ሮሚያ 11:12-34 in Dawro

¹² ሺን ኣዪሁዳቱ ናጋራ ኦꬄዳ ዲራው፥ ኣላሜው ዳሮ ኣንጁ ዬዳ፤ ቃሲ ኡንቱንቱ ኩንዴꬃይካ ኣዪሁዳ ጊዴና ኣሳው ዳሮ ኣንጁዋ ኣሄዳ። ያቲና፥ ኣዪሁዳቱ ኡባይ ጉጄቲያ ዎዴ፥ ኣንጁ ዎይሳ ኬና ዳራንዴሻ!

¹³ ሺን ታኒ ሃዒ ሂንቴንቶ፥ ኣዪሁዳ ጊዴና ኣሳው ሃሳያይ፤ ታኒ ኣዪሁዳ ጊዴና ኣሳው ዬሱሲ ኪቴዳዋ ጊዲያ ዲራው፥ ታ ኦሱዋ ቦንቻና።

¹⁴ ታኒ ታ ዛሬ ጊዲያ ኣሳቱዋ ቃናታንቻቱዋ ኡዶፔ፥ ኦኒ ኤሪ ኡንቱንቱፔ ኣማሬዳዋንታ ኣሼናን ኣጊኬ።

¹⁵ ኣዪሲ ጎፔ፥ ፆሳይ ኡንቱንታ ኢፄዳ ዎዴ፥ ሃ ኣላሚ ፆሳና ሲጌቴዳ። ያቲና ፆሳይ ኡንቱንታ ሺሺ ኣኪያ ዎዴ፥ ሃይቄዳዌ ዴዑዋ ዴማናፔ ኣቲን፥ ኣዬ ሃናኔ?

¹⁶ ኮይሮ ኣይፌ ባጋ ሙናቃይ ኣንጄቴዳዋ ጊዶፔ፥ ሙሜ ሙናቃይካ ቃሲ ኣንጄቴዳዋ ጊዳና፤ ኢቲ ሚꬃ ፃጱ ኣንጄቴዳዋ ጊዶፔ፥ ሃይꬃይ ኡባይካ ቃሲ ኣንጄቴዳዋ ጊዳና።

¹⁷ ሺን ዎራን ዶሌዳ ዎጋራ ሚꬃ ቃንካፔ ኢቱዋ ኢቱዋ ካሬዳሳን፥ ኔና ዎራን ዶሌዳ ዎጋራ ሚꬃ ማላ ሄ ዎጋራና ጋꬂ ቃቼዶ፤ ኔኒ ቃሲ ዛይቲ ኬሲያ ዎጋራ ሚꬃ ፃጱዋና ኢቲፔ ዴዓ።

¹⁸ ሲሚ ኔኒ ሄ ካሬቲ ዎꬌዳ ቃንካቱዋ ቦላን ኦቶሬታናው ቤሴና፤ ሺን ኔኒ ኦቶሬቲያዋ ጊዶፔካ፥ ፃጱ ኔና ቶኬፔ ኣቲን፥ ኔኒ ፃጱዋ ቶኬናዋ ኣኬካ።

¹⁹ ሄዋ ዲራው ኔኒ፥ «ኤ፤ ሺን ቃንካቱ ታኒ ኡንቱንቱ ሳዓን ጌላናዳን ካሬቴዲኖ» ያጋና።

²⁰ ሄዌ ቱማ፤ ኡንቱንቱ ኣማኒቤና ዲራው፥ ካሬቴዲኖ፤ ኔኒ ኣማኔዳ ዲራው፥ ሄ ሳዓን ኤቃዳ። ሺን ያያፔ ኣቲን፥ ኦቶሮ ቆፋ ቆፖፓ።

²¹ ኣዪሲ ጎፔ፥ ፆሳይ ሜꬌታ ቃንካ ማላቲያዋንቶ፥ ኣዪሁዳቶ ቃሬቲቤናዋ ጊዶፔ፥ ኔው ቃሬቲያዋ ማላቲ?

²² ሲሚ ፆሳ ኬካቴꬃኔ ፃላቴꬃ ቤዓ። ኩንዴዳዋንቶ ኢ ፃላ፤ ሺን ኔኒ ኣ ኬካቴꬃኒ ሚናዴ ዴዖፔ፥ ኢ ኔው ኬካ፤ ሄዌ ꬋዮፔ፥ ኔኒካ ቃሲ ካሬታና።

²³ ኣዪሁዳቱካ ቃሲ ኣማኔናን ኢፂያዋ ኣጎፔ፥ ፆሳይ ካሴ ኡንቱንቱ ዴዒያሳን ዛሪዴ ዎꬃና፤ ኣዪሲ ጎፔ፥ ኢ ኡንቱንታ ዛሪዴ ዎꬃናው ዳንዳዬ።

²⁴ ኣዪሲ ጎፔ፥ ፆሳይ ሂንቴንታ ዎራን ዴዒያ ኮይሮ ሜꬌታ ዎጋራ ሚꬃፔ ቃንፂዴ፥ ሂንቴንቱ ሜꬌታን ዎራን ዶሎዋንቱዳን ጊዴናን ጋዴን ቶኬዳ ዎጋራ ሚꬃና ጋꬂ ኦይꬄዳዋ ጊዶፔ፥ ያቲና፥ ሄ ካሬቲ ዎꬌዳ ኮይሮ ሜꬌታ ቃንካቱዋ ዛሬꬂዴ፥ ኡንቱንታ ኮይሮ ሜꬌታን ዶሌዳ ባሬንቱ ዎጋራ ሚꬃና ጋꬂ ቃቻናው፥ ኣ ኣዬ ፆናናዌ?

²⁵ ታናዳን ኣማኒያዋንቶ፥ ታኒ ሂንቴ ኤራናዳን ኮዪያ ቱሙ ፁራ ዬዉ ዴዔ፤ ሄዌ ሂንቴ ሂንቴንታ ሂንቴሬካ፥ ኑኒ ኣꬌዳ ኤራንቻ ያጊዴ ቆፒያዋ ዲጌ፤ ኢስራዔሊያ ኣሳፔ ባጋይ ሲሴናን ኢፄዳ፤ ሺን ሄ ሲሴናን ኢፂያዌ ኣዪሁዳ ጊዴና ኣሳ ኩሜንꬃ ፓይዱ ፆሳኮ ጋካናሲ ጋሚዓና።

²⁶ ሃዋዳንካ፥ ኢስራዔሊያ ኣሳይ ኡባይ ኣታና፤ ፆሳ ማፃፋይ ሃዋዳን ያጌ፤ «ኣሺያዌ ፂዮኔ ጌቴቲያ ካታማፔ ዪዴ፥ ናጋራ ኦሱዋ ኡባ ያዪቆባ ዛሪያፔ ዲጋና።

²⁷ ታኒ ኡንቱንቱ ናጋራ ኣቶ ያጊያ ዎዴ፥ ኡንቱንቱና ጌላና ቃላ ጫቁ ሃዋ» ያጌ።

²⁸ ኣዪሁዳ ጊዴና ኣሳቶ፥ ኣዪሁዳቱ ዎንጋላ ሚሺራቹዋ ባጋና ሂንቴ ዲራው፥ ፆሳና ሞርኬ፤ ሺን ፆሳ ዶሩዋ ባጋና ኣዋቱዋ ዲራው፥ ኡንቱንቱ ኢ ሲቂያዋንታ።

²⁹ ኣዪሲ ጎፔ፥ ፆሳይ ባሬ ኢሜዳዋ ጉዬ ኣኬና፤ ቃሲ ባሬ ፄሴዳዋ ኢፃዲ ጌና።

³⁰ ኣዪሁዳ ጊዴናዋንቶ፥ ፆሳው ሂንቴ ካሴና ኣዛዜቲቤይኪታ፤ ሺን ኣዪሁዳቱ ኣዛዜቴናን ኢፄዳ ዲራው፥ ፆሳ ማሮቴꬃ ሃዒ ሂንቴ ኣኬዲታ።

³¹ ሃዋዳን፥ ሂንቴ ኣኬዳ ማሮቴꬃ ዲራው፥ ኣዪሁዳቱ ቃሲ ፆሳ ማሮቴꬃ ሃዒ ኣካናዳን፥ ፆሳው ኣዛዜቴናን ኢፄዲኖ።

³² ኣዪሲ ጎፔ፥ ፆሳይ ኣሳ ኡባ ማራና ማላ፥ ኣሳይ ኡባይ ኣው ኣዛዜቴናን ኢፂያ ሃኖታን ቃቼዳ።

³³ ፆሳ ዱሬቴꬃይ ዎይሳ ኬና ዳሬ? ኣ ኣꬎ ኤራቴꬃይኔ ኣ ኤራቴꬃይ ዎይሳ ኬና ጪሜ? ኣ ፒርዳ ኦዳናዌ ኦኔ? ኢ ባሬ ኦꬂያዋ ኣዪሲ ኦꬂንቶ፥ ኦኔ ኣኬኪያዌ?

³⁴ ሄዋ ፆሳ ማፃፋይ፥ «ጎዳ ዎዛና ኤሪያዌ ኦኔ? ኣ ዞራናው ዳንዳዪያዌ ኦኔ?

¹² Shin Ayihudatuu nagaraa ootheedda diraw, alamew daro anjjuu yeedda; qassi unttunttu kunddethaykka Ayihuda gidenna asaw daro anjjuwaa aheedda. Yaatina, Ayihudatuu ubbay gujettiyaa wode, anjjuu woysa keena daranddeeshsha!

¹³ Shin taani ha77i hinttenttoo, Ayihuda gidenna asaw haasayay; taani Ayihuda gidenna asaw Yesuusi kiitteeddawaa gidiyaa diraw, ta oosuwaa bonchchana.

¹⁴ Taani ta zare gidiyaa asatuwaa qanatanchchatuwaa udooppe, ooni eri unttunttuppe amareeddawantta ashshennaan aggikke.

¹⁵ Ayissi gooppe, Xoossay unttuntta ixxeedda wode, ha alami Xoossaanna sigetteedda. Yaatina Xoossay unttuntta shiishshi akkiya wode, hayqqeeddawe de7uwaa demmanaappe attin, ayee hananee?

¹⁶ Koyro ayfe bagga munaqay anjjetteeddawaa gidooppe, muume munaqaykka qassi anjjetteeddawaa gidana; itti mithaa xaphuu anjjetteeddawaa gidooppe, haythay ubbaykka qassi anjjetteeddawaa gidana.

¹⁷ Shin woraan doleedda wogaraa mithaa qankkaappe ittuwaa ittuwaa kareeddasaan, neena woraan doleedda wogaraa mithaa malaa he wogaraanna gathi qachcheeddo; neeni qassi zaytii kesiyaa wogaraa mithaa xaphuwaanna ittippe de7aa.

¹⁸ Simmi neeni he karetti wodhdheedda qankkatuwaa bollan otorettanaw bessenna; shin neeni otorettiyaawaa gidooppekka, xaphuu neena tookkeeppe attin, neeni xaphuwaa tookkennawaa akeeka.

¹⁹ Hewaa diraw neeni, “E; shin qankkatuu taani unttunttu sa7aan gelanaadan karetteeddino” yaagana.

²⁰ Hewe tuma; unttunttu ammanibeenna diraw, karetteeddino; neeni ammaneedda diraw, he sa7aan eqqaadda. Shin yayyappe attin, otoro qofaa qoppoppa.

²¹ Ayissi gooppe, Xoossay medhetaa qankkaa malatiyaawanttoo, Ayihudatoo qarettibeennawaa gidooppe, new qarettiyaawaa malatii?

²² Simmi Xoossaa keekatethaanne xalatethaa be7a. Kunddeeddawanttoo I xalaa; shin neeni A keekatethaani minnaade de7ooppe, I new keeka; hewe dhayooppe, neenikka qassi karettana.

²³ Ayihudatuukka qassi ammanennaan ixxiyaawaa aggooppe, Xoossay kase unttunttu de7iyaasaan zaariide wothana; ayissi gooppe, I unttuntta zaariide wothanaw danddayee.

²⁴ Ayissi gooppe, Xoossay hinttentta woraan de7iyaa koyro medhetaa wogaraa mithaappe qanxxiide, hinttenttu medhetaan woraan dolowanttudan gidennaan gaden tokkeedda wogaraa mithaanna gathi oytheeddawaa gidooppe, yaatina, he karetti wodhdheedda koyro medhetaa qankkatuwaa zarethiide, unttuntta koyro medhetaan doleedda barenttu wogaraa mithaanna gathi qachchanaw, A ayee xoonanawe?

²⁵ Taanaadan ammaniyaawanttoo, taani hintte eranaadan koyyiyaa tumu xuuraa yewuu de7ee; hewe hintte hinttentta hinterekka, nuuni aadhdheedda eranchcha yaagiide qoppiyaawaa diggee; Israa7eeliyaa asaappe baggay sisennaan ixxeedda; shin he sisennaan ixxiyaawe Ayihuda gidenna asaa kumentha payduu Xoossaakko gakkanaassi gami77ana.

²⁶ Hawaadankka, Israa7eeliyaa asay ubbay attana; Xoossaa Maxaafay hawaadan yaagee; “Ashshiyaawe Xiyoone geetettiyaa katamaappe yiide, nagaraa oosuwaa ubbaa Yayiqooba zariyaappe diggana.

²⁷ Taani unttunttu nagaraa atto yaagiyaa wode, unttunttunna gelana qaalaa caaquu hawaa” yaagee.

²⁸ Ayihuda gidenna asatoo, Ayihudatuu wonggalaa mishiraachchuwaa bagganna hintte diraw, Xoossaanna morkke; shin Xoossaa dooruwaa bagganna aawatuwa diraw, unttunttu I siiqiyaawantta.

²⁹ Ayissi gooppe, Xoossay bare immeeddawaa guyye akkenna; qassi bare xeeseeddawaa ixxaaddi geenna.

³⁰ Ayihuda gidennawanttoo, Xoossaw hintte kasenna azazettibeykkita; shin Ayihudatuu azazettennan ixxeedda diraw, Xoossaa maarotethaa ha77i hintte akkeeddita.

³¹ Hawaadan, hintte akkeedda maarotethaa diraw, Ayihudatuu qassi Xoossaa maarotethaa ha77i akkanaadan, Xoossaw azazettennan ixxeeddino.

³² Ayissi gooppe, Xoossay asaa ubbaa maarana mala, asay ubbay aw azazettennan ixxiyaa hanotaan qachcheedda.

³³ Xoossaa duretethay woysa keena daree? A aadho eratethaynne A eratethay woysa keena ciimmee? A pirddaa odanawe oonee? I bare oothiyaawaa ayissi oothintto, oonee akeekiyaawee?

³⁴ Hewaa Xoossaa Maxaafay, “Godaa wozanaa eriyaawe oonee? A zoranaw danddayiyaawe oonee?