ሉቃሳ 21:3-27 in Dawro

³ «ታ ሂንቴው ቱሙዋ ጋይ፥ ሃ ሂዬሳ ኣምዔ ሚሺራታ፥ ኦፔኔ ዳሩዋ ኢማዱ።

⁴ ሃ ኣሳይ ኡባይ ባሬንቶ ፓላሆዋፔ ኢሜዲኖ፤ ሺን ኢዛ ባሬ ሂዬሳቴꬃ ዎልቃን ባሬው ዴዒያዋ ኡባ ኢማዱ» ያጌዳ።

⁵ ኣ ካሊያዋንቱፔ ኢቱ ኢቱ፥ «ጌሻ ጎሊ ሎዖ ሹቻኒኔ ባላ ሺቁዋ ኢሞታን ሎዔዳዋ» ያጊ ሃሳዪያ ዎዴ ዬሱሲ፥

⁶ «ሃዌ ሂንቴንቱ ቤዒያዌ ኡባይ ኮሌቴናን፥ ሹቻይ ሹቻ ቦላን ኬሌቲዴ ኣቴና ዎዲ ያናዋ» ያጌዳ።

⁷ ኡንቱንቱካ፥ «ታማሪሲያዎ፥ ሲሚ ሃዌ ሃናናዌ ኣዉዴ? ቃሲካ ሃዌ ሃናናው ማላይ ኣዬ?» ያጊዲ ኦቼዲኖ።

⁸ ኢካ፥ «ኦኒኔ ባሌꬄናዳን ናጌቲቴ፤ ጮራ ኣሳይ፥ ‹ታኒ ኪሪስቶሳ› ያጊዴ ቃሲካ፥ ‹ዎዲ ማቴዳ› ያጊዴ ታ ሱንꬃን ያናዋንታ፤ ሂንቴንቱ ቃሲ ኡንቱንታ ካሎፒቴ።

⁹ ኦላ ዬዉዋኔ ኣሳ ማካላባ ሲሲያ ዎዴ ዳጋሞፒቴ፤ ሃዌ ኮይሮ ሃናናው ቤሲያዋ ጊዶ ዲራፔ ኣቲን ዉርሴꬃይ ቢራ» ያጌዳ።

¹⁰ ሄዋፔ ካሊዴ ኣሳው፥ «ኣሳይ ኣሳ ቦላ፥ ካዉቴꬃይካ ካዉቴꬃ ቦላ፥ ዴንዳናዋ፤

¹¹ ዎልቃማ ቢታ ቃꬃይ ሃናናዋ፤ ኮሻይኔ ሃርጊ፥ ዱማ ዱማሳን ሜꬌታናዋ፤ ያሺያ ዬዉኔ ኡባካ ዎልቃማ ማላታይ ሳሉዋፔ ሃናናዋ።

¹² «ሃዌ ኡባይ ሃናናፔ ካሲያን ቃሲ ኣሳይ ሂንቴንታ ኦይቃናዋንታ፥ ሜቶꬃናዋንታ፤ ሂኒ ኣዪሁዳቱዋ ዎሳ ጎሌ ኣሳው ኣꬂ ኢማናዋንታ፤ ቃሾ ጎሌካ ጌሊሳናዋንታ፤ ካታቱዋ ሲንꬃኒኔ ሞዲያዋንቱ ሲንꬃን ሺሻናዋንታ፤ ሃዌ ኡባይ ታ ሱንꬃ ጋሱዋን ሂንቴንታ ጋካናዋ።

¹³ ሃዌካ ማርካታናው ሂንቴው ሎዖ ቃዳ ጊዳናዋ።

¹⁴ ሃዋ ጊዲያ ዲራው፥ ኣይ ዛሩዋ ኢማኔ ጊዴ ኮይሮቲዴ ሂንቴንቱ ኡንዔቴና ማላ ሃዋ ዎዛና ኣꬂቴ።

¹⁵ ኤቄቲያዋንቱ ኡባይ፥ ኤቄታናዉኔ ላካናው ዳንዳዬና ቃላኔ ኣꬎ ጪንጫቴꬃ ታኒ ሂንቴንቶ ኢማና።

¹⁶ ሂንቴንታ ዬሌዳዋንቱኔ ሂንቴንቱ ኢሻቱ፥ ሂንቴንቱ ዳባቱኔ ሂንቴንቱ ላጌꬃቱካ ኣቴናን ሂንቴንታ ኣꬂ ኢማናዋንታ፤ ሂንቴንቱፔካ ኢቱዋ ኢቱዋ ዎꬋናዋንታ።

¹⁷ ታ ሱንꬃ ዲራው ኣሳ ኡባ ማታን ኢፄቴዳዋንታ ጊዳኒታ።

¹⁸ ዬዉዋን ቃሲ ሂንቴንቱ ሁጲያ ቢናናፔካ ኢቲናኔ ባዩኩ።

¹⁹ ሚኒ ኤቂዴ ሂንቴንቱ ሼምፑዋ ኣሺታ።

²⁰ «ዬሩሳላሜ ኦላ ኣሳን ዶዴቴዳ ዎዴ፥ ኢዚ ባዬꬃይ ማቴዳዋ ኤሪቴ።

²¹ ሄ ዎዴ ዪሁዳን ዴዒያዋንቱ ዴሪያኮ ባቃቲኖ፤ ካታማን ዴዒያዋንቱ ቃይ ሄዋፔ ኬሲኖ፤ ባላጋሪያን ዴዒያዋንቱካ ያ ካታማኮ ጌሎፒኖ፤

²² ፆሳ ቃላን ፃፌቴዳዌ ኡባይ ፖሌታናዳን ሃዌ ሃሉዋ ኬሲያ ዎዲያ።

²³ ቢታ ቦላን ዎልቃማ ሜቱ ሃናናዋ፤ ሃዒ ዴዒያ ኣሳ ቦላን ሃንቁ ያናዋ፤ ሄዋ ዲራው ሄዎዲያን ሻሃሮዋንቶኔ ꬋንꬂያዋንቶ ኣዬ!

²⁴ ኣሳይ ኡባይ ማሻን ሃይቃናዋንታ፤ ፆሳ ኤሬና ጋዲያ ኡባቱካ ኦሞዱዋን ባናዋንታ፤ ዬሩሳላሜካ ኣዪሁዳ ጊዴናዋንቱ ዎዲ ፖሌታና ጋካናው፥ ኡንቱንቱን ዬꬌቴዳዉኖ ጊዳናዉኑ።

²⁵ «ኣዋ፥ ኣጌናኒኔ ፆሊንቲያ ቦላ ማላታይ ሃናናዋ፤ ኣባፔኔ ቤታ ኮሻፔ ዴንዶ ጋሱዋን ቢታ ቦላን ዴዒያ ኣሳይ ኡባይ ኡንዔታናዋንታ፤ ሂርጋናዋንታ።

²⁶ ሳሉዋ ዎልቃይ ኡባይ ቃፂያ ዲራው ኣሳይ ያሻኒኔ ኣላሚያ ቦላ ኣዬ ያናዌሻ ያጊዴ ናጉዋን ዳቡራናዋንታ።

²⁷ ሄ ዎዴ ኣሳ ናዓይ ዎልቃኒኔ ዎልቃማ ቦንቹዋን ሻሪያን ዪያ ዎዴ ቤዓናዋንታ።

³ “Ta hinttew tumuwaa gay, ha hiyyeesaa am77e mishiratta, ooppenne daruwaa immaaddu.

⁴ Ha asay ubbay barenttoo palahowaappe immeeddino; shin iza bare hiyyeesatethaa wolqqaan barew de7iyaawaa ubbaa immaaddu” yaageedda.

⁵ A kaalliyaawanttuppe ittu ittuu, “Geeshsha golli lo77o shuchchaaninnee baalaa shiiquwaa imotaan lo77eeddawaa” yaagi haasayiyaa wode Yesuusi,

⁶ “Hawe hinttenttu be7iyaawe ubbay kolettennaan, shuchchay shuchchaa bollan keelettiide attenna wodii yaanawaa” yaageedda.

⁷ Unttunttukka, “Tamaarissiyaawoo, simmi hawe hananawe awudee? Qassikka hawe hananaw mallay ayee?” yaagiidi oochcheeddino.

⁸ Ikka, “Ooninne balethennaadan naagettite; cora asay, ‘Taani Kiristtoosa’ yaagiidde qassikka, ‘Wodii mateedda’ yaagiidde ta sunthaan yaanawantta; hinttenttu qassi unttuntta kaalloppite.

⁹ Olaa yewuwaanne asaa makkalaabaa sisiyaa wode dagammoppite; hawe koyro hananaw bessiyaawaa gido diraappe attin wursethay bira” yaageedda.

¹⁰ Hewaappe kaalliide asaw, “Asay asaa bolla, kawutethaykka kawutethaa bolla, denddanawaa;

¹¹ wolqqaama biittaa qaathay hananawaa; koshaynne harggii, dumma dummasaan medhettanawaa; yashshiyaa yewuunne ubbaakka wolqqaama malaatay saluwaappe hananawaa.

¹² “Hawe ubbay hananaappe kasiyan qassi asay hinttentta oyqqanawantta, metoothanawantta; hini Ayihudatuwaa woosa golle asaw aathi immanawantta; qasho gollekka gelissanawantta; kaatatuwaa sinthaninne mooddiyaawanttu sinthan shiishshanawantta; hawe ubbay ta sunthaa gaasuwan hinttentta gakkanawaa.

¹³ Hawekka markkattanaw hinttew lo77o qaada gidanawaa.

¹⁴ Hawaa gidiyaa diraw, ay zaaruwaa immanee giidde koyrottiide hinttenttu un77ettenna mala hawaa wozanaa aathite.

¹⁵ Eqettiyaawanttu ubbay, eqettanawunne lakanaw danddayenna qaalaanne aadho cinccatethaa taani hinttenttoo immana.

¹⁶ Hinttentta yeleeddawanttunne hinttenttu ishatuu, hinttenttu dabbatuunne hinttenttu laggethatuukka attennaan hinttentta aathi immanawantta; hinttenttuppekka ittuwaa ittuwaa wodhanawantta.

¹⁷ Ta sunthaa diraw asaa ubbaa matan ixetteeddawantta gidanita.

¹⁸ Yewuwaan qassi hinttenttu huuphiyaa binnanaappekka ittinnanne bayukku.

¹⁹ Minni eqqiide hinttenttu shemppuwaa ashshiita.

²⁰ “Yeerusalaame olaa asaan doodetteedda wode, izi bayethay mateeddawaa erite.

²¹ He wode Yihudaan de7iyaawanttu deriyaakko baqatino; katamaan de7iyaawanttu qay hewaappe kesino; baalaagariyan de7iyaawanttukka yaa katamaakko geloppino;

²² Xoossaa qaalaan xaafetteeddawe ubbay polettanaadan hawe haluwaa kesiyaa wodiyaa.

²³ Biittaa bollan wolqqaama metuu hananawaa; ha77i de7iyaa asaa bollan hanqquu yaanawaa; hewaa diraw hewodiyan shahaarowanttoonne dhanthiyawanttoo aayyee!

²⁴ Asay ubbay mashshaan hayqqanawantta; Xoossaa erenna gadiyaa ubbatuukka omodduwaan baanawantta; Yeerusalaamekka Ayihudaa gidennawanttu wodii polettana gakkanaw, unttunttun yedhetteeddawunno gidanawunnu.

²⁵ “Awaa, agenaaninne xoolinttiyaa bolla malaatay hananawaa; abbaappenne beetaa kooshshaappe denddo gaasuwan biittaa bollan de7iyaa asay ubbay un77ettanawantta; hirgganawantta.

²⁶ Saluwaa wolqqay ubbay qaaxxiyaa diraw asay yashshaaninne alamiyaa bolla ayee yaanaweeshsha yaagiidde naaguwaan daaburanawantta.

²⁷ He wode Asaa Na7ay wolqqaaninne wolqqaama bonchchuwan shaariyaan yiyaa wode be7anawantta.