ሮሚያ 11:1-22 in Dawro

¹ ያቲና፥ ፆሳይ ባሬ ኣሳ ኢፄዴ ጋዴ ኦቾ? ሄዋ ጊዴና፤ ኣዪሲ ጎፔ፥ ታኒ ታ ሁጴው ኢስራዔሊያ ኣሳ፤ ኣብራሃሜ ዛሬ፤ ቢኒያማ ያራ።

² ፆሳይ ኮይሮ ዶሬዳ ባሬ ኣሳቱዋ ኢፄና፤ ፆሳ ማፃፋይ፥ ኤላሳ ታሪኪያ ጊዶን፥ ኤላሲ ኢስራዔላቱዋ ፆሳ ሲንꬃን ዎቲ ሞቲንቶ፥ ሂንቴ ኤሪታ።

³ «ጎዳው፥ ኡንቱንቱ ሄ ሱንꬃን ናባቱዋ ዎꬌዲኖ፤ ኔ ያርሺያሳካ ኮሌዲኖ። ያቲና፥ ታኒ ታ ፃላላይ ኣታዲ። ቃሲ ኡንቱንቱ ታናካ ዎꬋናው ኮዪኖ» ያጌዳ።

⁴ ፆሳይ ኣው ዋጊ ዛሬዴ? «ታኒ ኤቃ ባዓላው ጉልባቲቤና ላፑ ሻዓ ኣሳ ታው ኣሻዲ» ያጌዳ።

⁵ ሃዋዳንካ ቃሲ ሃ ዎዲያን፥ ፆሳይ ባሬ ኣꬎ ኬካቴꬃን ዶሬዳ ኣማሬዳ ኣሳቱ ዴዒኖ።

⁶ ሺን ኢ ባሬ ኣꬎ ኬካቴꬃን ዶሬዳፔ ኣቲን፥ ኡንቱንቱ ኦሱዋን ኡንቱንታ ዶሪቤና፤ ሄዌ ꬋዮፔ፥ ኣ ኣꬎ ኬካቴꬃይ ቱሙ ኣꬎ ኬካቴꬃ ጊዴና።

⁷ ያቲና፥ ኣዬ? ኢስራዔሊያ ኣሳቱ ባሬንቱ ኮዪያዋ ዴሚቤይኪኖ፤ ሺን ፆሳይ ዶሬዳ ኣማሬዳዋንቱ ዴሜዲኖ። ዮኮንቱ ዎዛናይ ሚኔዳ።

⁸ ሃዋዳንካ፥ ፆሳ ማፃፋይ፥ «ፆሳይ ኡንቱንቱ ባሬንቱ ኣይፊያን ቤዔናዳኒኔ ባሬንቱ ሃይꬃን ሲሴናዳን፥ ሃዋ ጋካናው ኡንቱንቶ ኣዛላ ኣያና ኢሜዳ» ያጌዳ።

⁹ ቃሲ ዳዊቴ ያጌዳ፤ «ኡንቱንቱ ሚያ ጋይታይ ኡንቱንታ ጲሪያዳን ኦይቆ፤ ኡንቱንታ ጉፋንꬆ፤ ኡንቱንቶ ኩሺያ ሺሪ ጪጎ።

¹⁰ ኡንቱንቱ ፄሌናዳን፥ ኡንቱንቱ ኣይፊ ጎዜቶ፤ ኡባ ዎዴ ባሬንቱ ሜቱዋን ቁኒዴ ዴዒኖ» ያጌዳ።

¹¹ ያቲና፥ ኣዪሁዳቱ ꬉቤቴዳ ዎዴ፥ ዴንዴናዳን ኩንዴዲኖ? ሄዋ ጊዴና፤ ኡንቱንቱ ናጋራ ኦꬄዳ ዲራው፥ ኣቶቴꬃይ ኡንቱንቱ ኣዪሁዳ ጊዴና ኣሳቱዋ ቃናታናዳን፥ ኣዪሁዳ ጊዴና ኣሳው ዬዳ።

¹² ሺን ኣዪሁዳቱ ናጋራ ኦꬄዳ ዲራው፥ ኣላሜው ዳሮ ኣንጁ ዬዳ፤ ቃሲ ኡንቱንቱ ኩንዴꬃይካ ኣዪሁዳ ጊዴና ኣሳው ዳሮ ኣንጁዋ ኣሄዳ። ያቲና፥ ኣዪሁዳቱ ኡባይ ጉጄቲያ ዎዴ፥ ኣንጁ ዎይሳ ኬና ዳራንዴሻ!

¹³ ሺን ታኒ ሃዒ ሂንቴንቶ፥ ኣዪሁዳ ጊዴና ኣሳው ሃሳያይ፤ ታኒ ኣዪሁዳ ጊዴና ኣሳው ዬሱሲ ኪቴዳዋ ጊዲያ ዲራው፥ ታ ኦሱዋ ቦንቻና።

¹⁴ ታኒ ታ ዛሬ ጊዲያ ኣሳቱዋ ቃናታንቻቱዋ ኡዶፔ፥ ኦኒ ኤሪ ኡንቱንቱፔ ኣማሬዳዋንታ ኣሼናን ኣጊኬ።

¹⁵ ኣዪሲ ጎፔ፥ ፆሳይ ኡንቱንታ ኢፄዳ ዎዴ፥ ሃ ኣላሚ ፆሳና ሲጌቴዳ። ያቲና ፆሳይ ኡንቱንታ ሺሺ ኣኪያ ዎዴ፥ ሃይቄዳዌ ዴዑዋ ዴማናፔ ኣቲን፥ ኣዬ ሃናኔ?

¹⁶ ኮይሮ ኣይፌ ባጋ ሙናቃይ ኣንጄቴዳዋ ጊዶፔ፥ ሙሜ ሙናቃይካ ቃሲ ኣንጄቴዳዋ ጊዳና፤ ኢቲ ሚꬃ ፃጱ ኣንጄቴዳዋ ጊዶፔ፥ ሃይꬃይ ኡባይካ ቃሲ ኣንጄቴዳዋ ጊዳና።

¹⁷ ሺን ዎራን ዶሌዳ ዎጋራ ሚꬃ ቃንካፔ ኢቱዋ ኢቱዋ ካሬዳሳን፥ ኔና ዎራን ዶሌዳ ዎጋራ ሚꬃ ማላ ሄ ዎጋራና ጋꬂ ቃቼዶ፤ ኔኒ ቃሲ ዛይቲ ኬሲያ ዎጋራ ሚꬃ ፃጱዋና ኢቲፔ ዴዓ።

¹⁸ ሲሚ ኔኒ ሄ ካሬቲ ዎꬌዳ ቃንካቱዋ ቦላን ኦቶሬታናው ቤሴና፤ ሺን ኔኒ ኦቶሬቲያዋ ጊዶፔካ፥ ፃጱ ኔና ቶኬፔ ኣቲን፥ ኔኒ ፃጱዋ ቶኬናዋ ኣኬካ።

¹⁹ ሄዋ ዲራው ኔኒ፥ «ኤ፤ ሺን ቃንካቱ ታኒ ኡንቱንቱ ሳዓን ጌላናዳን ካሬቴዲኖ» ያጋና።

²⁰ ሄዌ ቱማ፤ ኡንቱንቱ ኣማኒቤና ዲራው፥ ካሬቴዲኖ፤ ኔኒ ኣማኔዳ ዲራው፥ ሄ ሳዓን ኤቃዳ። ሺን ያያፔ ኣቲን፥ ኦቶሮ ቆፋ ቆፖፓ።

²¹ ኣዪሲ ጎፔ፥ ፆሳይ ሜꬌታ ቃንካ ማላቲያዋንቶ፥ ኣዪሁዳቶ ቃሬቲቤናዋ ጊዶፔ፥ ኔው ቃሬቲያዋ ማላቲ?

²² ሲሚ ፆሳ ኬካቴꬃኔ ፃላቴꬃ ቤዓ። ኩንዴዳዋንቶ ኢ ፃላ፤ ሺን ኔኒ ኣ ኬካቴꬃኒ ሚናዴ ዴዖፔ፥ ኢ ኔው ኬካ፤ ሄዌ ꬋዮፔ፥ ኔኒካ ቃሲ ካሬታና።

¹ Yaatina, Xoossay bare asaa ixxeedde gaade oochchoo? Hewaa gidenna; ayissi gooppe, taani ta huuphew Israa7eeliyaa asa; Abraahaame zare; Biiniyaama yaraa.

² Xoossay koyro dooreedda bare asatuwaa ixxenna; Xoossaa Maxaafay, Eelaasa taarikiyaa giddon, Eelaasi Israa7eelatuwaa Xoossaa sinthan wooti mootintto, hintte eriita.

³ “Godaw, unttunttu he sunthan nabatuwaa wodheeddino; ne yarshshiyaasaakka koleeddino. Yaatina, taani ta xalalay attaaddi. Qassi unttunttu taanakka wodhanaw koyyiino” yaageedda.

⁴ Xoossay aw waagi zaareeddee? “Taani Eeqaa Ba7aalaw gulbbatibeenna laappu sha77a asaa taw ashshaaddi” yaageedda.

⁵ Hawaadankka qassi ha wodiyaan, Xoossay bare aadho keekatethaan dooreedda amareedda asatuu de7iino.

⁶ Shin I bare aadho keekatethaan dooreeddappe attin, unttunttu oosuwan unttuntta dooribeenna; hewe dhayooppe, A aadho keekatethay tumu aadho keekatetha gidenna.

⁷ Yaatina, ayee? Israa7eeliyaa asatuu barenttu koyyiyaawaa demmibeykkino; shin Xoossay dooreedda amareeddawanttu demmeeddino. Yokkonttu wozanay minneedda.

⁸ Hawaadankka, Xoossaa Maxaafay, “Xoossay unttunttu barenttu ayfiyaan be7ennaadaaninne barenttu haythaan sisennaadan, hawaa gakkanaw unttunttoo azalla ayyaanaa immeedda” yaageedda.

⁹ Qassi Daawite yaageedda; “Unttunttu miyaa gaytay unttuntta phiriyaadan oyqqo; unttuntta guufantho; unttunttoo kushiyaa shiri ciggo.

¹⁰ Unttunttu xeellennaadan, unttunttu ayfii goozetto; ubba wode barenttu metuwan quunniide de7iino” yaageedda.

¹¹ Yaatina, Ayihudatuu dhubetteedda wode, denddennaadan kunddeeddino? Hewaa gidenna; unttunttu nagaraa ootheedda diraw, atotethay unttunttu Ayihuda gidenna asatuwaa qanaatanaadan, Ayihuda gidenna asaw yeedda.

¹² Shin Ayihudatuu nagaraa ootheedda diraw, alamew daro anjjuu yeedda; qassi unttunttu kunddethaykka Ayihuda gidenna asaw daro anjjuwaa aheedda. Yaatina, Ayihudatuu ubbay gujettiyaa wode, anjjuu woysa keena daranddeeshsha!

¹³ Shin taani ha77i hinttenttoo, Ayihuda gidenna asaw haasayay; taani Ayihuda gidenna asaw Yesuusi kiitteeddawaa gidiyaa diraw, ta oosuwaa bonchchana.

¹⁴ Taani ta zare gidiyaa asatuwaa qanatanchchatuwaa udooppe, ooni eri unttunttuppe amareeddawantta ashshennaan aggikke.

¹⁵ Ayissi gooppe, Xoossay unttuntta ixxeedda wode, ha alami Xoossaanna sigetteedda. Yaatina Xoossay unttuntta shiishshi akkiya wode, hayqqeeddawe de7uwaa demmanaappe attin, ayee hananee?

¹⁶ Koyro ayfe bagga munaqay anjjetteeddawaa gidooppe, muume munaqaykka qassi anjjetteeddawaa gidana; itti mithaa xaphuu anjjetteeddawaa gidooppe, haythay ubbaykka qassi anjjetteeddawaa gidana.

¹⁷ Shin woraan doleedda wogaraa mithaa qankkaappe ittuwaa ittuwaa kareeddasaan, neena woraan doleedda wogaraa mithaa malaa he wogaraanna gathi qachcheeddo; neeni qassi zaytii kesiyaa wogaraa mithaa xaphuwaanna ittippe de7aa.

¹⁸ Simmi neeni he karetti wodhdheedda qankkatuwaa bollan otorettanaw bessenna; shin neeni otorettiyaawaa gidooppekka, xaphuu neena tookkeeppe attin, neeni xaphuwaa tookkennawaa akeeka.

¹⁹ Hewaa diraw neeni, “E; shin qankkatuu taani unttunttu sa7aan gelanaadan karetteeddino” yaagana.

²⁰ Hewe tuma; unttunttu ammanibeenna diraw, karetteeddino; neeni ammaneedda diraw, he sa7aan eqqaadda. Shin yayyappe attin, otoro qofaa qoppoppa.

²¹ Ayissi gooppe, Xoossay medhetaa qankkaa malatiyaawanttoo, Ayihudatoo qarettibeennawaa gidooppe, new qarettiyaawaa malatii?

²² Simmi Xoossaa keekatethaanne xalatethaa be7a. Kunddeeddawanttoo I xalaa; shin neeni A keekatethaani minnaade de7ooppe, I new keeka; hewe dhayooppe, neenikka qassi karettana.