14 ዔያታ ዬያ ማዔ ባኮ ቢያ ዛሎ'' ዎላ'' ጌስቲ ጌስቲ ዓኣዻኔ፤
15 ዬያ ዔያታ ኬኤዚ ጌስታ ዎዶ''ና ዬሱሴ ፔ ቶኦኪና ሙኪ ዔያቶና ዎላ'' ዓኣዻኔ።
16 ጋዓንቴ ዔያታ ፔ ዓኣፖና ዒዛ ዛጋያታዖ ዖና ማዔቶዋ ዔራኒ ዳንዳዒባኣሴ።
17 ዒዚ፦ «ዒንሢ ሃይ ጌስቲ ጌስቲ ዓኣዻሢ፥ ዬይ ዓይጎ ባኣዚ''ዳይ?» ዔያቶ ኮራ ጌዔኔ። ዔያታ ዒማ''ና ኮሺ'' ዖያዖ ዓኣ ቤዛ ዔቄኔ።
18 ዔያቶይዳፓ ፔቴ'' ቄሌዮጳ ጌይንታሢ፦ «ኔኤኒ ዬሩሳላሜ ካታሞይዳ ዓኣዖ ሃሢ ቢሪ ማዺንቴ ባኮ ቢያ ዔሩዋዖ ሾኦቺ ማዒ ዓቴሢ ኔና ሌሊዳ?» ጌዔኔ።
19 ዬሱሴ ማሃዖ፦ «ዬይ ዓይጌንዴዳይ?» ጋዓዛ፥ ዔያታ «ናዚሬቶ ዓጮ'' ዓሢ፥ ዬሱሴ ዑፃ ማዔ ባኮሾ! ዒዚያ ፆኦሲና ዓሲና ቢያ ቤርታ ኬኤዛ ባኮና ማዾና ዶዲ ማዔ ፆኦሲ ማሊሢ ኬኤዛያኬ።
20 ቄኤሶኮ ሱኡጎና ኑና ዎይሣ ዔርቴ ዓሳ ሃይቃንዳጉዲ ዒዛይዳ ዎጌስካፓ ዒዛ ሱፄኔ።
