37 «ሓያጉዴ ናኣቶ''ይዳፓ ፔቴ''ታዖ ታ ሱ'ንፆና ቦንቺ ዔካሢ ታና ዔካኔ፤ ታና ዔካሢ ታና ሌሊቱዋንቴ ታና ዳኬሢያ ዔካኔ።»
38 ዮሓኒሴ ዬሱሴም፦ «ዔርዛሢዮ! ፔቴ'' ዓሲ ኔ ሱ'ንፆና ፑርታ ዓያና ኬሳ''ንቴ ኑ ዛጋዖ ዒዚ ኑኡና ዎላ''ቱዋኣሢሮ ዒዛ ኑኡኒ ላኣጌኔ» ጌዒ ኬኤዜኔ።
39 ዬሱሴ ማሓዖ፦ «ታ ሱ'ንፆና ዓኪ ዲቃሣ ባኣዚ'' ማዺ ማዺ ቤዞና ታ ዑፃ ፑርታ ጌስታንዳይ ባኣሢሮ ሓሹ''ዋቴ ላኣጊፖቴ፤
40 ዓይጎሮ ጌዔቶ ‹ኑና ዒፁዋኣሢ ቢያ ኑኡና ዎላ''ኬ› » ጌዔኔ።
41 ጎኔ ታ ዒንሢም ጋዓኔ፤ ዒንሢ ታኣሮ ማዔሢሮ ፔቴ'' ሙርሳና ዋኣሢ ዒንሢ ዑሻ ዓሢም ዋኣፆ ዑሼሢ ዛሎ''ሮ ዒንጊንታንዳ ባኣዚ'' ባይቃዓኬ።
42 ዬሱሴ ኬኤዛዖ፦ «ታና ጉሙርቃ፥ ሓንሢ ዻኮ''ንሢፓ ፔቴ''ማ ዻቢሳያ ዖና ማዔቶዋ ፑኡፒ ዎንሢ ሆላ'' ቱኪ'' ባዞ''ይዳ ኬኤሪንቴቶ ቃራኬ፤
43 ዬያሮ ኩጫ ኔና ዻቢሳቴ ቲቂ ኔኤፓ ኬኤሬ፤ ላምዖ ኩቺ ዓኣንቴ ጋኣናኣሜይዳ፥ ታሞ ባይቁዋኣሢዳ ኬኤሪንቲፃፓ ኩቺ ዱጴያ ማዒ ናንጎ ማኣሪ ጌሊፃ ቃራኬ።
44 ጋኣናኣሜ ጌይንታ ቤዛ ዒኢካ ዓኣ ዛኣላ'' ሓይቁዋያ፥ ታማኣ ባይቁዋ ቤሲኬ።
45 ቶካ'' ኔና ዻቢሳቴ ኔኤፓ ቲቂ ኬኤሬ፤ ላምዖ ቶኪ ቢያ ዓኣንቴ ጋኣናኣሜ ጌሊፃፓ ፔቴ'' ቶኪና ማዒ ናንጎ ማኣሪ ጌሊፃ ቃራኬ።
