ሜና ኡራ ካꬎፖ፤ ኡባባ ሜና ኡራይካ ኡባባ ሚያ ኡራ ቦላ ፒርዶፖ። ኣዪሲ ጎፔ፥ ፆሳይ ኣ ሺሺ ኣኬዳ።

⁴ ሃራ ኣሳ ቆማ ቦላ ፒርዲያዌ ኔኒ ኦኔ? ኢ ኩንዲና ዎይ ዴንዲና ባሬ ጎዳሳ፤ ሺን ጎዳይ ኣ ዴንꬃናው ዳንዳዪያ ዲራው፥ ኢ ኤቃና።

⁵ ኢቲ ኡራይ፥ «ሂቃ ጋላሳይ ሃራ ጋላሳቱዋፔ ኣꬌ» ያጊዴ ቆፒያ ዎዴ፥ ሃራይ፥ «ኡባ ጋላሳቱካ ኢቲ ማላ» ጊዴ ቆፔ። ኣሳይ ኡባይ ሁጲያን ሁጲያን ሄዋዳን ኣዪሲ ቆፒንቶ ኣኬኮ።

⁶ ኢቲ ጋላሳ ሃራ ጋላሳቱዋፔ ኣꬂዴ ቦንቺያ ኡራይ ጎዳ ቦንቾ ቦንቼ፤ ቁማ ሚያ ኡራይካ ጎዳ ቦንቾ ሜ። ኣዪሲ ጎፔ፥ ኢ ሄ ቁማ ዲራው፥ ፆሳ ጋላቴ። ቁማ ሜናዌካ ጎዳ ቦንቾ ሜናን ኣጌዳ፤ ቃሲ ፆሳ ጋላቴ።

⁷ ኣዪሲ ጎፔ፥ ኑፔ ኦኒኔ ባሬ ሁጴ ፃላላው ዴዔና፤ ቃሲ ኦኒኔ ባሬ ሁጴ ፃላላው ሃይቄና።

⁸ ኑኒ ፓፃ ዴዖፔ፥ ጎዳው ዴዔቶ፤ ቃሲ ሃይቆፔካ፥ ጎዳው ሃይቄቶ። ሲሚ ኑኒ ፓፃ ዴዖፔ ዎይ ሃይቆፔካ ጎዳሳ።

⁹ ሄዋ ዲራው፥ ኪሪስቶሲ ፓፃ ዴዒያዋንቶኔ ሃይቄዳዋንቶ ጎዳ ጊዳናው ሃይቂዴ፥ ሃይቁዋፔ ዴንዴዳ።

¹⁰ ያቲና፥ ኔኒ ኔ ኢሻ ቦላ ኣዪሲ ፒርዳይ? ዎይ ኔኒ ኔ ኢሻ ኣዪሲ ካꬋይ? ኑኒ ኡባይካ ፆሳ ፒርዳ ኦይዲያ ሲንꬃን ኤቃና።

¹¹ ኣዪሲ ጎፔ፥ ፆሳ ማፃፋይ፥ « ‹ታኒ ጎዳይ ታ ዴዑዋን ጫቃይ፤ ኣሳይ ኡባይ ታ ሲንꬃን ጉልባታና። ቃሲ ታኒ ፆሳ ጊዲያዋ ኣሳይ ኡባይ ማርካታና› ያጋይ» ያጌ።

¹² ሲሚ ኑኒ ሁጲያን ሁጲያን ኑባ ፆሳው ኦዳና።

¹³ ሄዋ ዲራው፥ ኑኒ ኢቱ ኢቱዋ ቦላ ፒርዲያዋ ሃዋፔ ሲንꬃው ኣኔ ኣጎይቴ። ሺን ኡባፔ ኣꬂዴ፥ ሂንቴ ኢሻ ꬉቢያባ ዎይ ናጋራን ኦሊያባ ኦꬄናዳን ቆፋ ቃቺቴ።

¹⁴ ታኒ ጎዳ ዬሱሲ ኪሪስቶሳና ዴዒያዋን፥ ባሬ ሁጴው ቱና ጊዲያባይ ባይናዋ ኤራይኔ ኣኬካይ። ሺን ኢቲ ኡራይ ኢቲባ ቱና ጊዴ ቆፖፔ፥ ሄዌ ኣው ቱና ጊዴ።

¹ Ammanuwan azalliya uraa shiishshi akkite. Shin I bare huuphew qoppiyaabaan aananna palumettoppite.

² Itti uraa ammanuu I ayaa miinanne diggenna. Shin ammanuwan azalliya uray gaden mokkeeddabaa xalalaa mee.

³ Ubbabaa miyaa uray ubbabaa meenna uraa kadhoppo; ubbabaa meenna uraykka ubbabaa miyaa uraa bolla pirddoppo. Ayissi gooppe, Xoossay A shiishshi akkeedda.

⁴ Hara asaa qoomaa bolla pirddiyaawe neeni oonee? I kunddina woy denddina bare Godaassa; shin Goday A denthanaw danddayiyaa diraw, I eqqana.

⁵ Itti uray, “Hiqqa gallassay hara gallassatuwappe aadhdhee” yaagiide qoppiyaa wode, haray, “Ubba gallassatuukka itti mala” giide qoppee. Asay ubbay huuphiyan huuphiyan hewaadan ayissi qoppintto akeeko.

⁶ Itti gallassaa hara gallassatuwappe aathiide bonchchiya uray Godaa bonchchoo bonchchee; qumaa miyaa uraykka Godaa bonchchoo mee. Ayissi gooppe, I he qumaa diraw, Xoossaa galatee. Qumaa meennawekka Godaa bonchchoo meennaan aggeedda; qassi Xoossaa galatee.

⁷ Ayissi gooppe, nuuppe ooninne bare huuphe xalalaw de7enna; qassi ooninne bare huuphe xalalaw hayqqenna.

⁸ Nuuni paxa de7ooppe, Godaw de7eetto; qassi hayqqooppekka, Godaw hayqqeetto. Simmi nuuni paxa de7ooppe woy hayqqooppekka Godaassa.

⁹ Hewaa diraw, Kiristtoosi paxa de7iyaawanttoonne hayqqeeddawanttoo Godaa gidanaw hayqqiide, hayquwaappe denddeedda.

¹⁰ Yaatina, neeni ne ishaa bolla ayissi pirdday? Woy neeni ne ishaa ayissi kadhay? Nuuni ubbaykka Xoossaa pirddaa oydiyaa sinthan eqqana.

¹¹ Ayissi gooppe, Xoossaa Maxaafay, “ ‘Taani Goday ta de7uwan caaqqay; asay ubbay ta sinthan gulbbatana. Qassi taani Xoossaa gidiyaawaa asay ubbay markkattana’ yaagay” yaagee.

¹² Simmi nuuni huuphiyan huuphiyan nubaa Xoossaw odana.

¹³ Hewaa diraw, nuuni ittu ittuwa bolla pirddiyaawaa hawaappe sinthaw ane aggoytte. Shin ubbaappe aathiide, hintte ishaa dhubbiyaabaa woy nagaraan oliyaabaa oothennaadan qofaa qachchite.

¹⁴ Taani Godaa Yesuusi Kiristtoosanna de7iyaawaan, bare huuphew tuna gidiyaabay baynnawaa eraynne akeekay. Shin itti uray ittibaa tuna giide qoppooppe, hewe aw tuna gidee.