4 ዬይ ያዺ ማዔሢ ፆኦሲ ማሊፆ ኬኤዛ ዒሲያሴ ዮሓኒሴ ዛሎ'' ቤርታዺ፦ «ሃይ ዓሲ ናንጉዋ ዳውሎ''ይዳ ሂዚ ጌዒ ጌዒ ዒላታ ዓሲኮ ዑኡሲኬ፤ ‹ጎዳኮ ጎይፆ ጊኢጊሹዋቴ፤ ሉኡጎ ጎይፆዋ ፒዚሱዋቴ፤
5 ዶኦጫዻ ቤዛ ቢያ ኩሞንጎ፤ ዹኮ''ና ጌሜሮና ቢያ ሂርኪ ጎዖንጎ፤ ዎቦ ጎይፃኣ ፒኮንጎ፤ ጊኢጊ ኮሺ''ንቲባኣ ጎይፃኣ ጊኢጎንጎ፤
6 ዓሲ ቢያ ፆኦሲኮ ዻቂሻ ዎልቆ ዛጎንጎ!› » ሂዚ ጌዒ ፃኣፒንቴ ጎይፆናኬ።
7 ዋኣፆና ማስቶሮ ዒዛ ኮይላ'' ሙካ ዓሶም ዮሓኒሴ፦ «ዒንሢ ሓይ ሾኦዣ! ሙካንዳ ፆኦዛሢኮ ጎሪ''ንቶይዳፓ ቶላ''ኒ ዒንሢ ዳንዳዓንዳጉዲ ዖኦኒ ዒንሢም ኬኤዜይ?
8 ዓካሪ ሃሢ ጎሞ ዒንሢኮ ቡኡፂፆ ዔርዛ ማዾ ማዻንዳኣፓዓቴም ‹ኑኡኒ ዓብራሃሜ ናኣቶ''ኬ› ጌዒ ዒንሢ ዒኖና ሄርሺንቲፖቴ። ፆኦሲ ሃያ ሹጫፓ ዓብራሃሜ ናይ ማሂ ዔቂሳኒ ዳንዳዓያ ማዔሢ ታ ዒንሢም ኬኤዛኔ።
9 ሃሢ ሚፆ ፃጳፓ ቲቂ ኬኤራኒ ሄርጋ ጊኢጊንቴሢሮ ቃራ ዓኣፒ ዓኣፑዋ ሚሢ ቢያ ቲቂንቲ ታሚዳ ኬኤሪንታንዳኔ» ጌዔኔ።
10 ዴራ'' ማሃዖ፦ «ሂዴቶ ኑ ዓይጎ ማዾንዶይ?» ጌይ ዮሓኒሴ ኮራ ዖኦጬኔ።
11 ዒዚያ፦ «ላምዖ ማኣዓ ዓኣሢ ፔቴ''ማ ባኣሢም ዒንጎንጎ፤ ሙኡዚ'' ዓኣሢያ ባኣሢም ጊሽኮንጎ» ጌዔኔ።
12 ኮርሞ ኮርማ ዓሶይዳፓ ሚኢሾ ቡኩሲ ማዻዞንሢያ ማስቲፆሮ ዒዛ ኮይላ'' ሙካዖ፦ «ዔርዛሢዮ! ኑኡኒሾ፥ ዓይጎ ማዾንዶይ?» ጌይ ዒዛ ዖኦጬኔ።
13 ዒዚያ፦ «ዎጎና ዓይሢንቴሢፓ ዑሣ ዓኣሢ ዔካኒ ዖኦጪፖቴ» ጌዔኔ።
14 ሃሣ ፖኦሊሳ ሙካዖ፦ «ኑኡኒሾ፥ ዓይጎ ማዾንዶይ?» ጌዔኔ። ዒዚ፦ «ዓሲ ሚኢሼ ጌኔና ቡሪ ዔኪፖቴ፤ ዖና ማዔቶዋ ሉኡቂ ዎጌና ዓይሢሲፖቴ፤ ዒንሢ ማዼሢ ዛሎ'' ዒንጎ ሚኢሻ ዒንሢም ጊዶንጎ» ጌዔኔ።
