ሉቃሳ 18:14-43 in Gofa

¹⁴ ታ ሂንቴው ኦዴይሳ ሲዒቴ፤ ፋሪሳዊያፔ ሃይሲ ቃራፃ ቃንፂሴይሲ ፆሳ ሲንꬃን ፂሎ ጊዲዲ ባ ሶ ሲሚስ። ኣይስ ጊኮ፥ ባና ꬎቁ ꬎቁ ኦꬂያ ኣሲ ካዉያና፥ ባና ካዉሺያ ኣሲ ꬎቁ ꬎቁ ጋና» ያጊስ።

¹⁵ ዬሱሲ ዮጋ ናይታ ቦላ ባ ኩሺያ ዎꬂዲ ኣንጃና ሜላ ኣሳይ ኢያኮ ኤሆሶና። ዬሱሳ ታማሬቲ ሄሳ ቤዒዲ ኣይስ ዬሱሳኮ ኤሄቲ ያጊዲ ካጪዶሶና።

¹⁶ ሺን ዬሱሲ ናይታ ባኮ ፄጊዲ፥ «ዮጋ ናይቲ ታኮ ያናይሳ ዲጎፊቴ፤ ዮ ጊቴ። ኣይስ ጊኮ፥ ፆሳ ካዎቴꬃይ ኤንታዳ ሃኒዳይሳታሳ።

¹⁷ ታኒ ሂንቴው ቱማ ኦዳይስ፤ ፆሳ ካዎቴꬃ ዮጋ ናይታꬆ ኤኮናይ ኦኒካ ያ ጌሌና» ያጊስ።

¹⁸ ኣይሁዴ ሃላቃታፔ ኢሶይ፥ «ኬሃ ኣስታማሪያው፥ ሜሪና ዴዑዋ ዴማናው ኣይ ኦꬆ?» ያጊዲ ኦይቺስ።

¹⁹ ዬሱሲ ኢያኮ፥ «ኣይስ ታና ኬሃው ያጋዳ ፄጋይ? ኢሲ ፆሳፌ ኣቲን ሃሪ ኬሂ ባዋ።

²⁰ ላሞፋ፥ ዎꬎፓ፥ ካይሶቶፓ፥ ዎርዶ ማርካቶፋ፥ ኔ ኣዋኔ ኔ ኣዪው ቦንቻ ያጊያ ኪታ ኤራይ» ያጊዲ ኦይቺስ።

²¹ ኡራይካ፥ «ሄሳታ ኡባ ታኒ ናዓቴꬃፌ ዶማዳ ናጋሼ ጋምዓስ» ያጊስ።

²² ዬሱሲ ሄሳ ሲዒዳ ዎዴ «ሂዛ፥ ኔው ኢሲባይ ፓጬስ፤ ኔው ዴዒያባ ኡባ ባይዛዳ ማንቆታስ ኢማ፤ ሳሎን ኔና ሻሎይ ናጌስ። ያታ ሲማዳ ታና ካላ» ያጊስ።

²³ ሺን ኡራይ ሄሳ ሲዒዳ ዎዴ ኢያው ዳሮ ሻሎይ ዴዒያ ጊሾ ዳሮ ቂሮቲስ።

²⁴ ዬሱሲ ኡራ ቤዒዲ፥ «ዱሬ ኣሳስ ፆሳ ካዎቴꬃ ጌሎይ ዋኒዲ ኡንዓንዴሻ?

²⁵ ዱሬይ ፆሳ ካዎቴꬃ ጌላናይሳፌ ጊማሌይ ናርፔ ሉሆራ ካንꬄይሲ ካዉዬስ» ያጊስ።

²⁶ ሄሳ ሲዒዳ ኣሳይ፥ «ሄሳ ጊዲኮ ኦኒ ኣታኔ?» ያጊዶሶና።

²⁷ ዬሱሲ፥ «ኣሳስ ዳንዳዔቶናባይ ፆሳስ ዳንዳዔቴስ» ያጊስ።

²⁸ ጴፂሮሲ፥ «ሄኮ ኑኒ ኑባ ኡባ ኣጊዲ ኔና ካሊዳ» ያጊስ።

²⁹ «ዬሱሲ ቱማ ታ ሂንቴው ኦዳይስ፤ ፆሳ ካዎቴꬃስ ጊዲ ባ ኬꬃ ዎይኮ ባ ማቺው ዎይኮ ባ ኢሻታ ዎይኮ ባ ኣዋኔ ባ ኣዪው ዎይኮ ባ ናይታ ኣጊዳይ፤

³⁰ ሃ ዎዲያን ዳኮ ዳሮ፥ ያና ኣላሚያን ሜሪና ዴዑዋ ኤኮናይ ኦኒካ ባዋ» ያጊስ።

³¹ ዬሱሲ ታማኔ ናምዓታ ባኮ ፄጊዲ፥ «ኣኔ ዬሩሳላሜ ቦስ፥ ናቤቲ ኣሳ ናዓባ ፃፊዳባ ኡባይ ያን ፖሌታና።

³² ኢ ኣይሁዴ ጊዶና ኣሳስ ኣꬊዲ ኢሜታና። ኤንቲ ኢያ ቶቻና፥ ጫያናኔ ኢያ ቦላ ጩታና።

³³ ኢያ ጋራፊዳፔ ጉዬ ዎꬋና፥ ሺን ሄꬓንꬆ ጋላሳን ኢ ሃይቆፔ ዴንዳና» ያጊስ።

³⁴ ሺን ኢያ ታማሬቲ ሄሳ ኡባፌ ኢሲባካ ኣኬኪቦኮና። ኢያ ፁራይ ኤንታው ቆሴቲዳ ጊሾ ኢ ዎይጊዳኮ ኤሪቦኮና።

³⁵ ዬሱሲ ኢያርኮ ማታቲያ ዎዴ ኢሲ ቆቄ ኡራይ ኦጌ ጋፃን ኡቲዲ ዎሴስ።

³⁶ ቆቄ ኡራይ ኣሳይ ሄ ቤሳራ ኣꬊሺን ሲዒዲ፥ «ኢ ኣይቤ?» ጊዲ ኦይቺስ።

³⁷ ኤንቲ፥ «ናዚሬቴ ዬሱሲ ሃይሳራ ኣꬌስ» ያጊዶሶና።

³⁸ ኢ፥ «ዳዊቴ ናዓው፥ ዬሱሳ፥ ታና ማራርኪ» ያጊዲ ዋሲስ።

³⁹ ሲንꬄ ሲንꬄ ቢያ ኣሳቲ፥ «ሲዒ ጋ» ጊዲ ሃንቄቲዶሶና። ሺን ኢ፥ «ዳዊቴ ናዓው፥ ታና ማራ» ያጊዲ ዳርሲ ዋሲስ።

⁴⁰ ዬሱሲ ኤቂዲ ኡራ ባኮ ኤሃና ሜላ ኪቲስ። ኡራይካ፥ ኢያኮ ሺቂን፥

⁴¹ «ታ ኔው ኣይ ኦꬃና ሜላ ኮያይ?» ያጊዲ ኦይቺስ። ቆቄይ፥ «ጎዳው ታ ፄላናው ኮያይስ» ያጊስ።

⁴² ዬሱሲ፥ «ፄላ፥ ኔ ኣማኖይ ኔና ፓꬂስ» ያጊስ።

⁴³ ኡራይ ሶሁዋራ ፄሊ ኣጊስ። ፆሳ ቦንቺሼ ዬሱሳ ካሊስ። ኣሳ ኡባይ ሄሳ ቤዒዲ ፆሳ ጋላቲዶሶና።

¹⁴ Ta hinttew odeyssa si7ite; Farisaawiyappe hayssi qaraxa qanxiseyssi Xoossaa sinthan xillo gididi ba soo simmis. Ays giikko, bana dhoqqu dhoqqu oothiya asi kawuyana, bana kawushshiya asi dhoqqu dhoqqu gaana” yaagis.

¹⁵ Yesuusi yooga nayta bolla ba kushiya wothidi anjjana mela asay iyaakko ehoosona. Yesuusa tamaareti hessa be7idi ays Yesuusakko eheeti yaagidi kaccidosona.

¹⁶ Shin Yesuusi nayta baakko xeegidi, “Yooga nayti taakko yaanayssa diggofite; yo giite. Ays giikko, Xoossaa kawotethay enttada hanidayssatassa.

¹⁷ Taani hinttew tuma odays; Xoossaa kawotethaa yooga naytatho ekkonnay oonikka yaa gelenna” yaagis.

¹⁸ Ayhude halaqatappe issoy, “Keeha asttamaariyaw, merinaa de7uwa demmanaw ay ootho?” yaagidi oychchis.

¹⁹ Yesuusi iyaakko, “Ays tana keehaw yaagada xeegay? Issi Xoossaafe attin hari keehi baawa.

²⁰ Laammofa, wodhoppa, kaysotoppa, worddo markkattofa, ne aawanne ne aayiw bonchcha yaagiya kiitaa eray” yaagidi oychchis.

²¹ Uraykka, “Hessata ubbaa taani na7atethafe doomada naagashe gam77as” yaagis.

²² Yesuusi hessa si7ida wode “Hiza, new issibay paccees; new de7iyaba ubbaa bayzada manqotas imma; salon nena shaloy naagees. Yaata simmada tana kaalla” yaagis.

²³ Shin uray hessa si7ida wode iyaw daro shaloy de7iya gisho daro qiirottis.

²⁴ Yesuusi uraa be7idi, “Dure asas Xoossaa kawotethaa geloy waanidi un77anddeshsha?

²⁵ Durey Xoossaa kawotethaa gelanayssafe gimaley narppe luhora kantheyssi kawuyees” yaagis.

²⁶ Hessa si7ida asay, “Hessa gidikko ooni attanee?” yaagidosona.

²⁷ Yesuusi, “Asas dandda7ettonabay Xoossaas dandda7ettees” yaagis.

²⁸ Phexiroosi, “Hekko nuuni nubaa ubbaa aggidi nena kaallida” yaagis.

²⁹ “Yesuusi tuma ta hinttew odays; Xoossaa kawotethaas gidi ba keethaa woykko ba machchiw woykko ba ishata woykko ba aawanne ba aayiw woykko ba nayta aggiday;

³⁰ ha wodiyan dakko daro, yaana alamiyan merinaa de7uwa ekkonnay oonikka baawa” yaagis.

³¹ Yesuusi tammanne nam77ata baakko xeegidi, “Ane Yerusalaame boos, nabeti Asa Na7aabaa xaafidaba ubbay yan polettana.

³² I Ayhude gidonna asaas aadhdhidi imettana. Entti iya toochchana, cayananne iya bolla cuttana.

³³ Iya garaafidaappe guye wodhana, shin heedzantho gallasan I hayqoppe denddana” yaagis.

³⁴ Shin iya tamaareti hessa ubbaafe issibaakka akeekibookkona. Iya xuuray enttaw qosettida gisho I woygidaakko eribookkona.

³⁵ Yesuusi Iyaarkko matattiya wode issi qooqe uray oge gaxan uttidi woossees.

³⁶ Qooqe uray asay he bessaara aadhdhishin si7idi, “I aybe?” gidi oychchis.

³⁷ Entti, “Naazirete Yesuusi hayssara aadhdhees” yaagidosona.

³⁸ I, “Dawite na7aw, Yesuusa, tana maararkii” yaagidi waassis.

³⁹ Sinthe sinthe biya asati, “Si7i ga” gidi hanqettidosona. Shin I, “Dawite na7aw, tana maara” yaagidi darssi waassis.

⁴⁰ Yesuusi eqqidi uraa baakko ehana mela kiittis. Uraykka, iyaakko shiiqin,

⁴¹ “Ta new ay oothana mela koyay?” yaagidi oychchis. Qooqey, “Godaw ta xeellanaw koyays” yaagis.

⁴² Yesuusi, “Xeella, ne ammanoy nena pathis” yaagis.

⁴³ Uray sohuwara xeelli aggis. Xoossaa bonchchishe Yesuusa kaallis. Asa ubbay hessa be7idi Xoossaa galatidosona.