ሉቃሳ 24:25-51 in Gofa

²⁵ ኢ ኤንታኮ፥ «ሂንቴኖ፥ ኣኬኮና ኣሳው፥ ሂንቴ ዎዛናይ ናቤቲ ኦዲዳባ ኡባ ኣማናናው ጋምዔይሳቶ፥

²⁶ ኪሪስቶሲ ሃ ሜቱዋ ኤካናዉኔ ባ ቦንቹዋን ጌላናው ቤሴኔ?» ያጊስ።

²⁷ ሙሴፔኔ ናቤታ ኡባፌ ዴንዲዲ ጌሻ ማፃፋን ኢያባይ ፃፌቲዳይሳ ኡባ ኤንታው ቆንጪሲስ።

²⁸ ኤንቲ ቢያ ጉታኮ ማታቲዳ ዎዴ ዬሱሲ ኣꬊዲ ሃሆ ሶ ቢያ ዳኒን፥

²⁹ ኤንቲ፥ «ሳዓይ ቃሚዳ ጊሾ ኑራ ኣቃ» ያጊዲ ሚንꬂዲ ዎሲዶሶና። ሄሳ ጊሾ፥ ኤንታራ ኣቃናው ጌሊስ።

³⁰ ኤንታራ ኢሲፌ ጋይታ ቦላ ኡቲዲ፥ ኡይꬃ ዴንꬂዲ፥ ሜንꬂ ኣንጂዲ ኤንታው ኢሚስ።

³¹ ሄ ዎዴ ኤንቲ ኤራና ሜላ ኤንታ ኣይፌይ ዶዬቲስ። ኤንቲካ ኤሪዶሶና። ሺን ኢ ኤንታፌ ጌሚስ።

³² ኤንቲ፥ «ኑ ኦጊያ ቦላ ዴዒሺን ኢ ኑስ ጌሻ ማፃፋ ቢርሺሺኒኔ ኑና ሃሳዪሲሺን ኑ ዎዛናይ ፁጌቲቤኔ?» ያጊዶሶና።

³³ ሄ ዎዴ ዴንዲዲ ጉዬ ዬሩሳላሜ ዪዶሶና። ታማኔ ኢሶቲኔ ሃራቲ ኢሲ ቦላ ሺቂዲ ዴዒሺን ዴሚዶሶና።

³⁴ ኤንቲ፥ «ጎዳይ ቱማ ዴንዲስ፤ ሲሞናስ ቆንጪስ» ያጊዶሶና።

³⁵ ሄ ናምዑ ታማሬቲ ኤማሁሴ ኦጊያ ቦላ ዴዒሺን ሃኒዳይሳኔ ኡይꬃ ሜንꬂዳ ዎዴ ዋቲ ኢያ ኤሪዳኮ ኤንታው ኦዲዶሶና።

³⁶ ናምዑ ታማሬቲ ሄሳ ኦዳ ቦላ ዴዒሺን፥ ዬሱሲ ኤንታ ጊዶን ኤቂዲ፥ «ሳሮይ ሂንቴው ጊዶ» ያጊስ።

³⁷ ጊዶሺን፥ ኤንቲ ዳጋሚዲ፥ ሞይቲሌ ቤዒዳ ዳኒን ያዪዶሶና።

³⁸ ኢ ኤንታኮ፥ «ኣይስ ባቢዴቲ? ኣይስ ሲꬌይ ሂንቴ ዎዛናን ጌሊዴ?

³⁹ ታ ኩሺያኔ ታ ቶሁዋ ቤዒቴ፤ ታኒ ታና። ቃሲ ኦይኪዲ ቤዒቴ፤ ታናን ሂንቴ ቤዔይሳዳ፥ ሞይቲሌስ ኣሾይኔ ሜቄꬂ ባዋ» ያጊስ።

⁴⁰ ያጊዲ፥ ባ ቶሁዋኔ ባ ኩሺያ ኤንታ ቤሲስ።

⁴¹ ኤንቲ ኡፋይሳፌ ዴንዶይሳን ኣማኖና ማላሌቴꬃን ዴዒሺን፥ ዬሱሲ ኤንታኮ፥ «ሃይሳን ሂንቴው ሚያባይ ዴዒ?» ያጊስ።

⁴² ኤንቲ ኢሲ ጫጬቲዳ ሞሎ ኢያው ኢሚዶሶና።

⁴³ ኢ ኤኪዲ ኤንታ ሲንꬃን ሚስ።

⁴⁴ ኢ፥ «ታ ሂንቴራ ጋምዒዳ ዎዴ ኡባን ሙሴ ማፃፋታን፥ ናቤታ ማፃፋታኒኔ ማዝሙሬ ማፃፋታን፥ ታ ጊሾ ፃፌቲዳባይ ኡባይ ፖሌታናው ቤሴስ ያጋዳ ታ ሂንቴው ኦዲዳ ቃላይ ሃይሳ» ያጊስ።

⁴⁵ ሄ ዎዴ ጌሻ ማፃፋታ ኣኬካና ሜላ ዎዛና ኤንታ ዶዪስ።

⁴⁶ ሄሳዳካ፥ «ኪሪስቶሲ ዋዬ ኤካና፥ ሄꬓንꬆ ቃማን ሃይቆፔ ዴንዳና ያጊዲ ፃፌቲስ።

⁴⁷ ዬሩሳላሜፔ ዴንዲዲ ኣሳ ኡባስ ናጋራፔ ማሮቴꬃይኔ ኣቶቴꬃይ ኢያ ሱንꬃን ማርካታና።

⁴⁸ ሂንቴ ሄሳስ ማርካታ።

⁴⁹ ሄኮ፥ ታካ ታ ኣዋይ ኢሚዳ ኡፋይሳ ሂንቴው ዬዳና። ሂንቴ ሳሎፔ ዎልቃ ማዓና ጋካናው ዬሩሳላሜ ካታማን ጋምዒቴ» ያጊስ።

⁵⁰ ሄሳፌ ጉዬ፥ ቢታኒያ ካታማ ኤንታና ኤኪዲ ቢስ። ባ ኩሺያ ዴንꬂዲ ኣንጂስ።

⁵¹ ኤንታና ኣንጂሼ ኤንታፌ ሻኬቲዲ ፑዴ ሳሎ ኤኬቲስ።

²⁵ I enttako, “Hinttenoo, akeekonna asaw, hintte wozanay nabeti odidabaa ubbaa ammananaw gam77eyssato,

²⁶ Kiristtoosi ha metuwa ekkanawunne ba bonchchuwan gelanaw bessennee?” yaagis.

²⁷ Museppenne nabeta ubbaafe denddidi Geeshsha Maxaafan iyabay xaafettidayssa ubbaa enttaw qonccisis.

²⁸ Entti biya gutaakko matattida wode Yesuusi aadhdhidi haaho soo biya daanin,

²⁹ Entti, “Sa7ay qammida gisho nuura aqa” yaagidi minthidi woossidosona. Hessa gisho, enttara aqanaw gelis.

³⁰ Enttara issife gayta bolla uttidi, uythaa denthidi, meenthi anjjidi enttaw immis.

³¹ He wode entti erana mela entta ayfey dooyettis. Enttika eridosona. Shin I enttafe geemmis.

³² Entti, “Nu ogiya bolla de7ishin I nuus Geeshsha Maxaafaa birshshishininne nuna haasayisishin nu wozanay xuugettibeenne?” yaagidosona.

³³ He wode denddidi guye Yerusalaame yidosona. Tammanne issotinne harati issi bolla shiiqidi de7ishin demmidosona.

³⁴ Entti, “Goday tuma denddis; Simoonas qonccis” yaagidosona.

³⁵ He nam77u tamaareti Emmahuuse ogiya bolla de7ishin hanidayssanne uythaa meenthida wode waati iya eridaakko enttaw odidosona.

³⁶ Nam77u tamaareti hessa oda bolla de7ishin, Yesuusi entta giddon eqqidi, “Saroy hinttew gido” yaagis.

³⁷ Gidoshin, entti dagammidi, moytille be7ida daanin yayyidosona.

³⁸ I enttako, “Ays babbidetii? Ays sidhey hintte wozanan gelidee?

³⁹ Ta kushiyanne ta tohuwa be7ite; taani tana. Qassi oykkidi be7ite; tanan hintte be7eyssada, moytilles ashoynne meqethi baawa” yaagis.

⁴⁰ Yaagidi, ba tohuwanne ba kushiya entta bessis.

⁴¹ Entti ufayssafe denddoyssan ammanonna malaaletethan de7ishin, Yesuusi enttako, “Hayssan hinttew miyabay de7ii?” yaagis.

⁴² Entti issi caacettida molo iyaw immidosona.

⁴³ I ekkidi entta sinthan mis.

⁴⁴ I, “Ta hinttera gam77ida wode ubban Muse maxaafatan, nabeta maxaafataninne Mazmure maxaafatan, ta gisho xaafettidabay ubbay polettanaw bessees yaagada ta hinttew odida qaalay hayssa” yaagis.

⁴⁵ He wode Geeshsha Maxaafata akeekana mela wozanaa entta dooyis.

⁴⁶ Hessadakka, “Kiristtoosi waaye ekkana, heedzantho qamman hayqoppe denddana yaagidi xaafettis.

⁴⁷ Yerusalaameppe denddidi asaa ubbaas nagaraappe maarotethaynne atotethay iya sunthan markkattana.

⁴⁸ Hintte hessas markkatta.

⁴⁹ Hekko, takka ta aaway immida ufayssaa hinttew yeddana. Hintte saloppe wolqqa ma77ana gakkanaw Yerusalaame kataman gam77ite” yaagis.

⁵⁰ Hessafe guye, Bitaaniya katamaa enttana ekkidi bis. Ba kushiya denthidi anjjis.

⁵¹ Enttana anjjishe enttafe shaakettidi pude salo ekettis.