ማርቆሳ 6:15-53 in Dawro

¹⁵ ሺን ሃራንቱ ኣ፥ «ሃዌ ኤላሳ» ያጌዲኖ። ሃራንቱ ቃሲ፥ «ሃዌ ቤኒ ዎዴ ናባቱዋ ማላቲያ ናቢያ» ያጌዲኖ።

¹⁶ ሺን ሄሮዲሴ ሄዋ ሲሴዳ ዎዴ፥ «ሄዌ ታኒ ቆꬊያ ሙጪሴዳ ፃማቂያ ዮሃኒሳ። ኢ ሃይቁዋፔ ፓፄዳ» ያጌዳ።

¹⁷ ኣዪሲ ጎፔ፥ ሄሮዲሴ ባሬ ኢሻ ፒሊጶሳ ማቻቶ ሄሮዲያዶ ኣኪ ዎꬄዳ፤ ሄሮዲሴ ኢዚ ዲራው፥ ባሬ ሁጴው ኣሳ ኪቲዴ፥ ዮሃኒሳ ኦይꬂዴ፥ ቃሺሲ ዎꬄዳ።

¹⁸ ኣዪሲ ጎፔ፥ ዮሃኒሲ ሄሮዲሳ፥ «ኔኒ ኔ ኢሻ ማቻቶ ኣካናው ቤሴና» ያጊ ዎꬄዳ።

¹⁹ ሄሮዲያዳ ዮሃኒሳው ኡሉዋን ሞርኪያ ኦይቃዴ ኣ ዎꬊሳናው ኮያዱ፤ ሺን ዳንዳያቤይኩ።

²⁰ ዮሃኒሲ ፂሎ ኣሳኔ ጌሻ ኣሳ ጊዴዳዋ ሄሮዲሴ ኤሬዳ ዲራው፥ ኣው ያዪዴ፥ ሎይꬂ ናጊ ዎꬄዳ፤ ዮሃኒሲ ጊያዋ ሲሲዴ፥ ባሬ ዎዛናን ዳሪሲ ሜቶቲዴካ ኣባ ናሼቻን ሲሴዳ።

²¹ ሄሮዲሴ ባሬ ዬሌቴዳ ጋላሲ፥ ጋዲያ ኣዪሲያዋንቶ፥ ሻላቃቱዋሲኔ ጋሊላን ዴዒያ ዎልቃማ ኣሳው ሾቢያ ጊጊሴዳ ዎዴ፥ ዉርሴꬃን ሄሮዲያዳ ኢንጄ ጋላሳ ዴማዱ።

²² ሄሮዲያዲ ናታ ኢማꬃ ሞኪያሳ ጌላ ዱራዴ፥ ሄሮዲሳኔ ኣ ኢማꬃቱዋ ናሼቻዱ፤ ሄዋፔ ጉዬ ካቲ ናቲው፥ «ኔና ሎዔዳዋ ኣያ ጊዶፔኔ ታና ኦቻ፤ ታኒ ኔው ኢማና» ያጌዳ።

²³ ቃሲ ኢዚው ዳሪ ጫቂዴ፥ «ኔኒ ኦቼዳዋ ኣያ ጊዶፔካ፥ ታኒ ኔው ኢማና፤ ሃራይ ኣቶ፥ ታ ካዉቴꬃፔ ባጋ ጊዶፔካ፥ ታኒ ኔው ኢማና» ያጌዳ።

²⁴ ናታ ካሬ ኬሳዴ ባሬ ዳዮ፥ «ኣያ ኢማ ጎ?» ያጋዴ ኦቻዱ። ኢ ዳያ፥ «ፃማቂያ ዮሃኒሳ ሁጲያ ኢማ ጋ» ያጋዱ።

²⁵ ናታ ኤሌካ ካቲያኮ ባዴ ኣ፥ «ፃማቂያ ዮሃኒሳ ሁጲያ ዎጪቲያን ዎꬃዴ፥ ኔኒ ሃዒ ታው ኢማናዳን ኮያይ» ያጋዱ።

²⁶ ሄዋፔ ጉዬ ካቲ ዳሪ ቃሬቴዳ፤ ሺን ባሬ ጫቁዋ ዲራዉኔ ባሬ ኢማꬃቱዋ ዲራው ኢዚው ጫቄዳ ጫቁዋ ኮላናው ኮዪቤና።

²⁷ ሄዋ ዲራው፥ ኤሌካ ናጊያዋ ኪቲዴ፥ ዮሃኒሳ ሁጲያ ኣሃና ማላ ኣዛዜዳ፤ ናጊያዌ ቃሾ ጎሌ ቢዴ፥ ዮሃኒሳ ቆꬊያ ሙጬዳ።

²⁸ ሄ ሙጬዳዋ ዎጪቲያን ዎꬂ ኣሂዴ፥ ናቲው ኢሜዳ፤ ናታ ቃሲ ባሬ ኣቲው ኢማዱ።

²⁹ ዮሃኒሳ ካሊያዋንቱ ሄዋ ሲሴዳ ዎዴ ዪዴ፥ ኣ ኣኃ ኣፊዴ ሞጌዲኖ።

³⁰ ዬሱሲ ኪቴዳዋንቱ ሲሚዴ፥ ዬሱሳና ጋኬቲዴ፥ ባሬንቱ ኦꬄዳባኔ ባሬንቱ ታማርሴዳባ ኡባ ዬሱሳሲ ኦዴዲኖ።

³¹ ቢያ ኣሳይኔ ዪያ ኣሳይ ዳሪና፥ ሃራይ ኣቶ ቁማ ማናዉካ ኡንቱንታ ጋꬄናን ኢፄዳ ዲራው፥ ዬሱሲ ኡንቱንታ፥ «ኑሬካ ጉꬃ ሼምፒ ኣካናው ኣሳይ ባይናሳ ቦይቴ» ያጌዳ።

³² ዬሱሲኔ ኡንቱንቱ ባሬንቱ ፃላላ ዎንጊሪያን ኡቲዴ፥ ኣሳይ ባይናሳ ቤዲኖ።

³³ ኡንቱንቱ ቢሺን፥ ጮራ ኣሳይ ኡንቱንታ ቤዒዴ ኤሬዳ፤ ካታማ ኡባፔ ጌዲያን ዎፂዴ፥ ኡንቱንቱ ቢያሳ ኡንቱንቱፔ ካሴቲዴ ጋኬዲኖ።

³⁴ ዬሱሲ ዎንጊሪያፔ ኬሲዴ፥ ጮራ ኣሳ ቤዔዳ፤ ኣሳይ ሄሚያ ኣሳይ ባይና ዶርሳ ማላ ጊዴዳ ዲራው፥ ቃሬቲዴ ኣሳ ዳሮባ ታማሪሱዋ ዶሜዳ።

³⁵ ሳዓይ ኦማርሲያ ዎዴ፥ ዬሱሳ ካሊያዋንቱ ኣኮ ዪዴ፥ «ሃዌ ሳዓይ ኣሳይ ባይና ሳዓ፤ ሃዒ ሳዓይካ ቃሚዲጌዳ፤

³⁶ ኣሳይ ሄራኔ ቄሪ ካታማቱዋ ጊዶ ቢዴ፥ ባሬንቶ ሚያባ ሻማና ማላ፥ ኣሳ ሞዪዛ» ያጌዲኖ።

³⁷ ሺን ዬሱሲ ዛሪዴ ኡንቱንታ፥ «ኣሳው ሚያባ ሂንቴ ኢሚቴ» ያጌዳ። ሄዋፔ ጉዬ ኡንቱንቱ፥ «ኑኒ ቢዴ፥ ላዑ ፄቱ ቢራ ሳንቲሚያ ቁማ ሻሚዴ፥ ኣሳይ ማናው ኢማኔ?» ያጊዴ ኣ ኦቼዲኖ።

³⁸ ዬሱሲ ኡንቱንታ፥ «ሂንቴንቶ ኣፑን ዳቡ ዴዒ? ቢዴ ቤዒቴ» ያጌዳ። ኡንቱንቱ ቤዒዴ፥ «ኢቼሹ ዳቡዋኔ ላዑ ሞሊያ» ያጌዲኖ።

³⁹ ዬሱሲ ባሬና ካሊያዋንታ ኣሳ ኡባ ጪታን ጪታን ሻኪ ሻኪዴ፥ ማታን ኡቲሳና ማላ ኣዛዜዳ።

⁴⁰ ኣሳይ ፄቱ ፄቱኔ ኢሻታሙ ኢሻታሙ ጪታን ጪታን ኡቴዲኖ።

⁴¹ ዬሱሲ ኢቼሹ ዳቡዋኔ ላዑ ሞሊያ ኦይቂዴ፥ ፑዴ ሳሉዋ ፄሊዴ፥ ፆሳ ጋላቴዳ፤ ዳቦቱዋ ሜንꬂዴ ኣሳው ጊሻና ማላ፥ ባሬና ካሊያዋንቱሲ ኢሜዳ፤ ቃሲ ላዑ ሞሊያካ ኡንቱንቱ ኡባው ሻኬዳ።

⁴² ኣሳይ ኡባይ ሚዴ ካሌዲኖ።

⁴³ ሄዋፔ ጉዬ ኣቴዳ ዳቦቱዋ ዶካይኔ ሞሊያ ዶካይ ታማኔ ላዑ ዛምቤሊያ ኩሜዳዋ ዬሱሳ ካሊያዋንቱ ዴንꬄዲኖ።

⁴⁴ ዳቡዋ ሜዳ ኣቱማ ኣሳይ ኢቼሹ ሻዓ።

⁴⁵ ኤሌካ ዬሱሲ ሄ ጮራ ኣሳ ሞዪዚዴ፥ ባሬና ካሊያዋንቱ ዎንጊሪያን ጌሊዴ፥ ኣባፔ ሄፊንꬃን ዴዒያ ቤቴሳይዳ ጊያ ካታማ ባሬፔ ሲንꬃቲዴ ባናዳን ኣዛዜዳ።

⁴⁶ ኡንቱንታ ሞዪዜዳዋፔ ጉዪያን፥ ፆሳ ዎሳናው ዞዚያ ኬሴዳ።

⁴⁷ ሳዓይ ቃሚያ ዎዴ ዎንጊሪ ዎምባ ጊዱዋን ዴዒሺን፥ ዬሱሲ ዎምባፔ ጋፃን ባሬካ ዴዔ።

⁴⁸ ጫርኩ ኣ ካሊያዋንቱኮ ጫርኪያ ዲራው፥ ባሬና ካሊያዋንታ ዎምባ ቤታይ ሜቶꬂያዋ ዬሱሲ ቤዒዴ፥ ኩቱ ዋሳና ሃኒያ ዎዴ ዎምባ ቦላን ሃሜቲዴ፥ ኡንቱንቱኮ ዬዳ፤ ኡንቱንታ ዬጊ ኣꬋናው ኮዬዳ።

⁴⁹ ሺን ዎምባ ቦላን ኢ ሃሜቲሺን፥ ኡንቱንቱ ኣ ቤዒዴ፥ ባሬንቶ ሞይቲሊያ ማላቲና ዋሴዲኖ።

⁵⁰ ኣዪሲ ጎፔ፥ ኡንቱንቱ ኡባይ ኣ ቤዒዴ፥ ያሻ ኮኮሬዲኖ፤ ሺን ኤሌካ ዬሱሲ ኡንቱንታ፥ «ኣይኔ ባዋ፤ ታናቴኔ ያዮፒቴ» ያጌዳ።

⁵¹ ዬሱሲ ኡንቱንቱና ኢቲፔ ዎንጊሪያን ጌሊና፥ ጫርኩ ዎፑ ጌዳ፤ ኡንቱንቱ ዳሮ ማላሌቴዲኖ።

⁵² ኣዪሲ ጎፔ፥ ኡንቱንቱ ዎዛናይ ጆሌዳ ዲራው፥ ኡንቱንቱ ኡኪꬃባ ኣኬኪቤይኪኖ።

⁵³ ኡንቱንቱ ኣባ ፒኒዴ፥ ጌንሳሬፃ ጊያ ቢታ ጋኬዲኖ፤ ያኒ ዎንጊሪያ ጋፃ ሺሺ ቃቼዲኖ።

¹⁵ Shin haranttu A, “Hawe Eelaasa” yaageeddino. Haranttu qassi, “Hawe beni wode nabatuwaa malatiyaa nabiyaa” yaageeddino.

¹⁶ Shin Heroodise hewaa siseedda wode, “Hewe taani qoodhiyaa muucisseedda xammaqiyaa Yohaannisa. I hayquwaappe paxeedda” yaageedda.

¹⁷ Ayissi gooppe, Heroodise bare ishaa Piliphphoosa machchatto Heroodiyaado akki wotheedda; Heroodise izi diraw, bare huuphew asaa kiittiide, Yohaannisa oythiide, qashissi wotheedda.

¹⁸ Ayissi gooppe, Yohaannisi Heroodisa, “Neeni ne ishaa machchatto akkanaw bessenna” yaagi wotheedda.

¹⁹ Heroodiyaada Yohaannisaw uluwaan morkkiyaa oyqqaade A wodhissanaw koyyaaddu; shin danddayabeykku.

²⁰ Yohaannisi xillo asanne geeshsha asaa gideeddawaa Heroodise ereedda diraw, aw yayyiide, loythi naagi wotheedda; Yohaannisi giyaawaa sisiide, bare wozanaan darissi metootiiddekka aabaa nashechchaan siseedda.

²¹ Heroodise bare yeletteedda gallassi, gadiyaa ayissiyaawanttoo, shaalaqatuwaassinne Galiilaan de7iyaa wolqqaama asaw shoobiyaa giigisseedda wode, wurssethaan Heroodiyaada injje gallassaa demmaaddu.

²² Heroodiyaadi naatta imathaa mokkiyaasaa gela duraade, Heroodisanne A imathatuwaa nashechchaaddu; Hewaappe guyye kaatii naattiw, “Neena lo77eeddawaa ayaa gidooppenne taana oochcha; taani new immana” yaageedda.

²³ Qassi iziw darii caaqqiide, “Neeni oochcheeddawaa ayaa gidooppekka, taani new immana; haray atto, ta kawutethaappe baggaa gidooppekka, taani new immana” yaageedda.

²⁴ Naatta kare kesaade bare daayo, “Ayaa imma goo?” yaagaade oochchaaddu. I daaya, “Xammaqiyaa Yohaannisa huuphiyaa imma ga” yaagaaddu.

²⁵ Naatta ellekka kaatiyaakko baade A, “Xammaqiyaa Yohaannisa huuphiyaa wociitiyaan wothaade, neeni ha77i taw immanaadan koyyay” yaagaaddu.

²⁶ Hewaappe guyye kaatii darii qaretteedda; shin bare caaquwaa dirawunne bare imathatuwaa diraw iziw caaqqeedda caaquwaa kolanaw koyyibeenna.

²⁷ Hewaa diraw, ellekka naagiyaawaa kiittiide, Yohaannisa huuphiyaa ahana mala azazeedda; naagiyaawe qasho golle biide, Yohaannisa qoodhiyaa muuceedda.

²⁸ He muuceeddawaa wociitiyaan wothi ahiide, naattiw immeedda; naatta qassi bare aattiw immaaddu.

²⁹ Yohaannisa kaalliyaawanttu hewaa siseedda wode yiide, A anhaa afiide moogeeddino.

³⁰ Yesuusi kiitteeddawanttu simmiide, Yesuusanna gakettiide, barenttu ootheeddabaanne barenttu tamaarsseeddabaa ubbaa Yesuusassi odeeddino.

³¹ Biya asaynne yiyaa asay darina, haray atto qumaa maanawukka unttuntta gathennaan ixxeedda diraw, Yesuusi unttuntta, “Nuurekka guuthaa shemppi akkanaw asay baynnasaa boytte” yaageedda.

³² Yesuusinne unttunttu barenttu xalalaa wonggiriyaan uttiide, asay baynnasaa beeddino.

³³ Unttunttu biishshin, cora asay unttuntta be7iide ereedda; katamaa ubbaappe gediyaan woxxiidde, unttunttu biyaasaa unttunttuppe kasetiide gakkeeddino.

³⁴ Yesuusi wonggiriyaappe kesiide, cora asaa be7eedda; asay heemmiyaa asay baynna dorssaa mala gideedda diraw, qarettiide asaa darobaa tamaarissuwaa doommeedda.

³⁵ Sa7ay omarssiyaa wode, Yesuusa kaalliyaawanttu aakko yiide, “Hawe sa7ay asay baynna sa7aa; ha77i sa7aykka qammidiggeedda;

³⁶ asay heeraanne qeeri katamatuwaa giddo biide, barenttoo miyaabaa shammana mala, asaa moyizza” yaageeddino.

³⁷ Shin Yesuusi zaariide unttuntta, “Asaw miyaabaa hintte immite” yaageedda. Hewaappe guyye unttunttu, “Nuuni biide, laa77u xeetu biraa santtimiyaa qumaa shammiide, asay maanaw immanee?” yaagiide A oochcheeddino.

³⁸ Yesuusi unttuntta, “Hinttenttoo aappun daabbuu de7ii? Biide be7ite” yaageedda. Unttunttu be7iide, “Ichcheshu daabbuwaanne laa77u moliyaa” yaageeddino.

³⁹ Yesuusi barena kaalliyaawantta asaa ubbaa citan citan shaakki shaakkiide, maataan utissana mala azazeedda.

⁴⁰ Asay xeetuu xeetuunne ishatamuu ishatamuu citan citan utteeddino.

⁴¹ Yesuusi ichcheshu daabbuwaanne laa77u moliyaa oyqqiide, pude saluwaa xeelliide, Xoossaa galateedda; daabbotuwaa menthiide asaw gishana mala, barena kaalliyaawanttussi immeedda; qassi laa77u moliyaakka unttunttu ubbaw shaakkeedda.

⁴² Asay ubbay miide kalleeddino.

⁴³ Hewaappe guyye atteedda daabbotuwaa dokkaynne moliyaa dokkay tammanne laa77u zambbeeliyaa kumeeddawaa Yesuusa kaalliyaawanttu dentheeddino.

⁴⁴ Daabbuwaa meedda attuma asay ichcheshu sha77a.

⁴⁵ Ellekka Yesuusi he cora asaa moyizziide, barena kaalliyaawanttu wonggiriyaan geliide, abbaappe hefinthan de7iyaa Beetesayda giyaa katamaa bareppe sinthatiide baanaadan azazeedda.

⁴⁶ Unttuntta moyizzeeddawaappe guyyiyan, Xoossaa woossanaw zooziyaa keseedda.

⁴⁷ Sa7ay qammiyaa wode wonggirii wombbaa gidduwan de7ishshin, Yesuusi wombbaappe gaxaan barekka de7ee.

⁴⁸ Carkkuu A kaalliyaawanttukko carkkiyaa diraw, barena kaalliyaawantta wombbaa beetay metoothiyaawaa Yesuusi be7iide, kuttuu waassana haniyaa wode wombbaa bollan hamettiidde, unttunttukko yeedda; unttuntta yeggi aadhdhanaw koyyeedda.

⁴⁹ Shin wombbaa bollan I hamettishshin, unttunttu A be7iide, barenttoo moytilliyaa malatina waasseeddino.

⁵⁰ Ayissi gooppe, unttunttu ubbay A be7iide, yashshaa kokkoreeddino; shin ellekka Yesuusi unttuntta, “Aynne baawa; taanattennee yayyoppite” yaageedda.

⁵¹ Yesuusi unttunttunna ittippe wonggiriyaan gelina, carkkuu woppu geedda; unttunttu daro maalaletteeddino.

⁵² Ayissi gooppe, unttunttu wozanay jolleedda diraw, unttunttu ukithaabaa akeekibeykkino.

⁵³ Unttunttu abbaa pinniide, Gensaareexa giyaa biittaa gakkeeddino; yaani wongiriyaa gaxaa shiishshi qachcheeddino.