ሉቃሳ 1:21-77 in Gofa

²¹ ሄ ዎዴ ዛካሪያሲ ፆሳ ኬꬂ ጌሊዲ ጋምዒዳ ጊሾ ኣይቢ ሃኒዴ ጊዲ ኣሳይ ካሬን ናጊሼ ጋምዒስ።

²² ኢ ካሬ ኬዪዲ ኤንታና ኦዲሳናው ዳንዳዒቤና። ማሊ ቤሶፔ ኣቲን ኦዴታናው ዳንዳዖናይሳ ቤዒዳ ዎዴ ቆንጬꬂ ቤዒዳይሳ ኤሪዶሶና።

²³ ዛካሪያሲ ሃጋዞ ዎዲያ ፖሊዲ ባ ሶ ሲሚስ።

²⁴ ሄሳፌ ጉዬ፥ ኢያ ማቺያ ኤልሳቤፃ ቃንꬃታሱ። ኢቻሹ ኣጌና ኩሜꬂ ባና ጌንꬃዳ ጋምዓሱ።

²⁵ ኢያ፥ «ጎዳይ ባ ማሮታን ታ ቦሪያ ኣሳ ጊዶፌ ዲጋናው ቤዒዲ ሃ ዎዲያን ሃይሳ ኦꬂስ» ያጋሱ።

²⁶ ኤልሳቤፃ ቃንꬃቲን ኡሱፑንꬃ ኣጌናን፥ ፆሳይ ኪታንቹዋ ጋብሬሌ ጋሊላ ቢታን ዴዒያ ናዚሬቴ ካታማ ኪቲስ።

²⁷ ካዉዋ ዳዊቴ ሼሻፔ ጊዲዳ ዮሴፋ ጊያ ኡራስ ኦይሼቲዳ ጌላዔኮ ኪቲስ። ሄ ጌላዒያ ማይራሞ ጌቴታዉሱ።

²⁸ ኪታንቾይ ኢኮ ቢዲ፥ «ዳሮ ዶሴቲዳሬ፥ ሳሮይ ኔው ጊዶ፥ ፆሳይ ኔራ ዴዔስ» ያጊስ።

²⁹ ማይራማ ኢያ ኦዳን ዳሮ ዳጋማዳ፥ «ሃይሲ ኣይቢ ሳሮꬆ» ጋዳ ሄታሱ።

³⁰ ኪታንቾይ ዛሪዲ፥ «ማይራሜ፥ ባቦፋ፤ ኔኒ ፆሳ ሲንꬃን ሳባ ዴማዳሳ።

³¹ ሄኮ ኔኒ ቃንꬃታና ኣዴ ናዓ ዬላና፥ ኢያ ሱንꬃካ ዬሱሳ ጋዳ ሱንꬃና።

³² ኢ ጊታ ጊዳና፥ ኡባፌ ቦላ ፆሳ ናዓ ጌቴቲ ፄጌታና። ጎዳ ፆሳይ ኢያ ኣዋ ዳዊቴ ኣራታ ኢያው ኢማና።

³³ ኢ ያይቆባ ሼሻ ቦላ ሜሪናው ካዎታና፤ ኢያ ካዎቴꬃስ ዛዊ ባዋ» ያጊስ።

³⁴ ማይራማ ኪታንቹዋኮ፥ «ሄሲ ዋኒዲ ሃናኔ? ታ ኣዴ ኤሪኬ» ያጋሱ።

³⁵ ኪታንቾይ ዛሪዲ፥ «ጌሻ ኣያናይ ኔ ቦላ ዎꬋና፥ ኡባፌ ቦላ ፆሳ ዎልቃይ ኔ ቦላ ኩያታና። ሄሳ ጊሾ፥ ዬሌቲያ ጌሻ ናዓይ ፆሳ ናዓ ጌቴታና።

³⁶ ሄኮ፥ ኔ ዳቢያ ኤልሳቤፃ ባ ጪማቴꬃ ላይꬃን ኣዴ ናዓ ቃንꬃታሱ። ኢያ ማይንꬂ ጌቴቲዳሮ፥ ሺን ሃዒ ኡሱፑንꬃ ኣጌና ኦይካሱ።

³⁷ ፆሳ ፆኒያባይ ባዋ» ያጊስ።

³⁸ ማይራማ፥ «ሄኮ፥ ታኒ ጎዳ ኣይሊው፥ ኔ ቃላዳ ታው ሃኖ» ያጋሱ። ሄሳፌ ጉዬ፥ ኪታንቾይ ኢፔ ሻኬቲስ።

³⁹ ማይራማ ሄ ሳሚንታን ዴንዳዳ ዪሁዳ ቢታን ዴዒያ ኢሲ ጌዜ ካታማ ባሱ።

⁴⁰ ዛካሪያሳ ሶ ጌላዳ ኤልሳቤፆ ሳሮꬃሱ።

⁴¹ ኤልሳቤፃ ማይራሚ ሳሮꬁዋ ሲዒዳ ዎዴ ኢ ኡሉዋን ዴዒያ ናዓይ ኡፋይሳን ጉፒስ። ኤልሳቤፃ ጌሻ ኣያናን ኩማዳ፥

⁴² ባ ቃላ ꬎቁ ኦꬃዳ፥ «ኔኒ ማጫሳ ጊዶፌ ኣንጄቲዳሮ፥ ኔ ቃንꬃቲዳ ናዓይካ ኣንጄቲዳይሳ።

⁴³ ሃኖሺን፥ ታ ጎዳ ኣዬ፥ ኔኒ ታኮ ያና ሜላ ታኒ ኦኔ?

⁴⁴ ሄኮ ኔ ሳሮꬁዋ ታ ሲዒዳ ዎዴ ታ ኡሉዋን ዴዒያ ናዓይ ኡፋይሳን ጉፒስ።

⁴⁵ ጎዳይ ፖላና ጊዲ ኢሚዳ ቃላ ኣማኒዳራ፥ ኢያ ኣንጄቲዳሮ» ያጋሱ።

⁴⁶ ማይራማ ሃይሳዳ ያጋሱ፡ «ታ ሼምፒያ ጎዳ ቦንቻዉሱ፥

⁴⁷ ታ ኣያናይ ꬋሊያ ፆሳን ኡፋይቴስ።

⁴⁸ ኢ ባ ኣይሌ ካዉሻቴꬃ ቤዒስ። ሃቺፌ ዶሚዲ ዬሌቴꬂ ኡባይ ታና ኣንጄቲዳሮ ጋና።

⁴⁹ ኣይስ ጊኮ፥ ዎልቃማ ጊዲዳ ኢ፥ ታው ጊታባ ኦꬂስ። ኢያ ሱንꬃይ ጌሻ።

⁵⁰ ኢያ ቦንቼይሳታ ቦላ፥ ኢያ ማሮቴꬃይ ሜሪናፔ ሜሪና ጋካናሳ።

⁵¹ ባ ቄሲያን ሚኖባ ኦꬂስ፥ ባንታ ዎዛናን ኦቶርቴይሳታ ላሊስ።

⁵² ዎልቃማ ካዎታ ኣራታፔ ካዉሺስ፤ ባንታና ካዉሺዳይሳታ ካቦይስ።

⁵³ ኮሻቲዳይሳታ ሎዖባን ካልሲስ፥ ሺን ዱሬታ ሜላ ኩሼ ዬዲስ።

⁵⁴ ባ ማሮታ ቆፒዲ፥ ባ ኣይሊያ ኢስራዔሌ ማዲስ።

⁵⁵ ሄሲካ ኑ ኣዋታስ ኦዲዳ ቃላ፥ ኣብራሃሜሲኔ ኢያ ሼሻስ ጊዳይሳ ሜሪናው ፖላናሳ» ያጋሱ።

⁵⁶ ማይራማ ኤልሳቤፂ ማታን ሄꬑ ኣጌና ሜላ ጋምዓዳ ባ ሶ ሲማሱ።

⁵⁷ ኤልሳቤፂስ ዬሎ ቃማይ ጋኪን ኣዴ ናዓ ዬላሱ።

⁵⁸ ኢ ሾሮቲኔ ኢ ዳቦቲ ጎዳይ ጊታ ማሮታ ኦꬂዳይሳ ሲዒዲ፥ ኢራ ኢሲፌ ኡፋይቲዶሶና።

⁵⁹ ሆስፑንꬃ ጋላሳን ዮጋ ናዓ ቃፃራናው ዪዶሶና። ኢያ ኣዋ ሱንꬃን ዛካሪያሳ ጊዲ ሱንꬃናው ኮዪዶሶና።

⁶⁰ ሺን ኣያ፥ «ኣካይ፥ ዮሃኒሳ ጌቴታናው ቤሴስ» ያጋሱ።

⁶¹ ኤንቲካ፥ «ኔ ዳቦታፔ ሃ ሱንꬃን ፄጌቲዳይ ኦኒካ ባዋ» ያጊዶሶና።

⁶² ኢያ ኣዋይ ኦና ጊዲ ሱንꬃኔኮ ኤራናው ኮዪዲ ኢያ ማላ ኦይቺዶሶና።

⁶³ ኢ ፃፊያባ ኦይቺ ኤኪዲ፥ «ኢያ ሱንꬃይ ዮሃኒሳ» ጊዲ ፃፊስ። ኡባይ ኢ ፃፊዳይሳ ቤዒዲ ማላሌቲዶሶና።

⁶⁴ ኢራ ዛካሪያሳ ኢንፃርሳይ ቢሌቲስ፥ ፆሳ ጋላቲሼ ኦዴቴꬂ ኦይኪስ።

⁶⁵ ሾሮቲ ኡባይ ያሻን ኩሚዶሶና። ሃ ሃኒዳባይ ጌዜ ዪሁዳ ቢታን ኦዴቲስ።

⁶⁶ ሄሳ ሲዒዳ ኡባይ፥ «ሃ ናዓይ ኣይ ሃናንዴሻ» ጊዲ ባንታ ጊዶን ኦዴቲዶሶና። ጎዳ ኩሼይ ኢያራ ዴዔስ።

⁶⁷ ዮሃኒሳ ኣዋይ ዛካሪያሲ ጌሻ ኣያናን ኩሚዲ ሃይሳዳ ያጊዲ ቲንቢቴ ኦዲስ።

⁶⁸ «ኢስራዔሊያ ጎዳይ ጋላቴቶ፥ ዪዲ ባ ኣሳ ዎዚስ።

⁶⁹ ባ ኣይሊያ ዳዊቴ ኬꬃን ኣቶቴꬃ ካጪያ ዴንꬂስ።

⁷⁰ ሄሲካ ቤኒ ዎዴ ጌሻ ናቤታ ዶናን ኦዴቲዳይሳ ሜላ፥

⁷¹ ኢያ ኣሾይ ኑ ሞርኬታፔኔ ኑራ ኤቄቲያ ኡባ ኩሺያፔ።

⁷² ሄሳ ኢ ኦꬂዳይ ኑ ኣዋታስ ባ ማሮታ ቤሳናሲኔ፥ ባ ጌሻ ጫቁዋ ናጋናሳ።

⁷³ ኑ ኣዋ ኣብራሃሜስ ጫቂዳ ጫቁዋ ቆፓናሲኔ

⁷⁴ ኑ ሞርኬታ ኩሼፔ ኬሲዲ ያሺ ባይና ኢያ ሃጋዛና ሜላሳ።

⁷⁵ ኑ ላይꬃ ኡባን ጌሻቴꬃኒኔ ፂሎቴꬃን ባ ሲንꬃን ኑና ኤሳናሳ።

⁷⁶ ቃሲ ላ ናዓው፥ ኔኒ ኡባፌ ቦላ ፆሳ ናቤ ጌቴታና። ጎዳ ኦጊያ ሎይꬃናው ኔ ኢያ ሲንꬃን ባና።

⁷⁷ ኤንታ ናጋራይ ቁሼቲን፥ ኤንቲ ኣቶቴꬂ ዴማናይሳ ኔ ጎዳ ዴሪያስ ኦዳና።

²¹ He wode Zakkariyaasi Xoossa Keethi gelidi gam77ida gisho aybi hanide gidi asay karen naagishe gam77is.

²² I kare keyidi enttana odisanaw dandda7ibeenna. Malli besoppe attin odettanaw dandda7onayssa be7ida wode qonccethi be7idayssa eridosona.

²³ Zakkariyaasi haggazo wodiya polidi ba soo simmis.

²⁴ Hessafe guye, iya machchiya Elssabeexa qanthatasu. Ichchashu ageena kumethi bana geenthada gam77asu.

²⁵ Iya, “Goday ba maarotan ta boriya asaa giddofe digganaw be7idi ha wodiyan hayssa oothis” yaagasu.

²⁶ Elssabeexa qanthatin usuppuntha ageenan, Xoossay kiitanchchuwa Gabreele Galiila biittan de7iya Naazirete katamaa kiittis.

²⁷ Kawuwa Dawite sheeshaappe gidida Yoosefa giya uraas oyshettida geela7eekko kiittis. He geela7iya Mayraamo geetettawusu.

²⁸ Kiitanchchoy iikko bidi, “Daro dosettidare, saroy new gido, Xoossay neera de7ees” yaagis.

²⁹ Mayraama iya odan daro dagammada, “Hayssi aybi sarotho” gada heetasu.

³⁰ Kiitanchchoy zaaridi, “Mayraame, babbofa; neeni Xoossaa sinthan saba demmadasa.

³¹ Hekko neeni qanthatana adde na7a yelana, iya sunthaaka Yesuusa gada sunthana.

³² I gita gidana, Ubbaafe Bolla Xoossaa na7aa geetetti xeegettana. Godaa Xoossay iya aawa Dawite araata iyaw immana.

³³ I Yayqooba sheeshaa bolla merinaw kawotana; iya kawotethaas zawi baawa” yaagis.

³⁴ Mayraama kiitanchchuwako, “Hessi waanidi hananee? Ta adde erikke” yaagasu.

³⁵ Kiitanchchoy zaaridi, “Geeshsha Ayyaanay ne bolla wodhdhana, Ubbaafe Bolla Xoossaa wolqqay ne bolla kuyattana. Hessa gisho, yelettiya geeshsha na7ay Xoossaa Na7aa geetettana.

³⁶ Hekko, ne dabbiya Elssabeexa ba cimatetha laythan adde na7a qanthatasu. Iya maynthi geetettidaaro, shin ha77i usuppuntha ageena oykkasu.

³⁷ Xoossaa xooniyabay baawa” yaagis.

³⁸ Mayraama, “Hekko, taani Godaa aylliw, ne qaalada taw hano” yaagasu. Hessafe guye, kiitanchchoy iippe shaakettis.

³⁹ Mayraama he saaminttan denddada Yihuda biittan de7iya issi geze katama basu.

⁴⁰ Zakkariyaasa soo gelada Elssabeexo sarothasu.

⁴¹ Elssabeexa Mayraami sarothuwa si7ida wode I uluwan de7iya na7ay ufayssan guppis. Elssabeexa Geeshsha Ayyaanan kumada,

⁴² ba qaala dhoqqu oothada, “Neeni maccasaa giddofe anjjettidaaro, ne qanthatida na7aykka anjjettidayssa.

⁴³ Hanoshin, ta Godaa aaye, neeni taakko yaana mela taani oonee?

⁴⁴ Hekko ne sarothuwa ta si7ida wode ta uluwan de7iya na7ay ufayssan guppis.

⁴⁵ Goday polana gidi immida qaala ammanidaara, iya anjjettidaaro” yaagasu.

⁴⁶ Mayraama hayssada yaagasu: “Ta shemppiya Godaa bonchchawusu,

⁴⁷ ta Ayyaanay dhaliya Xoossan ufayttees.

⁴⁸ I ba aylle kawushshatethaa be7is. Hachchife doomidi yeletethi ubbay tana anjjettidaaro gaana.

⁴⁹ Ays giikko, wolqqaama gidida I, taw gitabaa oothis. Iya sunthay Geeshshaa.

⁵⁰ Iya bonchcheyssata bolla, iya maarotethay merinaappe merinaa gakkanaassa.

⁵¹ Ba qesiyan minobaa oothis, bantta wozanan otortteyssata laallis.

⁵² Wolqqaama kawota araataappe kawushshis; banttana kawushshidayssata kabboys.

⁵³ Koshattidayssata lo77oban kalssis, shin dureta mela kushe yeddis.

⁵⁴ Ba maarota qoppidi, Ba aylliya Isra7eele maaddis.

⁵⁵ Hessika nu aawatas odida qaalaa, Abrahamesinne iya sheeshas gidayssa merinaw polanaassa” yaagasu.

⁵⁶ Mayraama Elssabeexi matan heedzu ageena mela gam77ada ba soo simmasu.

⁵⁷ Elssabeexis yelo qammay gakkin adde na7a yelasu.

⁵⁸ I shoorotinne I dabboti Goday gita maarota oothidayssa si7idi, iira issife ufayttidosona.

⁵⁹ Hosppuntha gallasan yooga na7aa qaxxaranaw yidosona. Iya aawa sunthan Zakkariyaasa gidi sunthanaw koyidosona.

⁶⁰ Shin aayyaa, “Akkay, Yohaannisa geetettanaw bessees” yaagasu.

⁶¹ Enttika, “Ne dabbotappe ha sunthan xeegettiday oonikka baawa” yaagidosona.

⁶² Iya aaway oona gidi sunthaneekko eranaw koyidi iya malla oychchidosona.

⁶³ I xaafiyabaa oychchi ekkidi, “Iya sunthay Yohaannisa” gidi xaafis. Ubbay I xaafidayssa be7idi malaalettidosona.

⁶⁴ Iira Zakkariyaasa inxarssay bilettis, Xoossaa galatishe odetethi oykkis.

⁶⁵ Shooroti ubbay yashshan kumidosona. Ha hanidabay geze Yihuda biittan odettis.

⁶⁶ Hessa si7ida ubbay, “Ha na7ay ay hananddeshsha” gidi bantta giddon odettidosona. Godaa kushey iyara de7ees.

⁶⁷ Yohaannisa aaway Zakkariyaasi Geeshsha Ayyaanan kumidi hayssada yaagidi tinbbite odis.

⁶⁸ “Isra7eeliya Goday galatetto, yidi ba asaa wozis.

⁶⁹ Ba aylliya Dawite keethan atotethaa kaciya denthis.

⁷⁰ Hessika beni wode geeshsha nabeta doonan odettidayssa mela,

⁷¹ Iya ashoy nu morkketappenne nuura eqettiya ubbaa kushiyappe.

⁷² Hessa I oothiday nu aawatas ba maarota bessanaasinne, ba geeshsha caaquwa naaganaassa.

⁷³ Nu aawa Abrahames caaqqida caaquwa qoppanasinne

⁷⁴ nu morkketa kusheppe kessidi yashshi baynna iya haggaazana melassa.

⁷⁵ Nu laytha ubban geeshshatethaninne xillotethan ba sinthan nuna essanaassa.

⁷⁶ Qassi laa na7aw, neeni Ubbaafe Bolla Xoossaa nabe geetettana. Godaa ogiya loythanaw ne iya sinthan baana.

⁷⁷ Entta nagaray qushettin, entti atotethi demmanayssa ne Godaa deriyas odana.