ሉቃሳ 1:27-76 in Dawro

²⁷ ዳዊታ ያራፔ ጊዴዳ ዮሴፋ ጌቴቲያ ቢታኔው ኦሼታ ቃሼቴዳ ዎዶራቲኮ ፆሳ ማታፔ ኪቴቴዳ፤ ዎዶራቲ ሱንꬃይካ ማይራሞ ጌቴቴ።

²⁸ ኪታንቻይካ ማይራሚኮ ዪዴ፥ «ዳሪሳዴ ዶሴታዉኔ፥ ሳሮቴꬃይ ኔው ጊዶ፤ ጎዳይካ ኔናና ጋꬆ ዴዔ፤ ኔኒካ ማጫዋንቱ ጊዶን ኣንጄቴዳዉኖ» ያጌዳ።

²⁹ ማይራማካ ኣ ሃሳያፔ ዴንዶዋን ዳሪሳ ዳጋማዴ፥ «ሃዌ ኣያ ማላ ሳሮታ ጊዳኔ» ጋዴ ዬዉዋ ቆፓዱ።

³⁰ ኪታንቻይ ኢዞ፥ «ሃኔ ማይራሜ፥ ፆሳ ማታን ሳባ ዴማዳ ያዮፓ።

³¹ ኔኒ ሻሃራዴ፥ ኣቱማ ናዓ ዬላናሳ፤ ኣ ሱንꬃካ ዬሱሳ ጋናሳ።

³² ኢካ ዳራ ጊዳናዋ፤ ኡባፔ ꬎቃ ፆሳ ናዓ ጌቴታና፤ ጎዳ ፆሳይ ኣ ኣቡ ዳዊታ ካዉቴꬃ ኦይዲያ ኣው ኢማናዋ።

³³ ኢካ ያዪቆባ ጎሌን ሜꬊናው ካዉታናዋ፤ ኣ ካዉቴꬃዉካ ዉርሴꬃይ ባዋ» ያጌዳ።

³⁴ ማይራማካ ኪታንቻ፥ «ታኒ ዎዶራቶ ጊዶ ዲራው፥ ሃዌ ዎቲ ሃናናዌ?» ያጋዱ።

³⁵ ኪታንቻይካ ዛሪዴ ኢዚው፥ «ኣያና ጌሻይ ኔ ቦላ ያናዋ፤ ꬎቃ ፆሳ ዎልቃይ ኔናን ሼምፓናዋ። ሄዋ ዲራው፥ ኔፔ ዬሌቲያዌ ጌሻ ፆሳ ናዓ ጌቴታና።

³⁶ ኔ ዳባታ ኤልሳቤፃ ባሬ ጪማቴꬃ ዎዲያን ኣቱማ ናዓ ሻሃራዱ። ማንꬃ ጌቴቴዳዉና ኤልሳቤፃ ሻሃሮዴፔ ኡሱፑንꬃ ኣጌና ኦይቃዱ።

³⁷ ፆሳ ፆኒያ ዬዉ ባዋ» ያጌዳ።

³⁸ ማይራማካ፥ «ታኒ ጎዳ ኣይላቶ፤ ኔኒ ጎዋዳን ሃኖ» ጋዱ። ሄዋፔ ጉዪያን ኪታንቻይ ኢዚ ማታፔ ቤዳ።

³⁹ ማይራማካ ሄ ኣጌና ጊዶን ዴንዳዴ ኪሊ ዞዜቲያ ዪሁዳ ጋዴን ዴዒያ ኢቲ ካታማ ኤሌላ ኬሳዱ።

⁴⁰ ዛካራሳ ጎሌ ጌላዴ ኤልሳቤፆ ሳሮታዱ።

⁴¹ ኤልሳቤፃካ ማይራሚ ሳሮታ ሲሴዳ ዎዴ፥ ኢዚ ኡሉዋን ዴዒያ ሻሃራይ ጉፔዳ፤ ኤልሳቤፃካ ኣያና ጌሻን ኩማዱ።

⁴² ባሬ ኮሻካ ꬎቁ ኦꬃዴ፥ «ኔኒ ማጫዋንቱ ጊዶፔ ኣንጄቴዳዉኖ። ኔፔ ዬሌቲያዌካ ኣንጄቶዋ።

⁴³ ኔኒ ታ ጎዳ ዳያ ታኮ ያናው ታኒ ኦኔ?

⁴⁴ ሄኮ ኔ ሳሮታ ኮሻይ ታ ሃይꬃን ሲሴቴዳ ዎዴ፥ ታ ኡሉዋን ዴዒያ ሻሃራይ ናሼቻን ጉፔዳ።

⁴⁵ ጎዳይ ፖሌቴ ጊዴ ኢዚው ኦዴዳዋ ኣማኔዳዉና ኢዛ ኣንጄቴዳዉኖ» ያጋዱ።

⁴⁶ ማይራማካ፥ «ታ ሼምፓታ ታ ጎዳ ቦንቻው፥

⁴⁷ ታ ኣያናይካ ታ ፆሳ፥ ታ ꬋሊያን ሎይꬃ ናሼታው።

⁴⁸ ኢካ ባሬ ኣይላቲ ቶሺያ ፄሌዳ። ሃቼፔ ዶሚዴ ዬሌታይ ኡባይ ኣንጄቴዳዉኔ ጊኖ።

⁴⁹ ዎልቃማ ጊዴዳ ኢ ዳሮ ዬዉዋ ታው ኦꬄዳ፤ ኣ ሱንꬃይካ ጌሻ።

⁵⁰ ኣ ማሮታይ ያዪያዋንቱሲ ዬሌታፔ ዬሌታይ ጋካናው ዴዔ።

⁵¹ ባሬ ዎልቃን ሚኖ ኪታ ኪቴቴዳ፤ ባሬንቱ ዎዛና ቆፋን ኦቶሬቲያዋንታ ላሌዳ።

⁵² ሞዲያዋንታ ካዉቴꬃ ማታ ኦይዲያፔ ዎꬄዳ፤ ኣሺካቱዋካ ቃሲ ꬎቁ ꬎቁ ኦꬄዳ።

⁵³ ኮሻቴዳዋንታ ሎዖ ዬዉዋን ካሊሴዳ፤ ዱራቱዋ ቃሲ ሜላ ዬዴርሴዳ

⁵⁴ ባሬ ማሮቴꬃ ቆፒዴ ባሬ ኣይሊያ ኢስራዔሊያ ማዴዳ።

⁵⁵ ኑ ኣዋቶ ኢ ኦዴዳዋዳን ኣብራሃሜዉኔ ኣ ያራው ጌዳዋ ሜꬊናው ናጋና ዲራሳ» ያጋዱ።

⁵⁶ ማይራማካ ሄዙ ኣጌና ኬና ኤልሳቤፂ ማታን ጋሚዖዋፔ ጉዪያን ባሬ ጎሌ ሲማዱ።

⁵⁷ ኤልሳቤፂዉካ ዬሊያ ዎዲ ጋኪና፥ ኣቱማ ናዓ ዬላዱ።

⁵⁸ ኢዚ ሾራቱኔ ኢዚ ዳቦ ጊዴዳዋንቱ፥ ጎዳይ ማሮቴꬃ ኢዚው ኦꬄዳዋ ሲሲዴ ኢዚና ኢቲፔ ናሼቴዲኖ።

⁵⁹ ሆስፑንꬃ ጋላሳን ናዓ ቃፃራናው ዬዲኖ፤ ኣ፥ ኣዉዋ ሱንꬃን ዛካራሳ ጊዴ ሱንꬃናው ኮዬዲኖ።

⁶⁰ ኣ ዳያ ቃሲ፥ «ሃኔና፥ ዮሃኒሳ ጌቴታናው ኮሼ» ያጋዱ።

⁶¹ ኡንቱንቱካ ኢዞ፥ «ኔ ዳባቱዋፔ ሃቼ ጋካናው ኢቱካ ሃ ሱንꬃን ፄሴቲቤና» ያጌዲኖ።

⁶² ኣ ኣባ፥ ኦና ጊያ ሱንꬃን ፄጌታናው ኮዪንቶ ፆርሲ ኦቼዲኖ።

⁶³ ኣ ኣቡካ ፃፊያባ ኦቺ ኣኪዴ፥ «ናዓ ሱንꬃይ ዮሃኒሳ» ጊዴ ፃፊና፥ ኡባቱካ ዬዉዋን ማላሌቴዲኖ።

⁶⁴ ሄዋንካ ዛካራሳ ዶናይ ዶዬቴዳ፥ ኣ ኢንፃርሳይካ ቢሌቲና ሃሳያ ዶሜዳ፥ ፆሳካ ጋላቴዳ።

⁶⁵ ኣ ሾራቱካ ዴዒያሳ ኡባን ያሻን ኩሜዲኖ። ሃ ዬዉካ ዞዜቲያ ዪሁዳ ጋዲያ ኡባን ዳሪ ሃሳዬቴዳ።

⁶⁶ ሃዋካ ሲሴዳዋንቱ ኡባቱ፥ «ሃ ናዓይ ኣያ ጊዳኔሻ?» ያጊዴ ዬዉዋ ባሬንቱ ዎዛናን ኦይቄዲኖ፤ ፆሳይካ ኣናና ዴዒያዋ ኤሬዲኖ።

⁶⁷ ዮሃኒሳ ኣቡ ዛካራሲ ኣያና ጌሻን ኩሚዴ ቲምቢቲያ ያጊ ኦዴዳ፡

⁶⁸ «ኢስራዔሊያ ጎዳይ ፆሳይ ኣንጄቶ፤ ዪዴ ባሬ ኣሳ ፆሞሴዳኔ ዎዜዳ።

⁶⁹ ባሬ ኣይሊያ ዳዊቴ ጎሊያን፤ ዎልቃማ ኣሺያዋ ኑሲ ጊጊሴዳ።

⁷⁰ ሃዌካ ቤኒ ጎዳ ጌሻ ናባቱዋ ዶናን ኦዴቶዋዳን፥

⁷¹ ኢ ኑና፥ ኑ ሞርኬቱዋፔኔ ኑናና ኤቄቲያዋንቱ ኩሺያፔ ኣሻናሳ።

⁷² ሃዋካ ኢ ኦꬄዳዌ፥ ኑ ኣዋቶ ማሮቴꬃ ቤሳናሳኔ፥ ባሬ ጌሻ ጫቁዋ ዎዛና ኣꬃናሳ።

⁷³ ኑ ኣዉዋ ኣብራሃሞሲ ጫቄዳ ጫቁዋ ቆፓናው፥

⁷⁴ ኑ ሞርኬቱዋ ኩሺያፔ ኬሲዴ ያሻይ ባንታን ኣው ኦꬃናዳን ማታ ኑሲ ኢሜዳ።

⁷⁵ ሃዌኔካ፥ ኑና ኑ ዎዲያ ኡባን ጌሻቴꬃኒኔ ፂሎቴꬃን ባሬ ሲንꬃን ኤሳና ዲራሳ።

⁷⁶ ዛሪዴካ፥ ኔኖ፥ ታ ናዓው፥ ꬎቃ ፆሳ ናቢያ ጌቴታናሳ፤ ኦጊያ ጊጊሳናው ጎዳፔ ሲንꬃና ባናሳ።

²⁷ Daawita yaraappe gideedda Yooseefa geetettiyaa bitanew ooshetta qashetteedda wodorattikko Xoossaa matappe kiitetteedda; wodoratti sunthaykka Mayraamo geetettee.

²⁸ Kiitanchchaykka Mayraamikko yiide, “Darissaade dosettawunne, sarotethay new gido; Godaykka neenanna gatho de7ee; Neenikka maccawanttu giddon anjjetteeddawunno” yaageedda.

²⁹ Mayraamakka A haasayaappe denddowaan darissa dagammaade, “Hawe ayaa mala sarotaa gidanee” gaade yewuwaa qoppaaddu.

³⁰ Kiitanchchay izo, “Hanne Mayraamee, Xoossaa matan sabaa demmaadda yayyoppa.

³¹ Neeni shahaaraade, attuma na7aa yelanaassa; A sunthaakka Yesuusa gaanaassa.

³² Ikka dara gidanawaa; Ubbaappe Dhoqqa Xoossaa Na7aa geetettana; Godaa Xoossay A aabbu Daawita kaawutethaa oydiyaa aw immanawaa.

³³ Ikka Yayiqooba gollen medhinaw kawutanawaa; A kawutethawukka wurssethay baawa” yaageedda.

³⁴ Mayraamakka kiitanchchaa, “Taani wodoratto gido diraw, hawe wooti hananawee?” yaagaaddu.

³⁵ Kiitanchchaykka zaariide iziw, “Ayyaanaa Geeshshay ne bolla yaanawaa; Dhoqqa Xoossaa wolqqay neenan shemppanawaa. Hewaa diraw, neeppe yelettiyaawe geeshsha Xoossaa Na7aa geetettana.

³⁶ Ne dabbatta Elssaabeexa bare cimatethaa wodiyaan attuma na7aa shahaaraaddu. Mantha geetetteeddawunna Elssaabeexa shahaaroodeppe usuppuntha agenaa oyqqaaddu.

³⁷ Xoossaa xooniyaa yewuu baawa” yaageedda.

³⁸ Mayraamakka, “Taani Godaa ayllatto; neeni goowaadan hano” gaaddu. Hewaappe guyyiyan kiitanchchay izi matappe beedda.

³⁹ Mayraamakka he agenaa giddon denddaade killi zoozetiyaa Yihudaa gaden de7iyaa itti katamaa elleella kesaaddu.

⁴⁰ Zakkaraasa golle gelaade Elssaabeexo sarotaaddu.

⁴¹ Elssaabeexakka Mayraami sarotaa siseedda wode, izi uluwaan de7iyaa shahaaray guppeedda; Elssaabeexakka Ayyaanaa Geeshshaan kumaaddu.

⁴² Bare kooshshaakka dhoqqu oothaade, “Neeni maccawanttu giddoppe anjjetteeddawunno. Neeppe yelettiyaawekka anjjettowaa.

⁴³ Neeni ta Godaa daaya taakko yaanaw taani oone?

⁴⁴ Hekko ne sarotaa kooshshay ta haythaan sisetteedda wode, ta uluwaan de7iyaa shahaaray nashechchaan guppeedda.

⁴⁵ Goday polettee giide iziw odeeddawaa ammaneeddawunna iza anjjetteeddawunno” yaagaaddu.

⁴⁶ Mayraamakka, “Ta shemppatta ta Godaa bonchchaw,

⁴⁷ Ta ayyaanaykka ta Xoossaa, ta dhaliyan loytha nashettaw.

⁴⁸ Ikka bare ayllatti tooshiyaa xeelleedda. Hachcheppe dommiide yeletay ubbay anjjetteeddawunnee giino.

⁴⁹ Wolqqaama gideedda I daro yewuwaa taw ootheedda; A sunthaykka geeshshaa.

⁵⁰ A maarotay yayyiyaawanttussi yeletaappe yeletay gakkanaw de7ee.

⁵¹ Bare wolqqaan mino kiitaa kiitetteedda; barenttu wozanaa qofaan otorettiyaawantta laaleedda.

⁵² Mooddiyaawantta kawutethaa maataa oydiyaappe wotheedda; ashikkatuwaakka qassi dhoqqu dhoqqu ootheedda.

⁵³ Koshatteeddawantta lo77o yewuwaan kalisseedda; duratuwaa qassi mela yedersseedda

⁵⁴ Bare maarotethaa qoppiide bare aylliyaa Israa7eeliyaa maaddeedda.

⁵⁵ Nu aawatoo I odeeddawaadan Abraahaamewunne A yaraw geeddawaa medhinaw naagana diraassa” yaagaaddu.

⁵⁶ Mayraamakka heezzu agenaa keena Elssaabeexi matan gami77owaappe guyyiyan bare golle simmaaddu.

⁵⁷ Elssaabeexiwukka yeliyaa wodii gakkina, attuma na7aa yelaaddu.

⁵⁸ Izi shooratuunne izi dabbo gideeddawanttu, Goday maarotethaa iziw ootheeddawaa sisiide izinna ittippe nashetteeddino.

⁵⁹ Hosppuntha gallassaan na7aa qaxxaranaw yeeddino; A, aawuwaa sunthaan Zakkaraasa giide sunthanaw koyyeeddino.

⁶⁰ A daaya qassi, “Hanenna, Yohaannisa geetettanaw koshshee” yaagaaddu.

⁶¹ Unttunttukka izo, “Ne dabbatuwaappe hachche gakkanaw ittuukka ha sunthaan xeesettibeenna” yaageeddino.

⁶² A aabba, oona giyaa sunthan xeegettanaw koyyintto xorssi oochcheeddino.

⁶³ A aabbukka xaafiyaabaa oochchi akkiide, “Na7aa sunthay Yohaannisa” giide xaafina, ubbatuukka yewuwaan maalaletteeddino.

⁶⁴ Hewankka Zakkaraasa doonay dooyetteedda, A inxxarssaykka bilettina haasayaa doommeedda, Xoossaakka galateedda.

⁶⁵ A shooratuukka de7iyaasaa ubbaan yashshaan kumeeddino. Ha yewuukka zoozetiyaa Yihudaa gadiyaa ubbaan darii haasayetteedda.

⁶⁶ Hawaakka siseeddawanttu ubbatuu, “Ha na7ay ayaa gidaneeshsha?” yaagiide yewuwaa barenttu wozanaan oyqqeeddino; Xoossaykka aananna de7iyaawaa ereeddino.

⁶⁷ Yohaannisa aabbu Zakkaraasi Ayyaanaa Geeshshaan kumiide timbbitiyaa yaagi odeedda:

⁶⁸ “Israa7eeliyaa Goday Xoossay anjjetto; yiide bare asaa xomooseeddanne wozeedda.

⁶⁹ Bare aylliyaa Daawite golliyan; wolqqaama ashshiyaawaa nuussi giigisseedda.

⁷⁰ Hawekka beni Godaa geeshsha nabatuwaa doonan odettowaadan,

⁷¹ I nuuna, nu morkketuwaappenne nuunanna eqettiyaawanttu kushiyaappe ashshanaassa.

⁷² Hawaakka I ootheeddawe, nu aawatoo maarotethaa bessanaassanne, bare geeshsha caaquwaa wozanaa aathanaassa.

⁷³ Nu aawuwaa Abraahaamossi caaqqeedda caaquwaa qoppanaw,

⁷⁴ nu morkketuwaa kushiyaappe kesiide yashshay banttaan aw oothanaadan maataa nuussi immeedda.

⁷⁵ Hawenneekka, nuuna nu wodiyaa ubbaan geeshshatethaaninne xillotethaan bare sinthaan essana diraassa.

⁷⁶ Zaariidekka, neenoo, ta na7aw, Dhoqqa Xoossaa nabiyaa geetettanaassa; ogiyaa giigissanaw Godaappe sinthanna baanaassa.