ሮሚያ 12:1-13 in Dawro

¹ ሲሚ ታናዳን ኣማኒያዋንቶ፥ ሂንቴ ሂንቴ ኦናቴꬃ ፆሳ ናሼቺያ ዴዖኔ ጌሻ ያርሹዋ ኡዲዴ፥ ፆሳው ሺሻናዳን፥ ታኒ ሂንቴንታ ፆሳ ማሮቴꬃን ዎሳይ፤ ፆሳው ሂንቴ ጎዪናናው ቤሲያ ቱሙ ኦጊ ሄዋ።

² ፆሳይ ሂንቴ ቆፋ ኡባና ዱማዪዴ፥ ሂንቴንታ ላሞፔ ኣቲን፥ ሃ ኣላሚያ ኣሳ ማላቶፒቴ። ሄ ዎዴ ሂንቴ፥ ፆሳ ሼኒ፥ ሎዖባይ፥ ኣ ናሼቺያባይኔ ቃሲ ፖሎ ጊዴዳባይ ኣዬንቶ ኤራኒታ።

³ ፆሳይ ታው ኢሜዳ ኣꬎ ኬካቴꬃን ታኒ ሂንቴንቶ ኦዳይ። ሂንቴንቱ ቆፓናው ቤሲያዋፔ ኣꬂዴ፥ ኦቶሩዋን ቆፖፒቴ፤ ሄዋ ኣጊዴ፥ ዎዛናማ ኣሳዳን ቆፒቴ፤ ፆሳይ ሂንቴንቶ ሁጲያን ሁጲያን ኢሜዳ ኣማኑዋ ኬናን ሂንቴ ቦላ ፒርዲቴ።

⁴ ኑ ኢቲ ቦላ ጊዶን፥ ጮራ ቦላ ቆሞቱ ዴዒኖ፤ ሄ ቆሞቱዋ ኡባዉካ ዱማ ዱማ ኦሱ ዴዔ።

⁵ ሃዋዳን፥ ኑኒ ጮራ ኣሳ ጊዶፔካ፥ ኪሪስቶሳ ባጋና ኢቲ ኣሳ። ቃሲ ኑኒ ኢቲ ኣሳቴꬃ ቆሞቱዋዳን፥ ኢቱ ኢቱዋና ኦይቄቲ ኡቴዶ።

⁶ ፆሳይ ኑሲ ኢሜዳ ኣꬎ ኬካቴꬃን ዱማ ዱማ ኢሞታይ ዴዔ። ኑ ኢሞታይ ናቤቴꬃ ጊዶፔ፥ ኑሲ ዴዒያ ኣማኑዋ ኬና ኦዳናው ቤሴ።

⁷ ሃራቱዋ ማዱሳ ጊዶፔ፥ ሄ ኦሱዋን ሚናናው ቤሴ፤ ታማሪሱሳ ጊዶፔ፥ ሄ ታማሪሱዋን ሚናናው ቤሴ።

⁸ ሃራ ኣሳቱዋ ሚኒሱሳ ጊዶፔ፥ ሄ ኦሱዋን ሚናናው ቤሴ። ባሬ ሁጴው ዴዒያባፔ ሃራቱዋሲ ኢሚያ ኦኒኔ ዎዛናፔ ኢሞ። ማታይ ዴዒያ ኡራይ ሚኒሲ ኦꬃናው ቤሴ፤ ሃራቱዋሲ ኬኪያ ኡራይ ናሼቻን ኬካናው ቤሴ።

⁹ ሂንቴንቱ ሲቁ ኣሳ ቤሳናው ሲቄቲያዋ ጊዳናው ቤሴና። ኢታባ ኢፂቴ፤ ሎዖባ ሚኒሲዴ ኦይቂቴ።

¹⁰ ኢቱ ኢቱዋና ኢሻቱዋዳን ሲቄቲቴ፤ ኢቱ ኢቱዋ ቦንቺያዋን ናሼቲቴ።

¹¹ ሚኒዴ ኦꬂቴ፤ ኣዛሎፒቴ፤ ሂንቴ ኩሜንꬃ ዎዛናፔ ጎዳው ኦꬂቴ።

¹² ፆሳይ ሂንቴንቶ ኢማና ጌዳዋን ናሼቲቴ፤ ዋዪያን ጌንጪቴ። ኡባ ዎዴ ፆሳ ዎሲቴ፤

¹³ ፆሳ ኣሳቱዋ ኮሺያባን ማዲቴ፤ ኢማꬃ ሞኪቴ።

¹ Simmi taanaadan ammaniyaawanttoo, hintte hintte oonatethaa Xoossaa nashechchiyaa de7onne geeshsha yarshshuwaa udiide, Xoossaw shiishshanaadan, taani hinttentta Xoossaa maarotethaan woossay; Xoossaw hintte goyinnanaw bessiyaa tumu ogii hewaa.

² Xoossay hintte qofaa ubbanna dummayiide, hinttentta laammoppe attin, ha alamiyaa asaa malatoppite. He wode hintte, Xoossaa shenii, lo77obay, A nashechchiyaabaynne qassi polo gideeddabay ayentto eranita.

³ Xoossay taw immeedda aadho keekatethaan taani hinttenttoo oday. Hinttenttu qoppanaw bessiyaawaappe aathiide, otoruwan qoppoppite; hewaa aggiide, wozanaama asaadan qoppite; Xoossay hinttenttoo huuphiyan huuphiyan immeedda ammanuwaa keenan hintte bolla pirddite.

⁴ Nu itti bollaa giddon, cora bollaa qommotuu de7iino; he qommotuwaa ubbawukka dumma dumma oosuu de7ee.

⁵ Hawaadan, nuuni cora asaa gidooppekka, Kiristtoosa bagganna itti asa. Qassi nuuni itti asatethaa qommotuwaadan, ittu ittuwaanna oyqetti utteeddo.

⁶ Xoossay nuussi immeedda aadho keekatethaan dumma dumma imotay de7ee. Nu imotay nabetethaa gidooppe, nuussi de7iyaa ammanuwaa keenaa odanaw bessee.

⁷ Haratuwaa maddussaa gidooppe, he oosuwan minnanaw bessee; tamaarissussaa gidooppe, he tamaarissuwan minnanaw bessee.

⁸ Hara asatuwaa minissussaa gidooppe, he oosuwan minnanaw bessee. Bare huuphew de7iyaabaappe haratuwassi immiyaa ooninne wozanaappe immo. Maatay de7iyaa uray minissi oothanaw bessee; haratuwassi keekiyaa uray nashechchaan keekanaw bessee.

⁹ Hinttenttu siiquu asaa bessanaw siiqettiyaawaa gidanaw bessenna. Iitabaa ixxite; lo77obaa minissiide oyqqite.

¹⁰ Ittu ittuwaanna ishatuwaadan siiqettite; ittu ittuwaa bonchchiyaawan nashettite.

¹¹ Minniide oothite; azalloppite; hintte kumentha wozanaappe Godaw oothite.

¹² Xoossay hinttenttoo immana geeddawaan nashettite; waayyiyan genccite. Ubba wode Xoossaa woossite;

¹³ Xoossaa asatuwaa koshshiyaaban maaddite; imathaa mokkite.