ሉቃሳ 12:18-49 in Dawro

¹⁸ ሃዋዳን ያጊ ማሌዳ፤ ‹ታኒ ዎታኔ ጎፔ፥ ታው ዴዒያ ዬሲያ ኮላዴ፥ ሃራ ኣኪያ ዬሲያ ሜꬋና ያጊዴ ማሌዳ፤ ሄዋን ታ ካꬃኔ ታው ዴዒያ ሚሻ ኡባ ዎꬃና።

¹⁹ ያታዴ ታና፥ «ኔ ካጫይ ዳሮ ሎዓ፤ ኔው ዳሮ ዎዲያሲ ጊዲያ ማፁዋ ሺሻዳ፤ ሲሚ ሼምፓዴ ማ፥ ኡሻ፥ ናሼታ» ጋና› ያጌዱ።

²⁰ «ሺን ፆሳይ ኣ፥ ‹ሃ ቦዛው፥ ሃቼ ቃማ ኔኒ ሃይቃ። ያቲና ሃ ኔኒ ሺሼዳ ማፁ ኡባይ ኦሲ ጊዳናዌ?› ያጌዳ።

²¹ «ባሬው ቢታ ቦላን ሻሉዋ ሺሺያዌ፥ ፆሳ ሲንꬃን ቃይ ማንቆ ጊዴዳ ኣሳይ ሃቢታኒያ ማላ» ያጌዳ።

²² ሃዋፔ ካላ ዬሱሲ ባሬና ካሊያዋንታ፥ «ሃዋ ዲራው፥ ታ ሂንቴው ኦዳይ፡ ሂንቴንቱ ፓፃ ዴዓናው ኣያ ማኔ? ሂንቴንቱ ቦላሲ ኣያ ማያኔ? ያጊዴ ሂርጎፒቴ።

²³ «ጋሱካ፥ ሼምፑ ቁማፔ፥ ቃሲ ኣሳቴꬃይ ማዩዋፔ ኣꬌኔ?

²⁴ ኣኔ ቁራቱዋ ፄሊቴ፤ ኡንቱንቱ ዜሪኪኖ፤ ጫኪኪኖ፤ ኡንቱንቶ ካꬃ ሺሺያ ሳዓይ ዎይ ዬሲ ባዋ፤ ሃኖፔ ኣቲን፥ ኡንቱንታ ፆሳይ ሚዜ፤ ሂንቴንቱ ካፋቱዋፔ ዳሮፔ ዳሪኪቴ?

²⁵ ሂንቴንቱፔ ዳሪ ቆፒዴ ዳሮ ዎዲያ ዴዓናው ዳንዳዪያዌ ኦኔ?

²⁶ «ሲሚ ሂንቴንቱ ሃ ላፋባ ኦꬃናው ዳንዳዬናዋንታ ጊዶፔ ኣያው ሃራባው ሂርጌቲቴ?

²⁷ ጪሻቱ ዎቲ ዲጪኖንቶ ኣኔ ፄሊቴ፤ ኡንቱንቱ ኪታን ዳቡሪኪኖ፤ ፑቱዋ ሱቂኪኖ፤ ጊዶሺን ታኒ ሂንቴው ኦዲያዌ፥ ሶሎሞኔ ሄዋ ኬና ቦንቼቴዳዋ ጊዲዴ፥ ሄ ጪሻቱዋፔ ኢቱዋ ማላኔ ማዪቤና።

²⁸ ሂንቴንቶ ላፋ ኣማኑ ዴዒያዋንቶ፥ ያቶፔ ፆሳይ ሃቼ ቤቲዴ፥ ዎንቲ ታማን ኤፃናው ኦሌቲያ፥ ዴንባን ዶሊያ ማታ ሃዋዳን ማዪዚያዋ ጊዶፔ፥ ሂንቴንታ ዎቲዴ ኡንቱንቱፔ ኣꬂዴ ማዪዜኔ?

²⁹ «ሃዋ ዲራው፥ ‹ኣያ ማኔ? ኣያ ኡሻኔ?› ያጊዴ ኡባ ዎዴ ኮዮፒቴኔ ሂርጎፒቴ።

³⁰ ኣያው ጎፔ፥ ሃዋ ዴማናው ሃ ኣላሚያን ዴዒያ ፆሳን ኣማኔቴና ኣሳይ ሂርጌቲኖ። ሂንቴንቶ ሃዌ ኡባይ ኮሺያዋ ሳሉዋን ዴዒያ ሂንቴንቱ ኣዉ ኤሬ።

³¹ ሄዋ ሃኒያዋ ኣጊዴ፥ ፆሳ ካዉቴꬃ ኮዪቴ፤ ኢ ሂንቴንታ ኮሺያዋ ኡባ ኢማናዋ።

³² «ሂንቴንቱ ጉꬃ ጊዲንቶኔ፥ ሳሉዋ ሂንቴንቱ ኣዉ ባሬ ካዉቴꬃ ሂንቴንቶ ኢማናው ናሼቴዳ ዲራው ያዮፒቴ።

³³ «ሂንቴው ዴዒያዋ ዛሊዒዴ ማንቆ ኢሚቴ፤ ካዪሱ ሺቄናሳን፥ ቢልዓይካ ሜናሳን፥ ሳሉዋን ዉሬና ሚሻ ዳጋዪዴ፥ ኤጬና ቃርጪታቱዋ ሂንቴንቱ ሁጴው ዎꬂቴ።

³⁴ ኣያው ጎፔ፥ ሂንቴንቱ ዎዛናይ ሂንቴ ሚሻይ ዴዒያሳን ዴዓናዋ።

³⁵ «ሂንቴ ፄሳይ ዳንጬቶዋ፥ ሂንቴ ፆምፒካ ፖዔዳዋ ጊዶ።

³⁶ ሂንቴንቱካ፥ ባሬንቱ ጎዳይ ዪዴ ፔንጊያ ቆፂያ ዎዴ፥ ኤሌካ ዶያናው ቡላቻፔ ሲማና ጋካናው ናጊያ ኦሳንቻቱዋ ማላቲቴ።

³⁷ ባሬንቱ ጎዳይ ሶይ ዬዳ ዎዴ ቤጎቲ ዴዒሺን ዴሚያ ሄ ኦሳንቻቱ ኣንጄቴዳዋንታ። ታኒ ቱሙዋ ጋይ፤ ኢ ኡንቱንታ፥ ‹ኡቲቴ› ጊዴ፥ ባሬ ዳንጩዋ ሚኒሲዴ ኡንቱንቶ ቁማ ኣꬂዴ ሾባናዋ።

³⁸ ጎዳይ ሄካ ቢላሂያን ዎይ ሄካ ቢላሂያፔ ካላ ዬዳ ዎዴ፥ ቤጎቲዴ ጌንጪ ናጊዴ ቤቲያ ቆማቱ ኣንጄቴዳዋንታ።

³⁹ ሃዋ ቃይ ኤሪቴ፤ ካዪሱ ኣይ ሳቲያን ዪንቶ ጎሊያዉ ኤሪንቶ፥ ጎሊ ቦኬቲያ ዎዴ ጮዑ ጊዴ ፄሌናሺን።

⁴⁰ ኣሳ ናዓይ ቆፔና ሳቲያን ያናዋ፤ ሂንቴንቱ ጊጌቲ ናጊቴ» ያጌዳ።

⁴¹ ጴፂሮሲካ «ጎዳው፥ ሃ ሌሚሱዋ ኔኒ ኦዲያዌ ኑፃላላሴ ሃራ ኡባሲካ ኢቲፔ ኦዳይ?» ያጌዳ።

⁴² ጎዳይካ፥ «ሲሚ ኡንቱንቱ ባሬ ሶይ ኣሳው ቁማ ኢማናው ቤሲያ ሳቲያን ኢማና ማላ፥ ኣ ጎዳይ ሱንꬂያ ኣማኔቴዳኔ ኤራንቻ ሚዚያ ቆማይ ኦኔ?» ያጌዳ።

⁴³ ጎዳይ ሲሚያ ዎዴ ሃዋዳን ኪቴቲና ዴሚያ ቆማይ ኢ ኣንጄቴዳዋ።

⁴⁴ ታኒ ሂንቴው ቱሙዋ ኦዳይ፤ ዴዒያ ማፁዋ ኡባ ቦላን ኣ ሱንꬃናዋ።

⁴⁵ ዬዉዋን ቃሲ ሄ ቆማይ፥ «ታ ጎዳይ ኤሌ ዬና፤ ጋሚዓናዋ» ያጊ ባሬ ዎዛናን ቆፖፔኔ ኣቱማኔ ማጫ ቆማቱዋ ሾቻ ዶሞፔ፥ ቃይካ ኮዮዋዳን ሙሳኔ ኡሻ፥ ማꬆቱሳካ ዶሞፔ፥

⁴⁶ ሄ ቆማ ጎዳይ፥ ኢ ቆፔና ጋላሲኔ ሲꬊቤና ሳቲያን ያናዋ፤ ሄ ዎዲያን ኣ ቃንፄሬꬂዴ፥ ኣ ጊሹዋ ማዳራካ ኣማኔናዋንቱና ኢቲሳ ኡዳናዋ።

⁴⁷ ባሬ ጎዳ ሼኒያ ኤሪዴ ጊጌናዌኔ ኣሼኒያዳን ኪቴቴና ቆማይ፥ ኢ ኢታ ꬎባ ꬎቤታናዋ።

⁴⁸ ኤሪቤናዌ ቃይ ꬎቤታናው ቤሲያዋ ኡዴዳዌ፥ ጉꬃ ꬎቤቴ። ዳሮባይ ኢሜቴዳ ኣሳ ኡባፔ፥ ኣፔ ዳሮባይ ኮዬቴ፤ ዎልቃማ ሃዳራይ ኢሜቶዋፔ፥ ኣፔ ዳሪሲዴ ኮዬቴ።

⁴⁹ ዬሱሲ፥ «ታኒ ዬዳዌ፥ ሃ ሳዓ ቦላ ታማ ሳꬃናሳ፤ ሃዒካ ኤፄዴንቶ፥ ታና ኣይ ኬና ናሼቻናዌሻ።

¹⁸ hawaadan yaagi maleedda; ‘Taani wootane gooppe, taw de7iyaa yeesiyaa kolaade, hara aakkiya yeesiyaa medhdhana yaagiide maleedda; hewaan ta kathaanne taw de7iyaa miishshaa ubbaa wothana.

¹⁹ Yaataade taana, “Ne kaacay daro lo77a; new daro wodiyaassi gidiyaa maxuwaa shiishshaadda; simmi shemppaade ma, usha, nashetta” gaana’ yaageeddu.

²⁰ “Shin Xoossay A, ‘Ha boozaw, hachche qamma neeni hayqqaa. Yaatina ha neeni shiishsheedda maxuu ubbay oossi gidanawee?’ yaageedda.

²¹ “Barew biittaa bollan shaluwaa shiishshiyaawe, Xoossaa sinthan qay manqqo gideedda asay habitaniyaa mala” yaageedda.

²² Hawaappe kaalla Yesuusi barena kaalliyaawantta, “Hawaa diraw, ta hinttew oday: hinttenttu paxa de7anaw ayaa maanee? Hinttenttu bollaassi ayaa mayyanee? yaagiide hirggoppite.

²³ “Gaasuukka, shemppuu qumaappe, qassi asatethay mayuwaappe aadhdhennee?

²⁴ Ane quuratuwaa xeellite; unttunttu zerikkino; cakkikkino; unttunttoo kathaa shiishshiyaa sa7ay woy yeesii baawa; hanoppe attin, unttuntta Xoossay mizee; hinttenttu kafatuwaappe daroppe darikkitee?

²⁵ Hinttenttuppe darii qoppiide daro wodiyaa de7anaw danddayiyaawe oonee?

²⁶ “Simmi hinttenttu ha laafabaa oothanaw danddayennawantta gidooppe ayaw harabaw hirggettiitee?

²⁷ Ciishshatuu wooti dicciinontto ane xeellite; unttunttu kiitaan daaburikkino; puuttuwaa suqqikkino; gidoshshin taani hinttew odiyaawe, Solomone hewaa keena bonchchetteeddawaa gidiide, he ciishshatuwaappe ittuwaa malaanne mayyibeenna.

²⁸ Hinttenttoo laafa ammanuu de7iyaawanttoo, yaatooppe Xoossay hachche beettiide, wontti tamaan eexxanaw olettiyaa, denbban doliyaa maataa hawaadan mayizziyaawaa gidooppe, hinttentta wootiide unttunttuppe aathiide mayizzennee?

²⁹ “Hawaa diraw, ‘Ayaa maanee? Ayaa ushanee?’ yaagiide ubba wode koyyoppitenne hirggoppite.

³⁰ Ayaw gooppe, hawaa demmanaw ha alamiyaan de7iyaa Xoossaan ammanettenna asay hirggettiino. Hinttenttoo hawe ubbay koshshiyaawaa saluwan de7iyaa hinttenttu aawuu eree.

³¹ Hewaa haniyaawaa aggiide, Xoossaa kawutethaa koyyite; I hinttentta koshshiyaawaa ubbaa immanawaa.

³² “Hinttenttu guutha gidinttonne, saluwaa hinttenttu aawuu bare kawutethaa hinttenttoo immanaw nashetteedda diraw yayyoppite.

³³ “Hinttew de7iyaawaa zali77iide manqqoo immite; kayisuu shiiqennasaan, bil77aykka meennasaan, saluwan wurenna miishshaa dagayiidde, ecenna qarccitatuwaa hinttenttu huuphew wothite.

³⁴ Ayaw gooppe, hinttenttu wozanay hintte miishshay de7iyaasaan de7anawaa.

³⁵ “Hintte xeessay danccettowaa, hintte xomppiikka po7eeddawaa gido.

³⁶ Hinttenttukka, barenttu Goday yiide penggiyaa qoxxiyaa wode, ellekka dooyyanaw bullachchaappe simmana gakkanaw naagiyaa oosanchchatuwaa malatite.

³⁷ Barenttu Goday soy yeedda wode beegotti de7ishshin demmiyaa he oosanchchatuu anjjetteeddawantta. Taani tumuwaa gay; I unttuntta, ‘Uttite’ giide, bare danccuwaa minissiide unttunttoo qumaa aathiide shoobbanawaa.

³⁸ Goday hekka bilahiyan woy hekka bilahiyappe kaalla yeedda wode, beegottiide gencci naagiidde beettiyaa qoomatuu anjjetteeddawantta.

³⁹ Hawaa qay erite; kayisuu ay saatiyaan yintto golliyaawuu erintto, golli bookettiyaa wode co77u giide xeellennashshin.

⁴⁰ Asaa na7ay qoppenna saatiyaan yaanawaa; hinttenttu giigetti naagite” yaageedda.

⁴¹ Phexiroosikka “Godaw, ha leemisuwaa neeni odiyaawe nuxalalaassee haraa ubbaassikka ittippe oday?” yaageedda.

⁴² Godaykka, “Simmi unttunttu bare soy asaw qumaa immanaw bessiyaa saatiyaan immana mala, A goday sunthiyaa ammanetteeddanne eranchcha miziyaa qoomay oonee?” yaageedda.

⁴³ Goday simmiyaa wode hawaadan kiitettiina demmiyaa qoomay I anjjetteeddawaa.

⁴⁴ Taani hinttew tumuwaa oday; de7iyaa maxuwaa ubbaa bollan A sunthanawaa.

⁴⁵ Yewuwaan qassi he qoomay, “Ta goday elle yeenna; gami77anawaa” yaagi bare wozanaan qoppooppenne attumanne macca qoomatuwaa shochchaa doommooppe, qaykka koyyowaadan muussaanne ushshaa, mathottussaakka doommooppe,

⁴⁶ he qoomaa goday, I qoppenna gallassinne sidhibeenna saatiyaan yaanawaa; he wodiyan A qanxxereethiide, A gishuwaa maadaaraakka ammanennawanttunna ittisaa udanawaa.

⁴⁷ Bare godaa sheniyaa eriide giigennawenne aasheniyaadan kiitettenna qoomay, I iita dhoobaa dhoobettanawaa.

⁴⁸ Eribeennawe qay dhoobettanaw bessiyaawaa udeeddawe, guuthaa dhoobettee. Darobay imetteedda asaa ubbaappe, aappe darobay koyettee; wolqqaama hadaray imettowaappe, aappe darissiide koyettee.

⁴⁹ Yesuusi, “Taani yeeddawe, ha sa7aa bolla tamaa sathanaassa; ha77ikka eexxeeddentto, taana ay keena nashechchanaweeshsha.