ሉቃሳ 2:4-41 in Gofa

⁴ ዮሴፊካ ዳዊቴ ኬꬃፌኔ ያራፔ ጊዲዳ ጊሾ ጋሊላ ናዚሬቴ ካታማፔ ዴንዲዲ ዳዊቴ ካታማ ጊዲዳ ዪሁዳ ቤቴሌሜ ቢስ።

⁵ ቢሼ፥ ዬላናው ዎዴይ ዉሪዳ ኢ ኦይቺ ዎꬂዳ፥ ማይራሚራ ዎላ ፃፌታናው ቢስ።

⁶ ኤንቲ ያን ዴዒሺን ኢው ዬሎ ዎዴይ ጋኪስ።

⁷ ባ ባይራ ናዓ ዬላሱ። ጩርቃራ ፃፃዳ ኢማꬂ ኣቂያሶን ቤሲ ꬋዪዳ ጊሾ ዳራን ሜሄ ሙዚያ ጎንጌን ዚንዒሳሱ።

⁸ ሄ ጋዲያን ቃማ ዶርሳ ዉዲያ ናጊሼ ካሬን ኣቂያ ሄንꬃንቾቲ ዴዖሶና።

⁹ ጎዳ ኪታንቾይ ሃሳዮና ዪዲ ኤንታ ማታን ኤቂስ። ጎዳ ቦንቾይ ኤንታ ዩሹዋን ፖዒስ፤ ኤንቲካ ዎልቃማ ያሺ ያዪዶሶና።

¹⁰ ሺን ኪታንቾይ፥ «ያዮፊቴ! ሄኮ፥ ኣሳ ኡባስ ጊዲያ ጊታ ኡፋይሳ ሚሺራቹዋ ኤካዳ ያስ።

¹¹ ሄሲካ፥ ዳዊቴ ካታማን ኣሼይሲ ሂንቴው ሃቺ ዬሌቲስ። ኢ ጎዳ ኪሪስቶሳ።

¹² ዞቃሌ ናዓይ ጩርቃራ ፃፄቲዲ ጎንጌን ዚንዒዳይሳ ሂንቴ ዴማና፤ ሄሲካ ሂንቴው ማላ ጊዶ» ያጊስ።

¹³ ቆፖና ዳሮ ሳሎ ኪታንቾቲ ኪታንቹዉራ ኢሲፌ ቆንጪዲ፥

¹⁴ «ቦንቾይ ፆሳስ ꬎቃ ሳሉዋን፥ ሳሮይ ቢታ ቦላ ፆሳይ ዶሲያ ኣሳስ ጊዶ» ያጊዲ ጋላቲዶሶና።

¹⁵ ኪታንቾቲ ኤንታፌ ሻኬቲዲ ሳሉዋ ኬዪዳፔ ጉዬ ሄንꬃንቾቲ፥ «ኣኔ ጎዳይ ኑስ ቆንጪሲዳባኔ ሃኒዳባ ቤዓናው ቤቴሌሜ ቦስ» ያጊዶሶና።

¹⁶ ኤንቲካ ኤሌሲዲ ቢዶሶና። ማይራሞ፥ ዮሴፋኔ ዞቃሌ ናዓ ጎንጌን ዚንዒዳይሳ ቤዒዶሶና።

¹⁷ ቤዒ ሲሚዲ ናዓባ ኤንታው ኦዴቶይሳ፥ ቆንጪሲዲ ሄ ቤሳን ዴዒያ ኣሳስ ማርካቲዶሶና።

¹⁸ ሄሳ ሲዒዳ ኡባይ ሄንꬃንቾቲ ኦዲዳይሳን ማላሌቲዶሶና።

¹⁹ ማይራማ ሃኒዳባ ኡባ ባ ዎዛናን ቆፓሼ ዴዓሱ።

²⁰ ሄንꬃንቾቲ ኤንታው ኦዴቲዳይሳዳ ሃኒን ቤዒዶሶና። ሄሳ ጊሾ፥ ባንታ ሲዒዳባሲኔ ቤዒዳባ ኡባስ ፆሳ ቦንቺሼኔ ጋላቲሼ ሲሚዶሶና።

²¹ ሆስፑንꬃ ቃማን፥ ቃፃሮ ዎዴይ ጋኪን፥ ኢ ቃንꬃታናፔ ሲንꬄ ኪታንቾይ ዎꬂዳ ሱንꬃን ዬሱሳ ጌቴቲስ።

²² ሙሴ ዎጋ ሜላ ኤንታ ጌሻቴꬃ ዎዴይ ፖሌቲዳፔ ጉዬ ዮሴፋራኔ ማይራሚራ ዮጋ ናዓ ባንታ ጎዳስ ኢማናው ዬሩሳላሜ ቢዶሶና።

²³ ሄሲካ፥ ጎዳ ዎጋን፥ «ኣዴ ጊዲዳ ባይራ ናዒ ኡባይ ጎዳስ ዱማቲዳይሳ ጊዶ» ጌቴቲዲ ፃፌቲዳይሳ ፖላናሳ።

²⁴ ቃሲ ጎዳ ዎጋን፥ ናምዑ ኩራቾ ዎይኮ ሆሌ ያርሻናው ኤፊዶሶና።

²⁵ ሄ ዎዴ ጌሺኔ ኣማኖራ ሚኖ ጊዲዳ ሲሞና ጌቴቲያ ኣሲ ዬሩሳላሜን ዴዔስ። ኢ ኢስራዔሌታ ኣቶቴꬃ ናጊሼ ዴዔስ። ጌሻ ኣያናይካ ኢያ ቦላ ዴዔስ።

²⁶ ቃሲ ኪሪስቶሳ ቤዖና ሃይቆናይሳ ጌሻ ኣያናይ ኢያው ቆንጪሲን ኤሪዲ ዴዔስ።

²⁷ ኢ ሄ ጋላስ ኣያናይ ካሌꬂን ፆሳ ኬꬂ ቢስ። ናዓ ኣዬራኔ ኣዋራ ዎጋ ፖላናው ዮጋ ናዓ ዬሱሳ ኤኪዲ ጌሊዳ ዎዴ

²⁸ ሲሞኒ ሞኪ ኤኪዲ ናዓ ኢዲሚዲ፥

²⁹ «ጎዳው ኔ ታው ጌሊዳ ቃላ ሜላ፥ ሃዒ ኔ ኣይሊያ ሳሮን ሞይዛ።

³⁰ ታ ኣይፌይ ኣሳ ኡባ ሲንꬃን ኔ ጊጊሲዳ፥

³¹ ኔ ኣሹዋ ቤዒስ።

³² ሄሲካ ካዎቴꬃታ ኡባስ፥ ፆሳ ኦጊያ ቆንጪሲያ ፖዖ፥ ኔ ኣሳ ኢስራዔሌስካ ቦንቾ» ያጊዲ ፆሳ ጋላቲስ።

³³ ዮሴፋራኔ ማይራሚራ ኢያው ኦዴቲዳባን ማላሌቲዶሶና።

³⁴ ሲሞኒ ኤንታ ኣንጂስ። ኣዬ ማይራሚኮ፥ «ሄኮ ዳሮ ኣሳ ዎዛና ቆፋይ ቆንጫና ሜላ፥ ኢስራዔሌን ዴዒያ ዳሮታስ ኤንታ ኩንዴꬃሲኔ ዴንዱዋስ ፆሳን ዶሬቲስ።

³⁵ ቃሲ ኤቄቴይሳታስ ማላ ጊዳና። ኔ ሼምፑዋራካ ቃሲ ማሺ ኣꬋና» ያጊስ።

³⁶ ቃሲ ኣሴሬ ያራፔ ጊዲዳ ፋኑዔላ ናዒያ ሃና ጌቴቲያ ናቤይ ዴዓዉሱ። ኢያ ዳሮ ጪማሱ፤ ኢያ ባ ኮይሮ ኣዚናራ ላፑን ላይꬂ ዴዓሱ።

³⁷ ኢ ኣዚናይ ሃይቂን ሆስፑን ታማኔ ኦይዱ ላይꬂ ጊዳና ጋካናው ቃማኔ ጋላስ ፓጬይ ባይና ዎሳኒኔ ፆማን ፆሳ ኬꬃን ሃጋዛሱ።

³⁸ ኢያ ሄ ሳቲያን ባዳ ፆሳ ጋላታሱ፤ ዬሩሳላሜ ዎዜቴꬃ ናጊያ ኡባስ ዮጋ ናዓባ ማርካታሱ።

³⁹ ዮሴፋራኔ ማይራሚራ ጎዳ ሂጊያን ኪቴቲዳ ዎጋ ኡባ ፖሊዳፔ ጉዬ ጋሊላ ቢታን ዴዒያ ባንታ ካታማ ናዚሬቴ ሲሚዶሶና።

⁴⁰ ናዓይ ዲጪሼኔ ሚኒሼ ቢስ። ጪንጫቴꬃን ኩሚስ፤ ፆሳ ኣꬎ ኬሃቴꬃይ ኢያ ቦላ ዴዔስ።

⁴¹ ዮሴፋራኔ ማይራሚራ ፋሲካ ባሌ ቦንቻናው ላይꬃን ላይꬃን ዬሩሳላሜ ቦሶና።

⁴ Yoosefikka Dawite keethaafenne yaraappe gidida gisho Galiila Naazirete katamaappe denddidi Dawite katama gidida Yihuda Beeteleme bis.

⁵ Bishe, yelanaw wodey wurida I oychchi wothida, Mayraamira wolla xaafettanaw bis.

⁶ Entti yan de7ishin iw yelo wodey gakkis.

⁷ Ba bayra na7aa yelasu. Curqqara xaaxada imathi aqiyason bessi dhayida gisho daran mehe muziya gonggen zin77isasu.

⁸ He gadiyan qamma dorssa wudiya naagishe karen aqiya henthanchchoti de7oosona.

⁹ Godaa kiitanchchoy hassayonna yidi entta matan eqqis. Godaa bonchchoy entta yuushuwan poo7is; enttika wolqqaama yashshi yayyidosona.

¹⁰ Shin kiitanchchoy, “Yayyofite! Hekko, asaa ubbaas gidiya gita ufayssaa mishirachchuwa ekkada yas.

¹¹ Hessika, Dawite kataman ashsheyssi hinttew hachchi yelettis. I Godaa Kiristtoosa.

¹² Zoqale na7ay curqqara xaaxettidi gonggen zin77idayssa hintte demmana; hessika hinttew malla gido” yaagis.

¹³ Qopponna daro salo kiitanchchoti kiitanchchuwura issife qonccidi,

¹⁴ “Bonchchoy Xoossaas dhoqqa saluwan, saroy biitta bolla Xoossay dosiya asaas gido” yaagidi galatidosona.

¹⁵ Kiitanchchoti enttafe shaakettidi saluwa keyidaappe guye henthanchchoti, “Ane Goday nuus qonccisidabaanne hanidabaa be7anaw Beeteleme boos” yaagidosona.

¹⁶ Enttika ellesidi bidosona. Mayraamo, Yoosefanne zoqale na7aa gonggen zin77idayssa be7idosona.

¹⁷ Be7i simmidi na7abaa enttaw odettoyssa, qonccisidi he bessan de7iya asaas markkattidosona.

¹⁸ Hessa si7ida ubbay henthanchchoti odidayssan malaalettidosona.

¹⁹ Mayraama hanidabaa ubbaa ba wozanan qoppashe de7asu.

²⁰ Henthanchchoti enttaw odettidayssada hanin be7idosona. Hessa gisho, bantta si7idabaasinne be7idaba ubbaas Xoossaa bonchchishenne galatishe simmidosona.

²¹ Hosppuntha qamman, qaxxaro wodey gakkin, I qanthatanaappe sinthe kiitanchchoy wothida sunthan Yesuusa geetettis.

²² Muse woga mela entta geeshshatetha wodey polettidaappe guye Yoosefaranne Mayraamira yooga na7aa bantta Godaas immanaw Yerusalaame bidosona.

²³ Hessika, Godaa wogan, “Adde gidida bayra na7i ubbay Godaas dummattidayssa gido” geetettidi xaafettidayssa polanaassa.

²⁴ Qassi Godaa wogan, nam77u kuraachcho woykko holle yarshshanaw efidosona.

²⁵ He wode geeshshinne ammanora mino gidida Simoona geetettiya asi Yerusalaamen de7ees. I Isra7eeleta atotethaa naagishe de7ees. Geeshsha Ayyaanaykka iya bolla de7ees.

²⁶ Qassi Kiristtoosa be7onna hayqqonnayssa Geeshsha Ayyaanay iyaw qonccisin eridi de7ees.

²⁷ I he gallas Ayyaanay kaalethin Xoossa Keethi bis. Na7aa aayeranne aawara wogaa polanaw yooga na7aa Yesuusa ekkidi gelida wode

²⁸ Simooni mokki ekkidi na7aa idimmidi,

²⁹ “Godaw ne taw gelida qaala mela, ha77i ne aylliya saron moyza.

³⁰ Ta ayfey asaa ubbaa sinthan ne giigisida,

³¹ ne ashuwa be7is.

³² Hessika kawotethata ubbaas, Xoossaa ogiya qonccisiya poo7o, ne asaa Isra7eeleskka bonchcho” yaagidi Xoossaa galatis.

³³ Yoosefaranne Mayraamira iyaw odettidaban malaalettidosona.

³⁴ Simooni entta anjjis. Aaye Mayraamikko, “Hekko daro asaa wozanaa qofay qonccana mela, Isra7eelen de7iya darotas entta kunddethaasinne dendduwas Xoossan doorettis.

³⁵ Qassi eqetteyssatas malla gidana. Ne shemppuwarakka qassi mashshi aadhdhana” yaagis.

³⁶ Qassi Aseere yaraappe gidida Faanu7ela na7iya Haanna geetettiya nabey de7awusu. Iya daro cimasu; iya ba koyro azinaara laappun laythi de7asu.

³⁷ I azinay hayqqin hosppun tammanne oyddu laythi gidana gakkanaw qammanne gallas pacey baynna woosaninne xooman Xoossa Keethan haggaazasu.

³⁸ Iya he saatiyan bada Xoossaa galatasu; Yerusalaame wozetethaa naagiya ubbaas yooga na7abaa markkattasu.

³⁹ Yoosefaranne Mayraamira Godaa higgiyan kiitettida woga ubbaa polidaappe guye Galiila biittan de7iya bantta katama Naazirete simmidosona.

⁴⁰ Na7ay diccishenne minnishe bis. Cinccatethan kumis; Xoossaa aadho keehatethay iya bolla de7ees.

⁴¹ Yoosefaranne Mayraamira Faasikka Baale bonchchanaw laythan laythan Yerusalaame boosona.