ሉቃሳ 24:17-30 in Dawro

¹⁷ ዬሱሲ፥ « ሂንቴንቱ ኦጊያ ቦላን ኢቱ ኢቱዋና ሃሳዪያዌ ኣዬ?» ያጊ ኦቼዳ። ኡንቱንቱካ ዳጋማን ሌቹሚዴ ኤቄዲኖ።

¹⁸ ኡንቱንቱፔ ኢቱ ቄሊዮጳ ጌቴቲያዌ፥ «ሃ ጊዱዋን ዬሩሳላሜን ሃኖ ዬዉዋ ኤሬናዌ ኔ ፃላላይ ሃጋዴው ኢማꬄ?» ያጊ ዛሬዳ።

¹⁹ ዬሱሲ፥ «ኢ ኣዬ?» ያጊና፥ ኡንቱንቱካ፥ «ፆሳ ሲንꬃኒኔ ኣሳ ኡባ ሲንꬃን ቃላኒኔ ኪታን ሚኖ ናቢያ ጊዴዳ ናዚሬቲያ ዬሱሳባ ሃሳዬቶ።

²⁰ ኣካ ቄሳቱዋ ካፓቱኔ ኑና ሞዲያዋንቱ ሃይቁዋ ፒርዳው ኣꬂ ኢሜዲኖ፤ ማስቃሊያ ቦላን ዎꬌዲኖ።

²¹ ኑኒ ካሴና፥ ‹ኢስራዔሊያ ኣሳ ዎዛናዋ› ያጊ ሂዶቶዌ ኣ፤ ሺን ሃ ዬዉ ሃኔቲዴ ኣꬎዴፔ ሄዙ ቃማ ጊዴዳ።

²² ኑ ጊዶፔ ኢቲ ኢቲ ማጫዋንቱ ኑና ማላሊሴዲኖ። ኡንቱንቱ ጉራን ሂኒ ዱፉዋ ቤዲኖ፥

²³ ሺን ዬሱሳ ኣኃ ኡንቱንቱ ꬋዮ ዎዴ ሺሬቲ ሲሚዴ፥ «ኢ ዴንዴዳ፤ ያጊያዋ ኪታንቻቱ ኦዲሺን ቤዔዶ» ያጊ ኦዴዲኖ።

²⁴ ኑ ጊዶፔካ ኢቲ ኢቲ ኣሳይ ዱፉዋ ቢዴ ኡንቱንቱ ጎዋዳን ሃኒና ቤዔዲኖ፤ ሺን ዬሱሳ ኣኃ ዴሚቤይኪኖ» ያጌዲኖ።

²⁵ ዬሱሲ ኡንቱንቶ፥ «ሂንቴኖ፥ ኣኬኬና ኣሳቶ፥ ሂንቴንቱ ዎዛናን ናባቱ ኦዶዋ ኡባ ኤሌ ኣማኔናዋንቶ፤

²⁶ ኪሪስቶሲ ሃ ሜቱዋ ኣካናዉኔ ባሬ ቦንቹዋኮ ጌላናው ቤሴኔ?» ያጌዳ።

²⁷ ሄዋፔ ሲሚዴ ዬሱሲ ሙሴ ማፃፋቱዋፔኔ ናባቱ ፃፌዳ ማፃፋቱዋፔ ዶሚዴ፥ ፆሳ ማፃፋቱዋ ኡባን ፃፌቴዳ ባሬባ ኡንቱንቶ ቢሊዴ ኦዴዳ።

²⁸ ኡንቱንቱ ቢዴዒያ ሄራ ማቴዳ ዎዴ፥ ዬሱሲ ሃራሳ ቢያዋ ማላቴዳ።

²⁹ ሄ ዎዴ ኡንቱንቱ ኣ፥ «ጋላሳይ ቃሚዴ ዴዒያ ዲራው፥ ኦማርሳይ ማቴዳ፤ ኑናና ኢቲፔ ኣቃ!» ያጊ ሚኒሲ ዎሴዲኖ። ሃዋ ዲራው፥ ኢካ ኡንቱንቱና ኢቲፔ ኣቃናው ጌሌዳ።

³⁰ ኡንቱንቱ ኢቲፔ ጋዪታን ኡቴዳ ዎዴ፥ ዳቡዋ ዴንꬂዴ ኣንጄዳ፤ ሜንꬂዴ ኡንቱንቶ ኢሜዳ።

¹⁷ Yesuusi, “Hinttenttu ogiyaa bollan ittu ittuwanna haasayiyaawe ayee?” yaagi oochcheedda. Unttunttukka dagaman lechchummiide eqqeeddino.

¹⁸ Unttunttuppe ittuu Qeliyoophaa geetettiyaawe, “Ha gidduwan Yeerusalaamen hano yewuwaa erennawe ne xalalay hagadew imathee?” yaagi zaareedda.

¹⁹ Yesuusi, “I ayee?” yaagina, unttunttukka, “Xoossaa sinthaninne asaa ubbaa sinthan qaalaaninne kiitaan mino nabiyaa gideedda Naazireetiyaa Yesuusabaa haasayeetto.

²⁰ Aakka qeesatuwaa kaappatuunne nuuna mooddiyaawanttu hayquwaa pirddaw aathi immeeddino; masqqaliyaa bollan wodheeddino.

²¹ Nuuni kasenna, ‘Israa7eeliyaa asaa wozanawaa’ yaagi hidootowe A; shin ha yewuu hanettiide aadhdhoodeppe heezzu qamma gideedda.

²² Nu giddoppe itti itti maccawanttu nuuna maalalisseeddino. Unttunttu guuraan hini duufuwaa beeddino,

²³ shin Yesuusa anhaa unttunttu dhayo wode shiretti simmiide, “I denddeedda; yaagiyaawaa kiitanchchatuu odishshin be7eeddo” yaagi odeeddino.

²⁴ Nu giddoppekka itti itti asay duufuwaa biide unttunttu goowaadan hanina be7eeddino; shin Yesuusa anhaa demmibeykkino” yaageeddino.

²⁵ Yesuusi unttunttoo, “Hintteno, akeekenna asatoo, hinttenttu wozanaan nabatuu odowaa ubbaa elle ammanennawanttoo;

²⁶ Kiristtoosi ha metuwaa akkanawunne bare bonchchuwaakko gelanaw bessennee?” yaageedda.

²⁷ Hewaappe simmiide Yesuusi Muse maxaafatuwaappenne Nabatuu xaafeedda maxaafatuwaappe doommiide, Xoossaa Maxaafatuwaa ubbaan xaafetteedda barebaa unttunttoo billiide odeedda.

²⁸ Unttunttu bide7iyaa heeraa mateedda wode, Yesuusi harasaa biyaawaa malateedda.

²⁹ He wode unttunttu A, “Gallassay qammiidde de7iyaa diraw, omarssay mateedda; nuunanna ittippe aqa!” yaagi minissi woosseeddino. Hawaa diraw, ikka unttunttunna ittippe aqanaw geleedda.

³⁰ Unttunttu ittippe gayitaan utteedda wode, daabbuwaa denthiide anjjeedda; menthiide unttunttoo immeedda.