ሉቃሳ 10:3-41 in Dawro

³ ታኒ ዶርሳቱዋዳን ዋላቱዋ ጊዶ ሂንቴና ኪታይ፥ ቢቴ።

⁴ ሂንቴንቱ ኦጌው ኣያኔ ኦይቆፒቴ፡ ቦርሳ፥ ቃርጪቲያ፥ ጫማ፥ ጊዲናካ ኦይቆፒቴ፤ ኣሳና ሳሮቴቲዴ ኦጊያን ዎዲያ ዉርሶፒቴ።

⁵ «ሂንቴንቱ ጌሊያ ጎሌ ኡባ ካሲያን፥ ‹ሳሮቴꬃይ ሃ ጎሌው ጊዶ› ያጊቴ።

⁶ ሄ ጎሊያን ሳሮቴꬃ ዶሲያ ኣሳይ ዴዖፔ፥ ሂንቴንቱ ሳሮታይ ሄ ጎሊያን ኣቃናዋ፤ ኮዬናዋ ጊዶፔ፥ ሂንቴንቱ ሳሮታይ ሂንቴንቶ ሲማናዋ።

⁷ ሄ ጎሊያን ኡንቱንቶ ዴዒያዋፔ ሚዲኔ ኡሺዴ ዴዒሺቴ፤ ኦሳንቻው ኣ ዲርጉዋ ጪጋይ ኮሼ፤ ኢቲ ጎሊያፔ ሃራ ጎሊያ ዩዮፒቴ።

⁸ «ኣይ ካታማኔ ሂንቴንቱ ጌሊያ ዎዴ፥ ኣሳይ ሂንቴና ሞኪ ኣኪዴ ሚዛናው ሺሾዋ ኣያኔ ሚቴ።

⁹ ሄ ካታማቲን ዴዒያ ሃርጋንቻቱዋ ፓꬂዴ ኣሳው፥ ‹ፆሳ ካዉቴꬃይ ሂንቴኮ ማቴዳ› ያጊዴ ኦዲቴ።

¹⁰ ዬዉዋን ቃሲ ኣይ ካታማኔ ጌሎዴ፥ ኣሳይ ሂንቴንታ ሞኪ ኣኬናዋንታ ጊዶፔ ሄ ካታማ ቃꬋኮ ኬሲኔ፥

¹¹ ‹ኑኒ ሂንቴና ዬላያናው፥ ሃራይ ኣቶ ኑ ጌዲያ ቦላን ዴዒያ ሂንቴንቱ ካታማ ባናካ ሂንቴንቶ ቆቆፌቶ ፤ ዬዉዋን ቃሲ፥ ፆሳ ካዉቴꬃይ ሂንቴንቱኮ ማቴዳዋ ኤሪቴ› ያጊቴ።

¹² ፒርዳ ጋላሲ ሃ ካታማቲፔ ሶዶማ ካታማ ጋኬዳ ሙራይ ካዉሻናዋ ያጋዴ ታኒ ሂንቴው ኦዳይ።

¹³ «ኣዬ ኔው ኮራዚኔ፤ ኣዬ ኔው ቤቴሳይዴ፤ ሂንቴንቱን ሃኔዳ ማላታቱ ፂሮሳ ካታማኒኔ ሲዶና ካታማን ሃኔዴንቶ፥ ሄዋን ዴዒያ ኣሳቱ ካዩዋ ማዩዋ ማዪዴ፥ ቢዲንꬃ ቦላን ኡቲዴ፥ ቤኒፔ ባሬንቱ ናጋራፔ ሲማናዋንታሺን።

¹⁴ ሃዋ ዲራው፥ ሙሬቲያ ጋላሲ ሂንቴንቱፔ ኣꬂዴ ፂሮሳ ካታማዉኔ ሲዶና ካታማው ሙራይ ካዉሻናዋ።

¹⁵ ሃኔ ቂፊሪናሆሜ፥ ኔኒ ሳሉዋ ፑዴ ꬎቁ ጋናው ኮያዲ? ዱጌ ሲዖሊያ ዎꬋናሳ።

¹⁶ «ሂንቴንቱ ጊያዋ ሲሲያ ኣሳይ፥ ታኒ ጊያዋ ሲሴ፤ ሂንቴንታ ኢፂያ ኡራይ ታና ኢፄ፤ ታና ኢፂያ ኡራይ ታና ኪቴዳዋካ ኢፄ» ያጌዳ።

¹⁷ ላፑን ታሙ ኣሳቱካ፥ «ጎዳው፥ ኢታ ኣያናቱካ ኔ ሱንꬃን ኑሲ ኣዛዜቴዲኖ» ያጊዴ ናሼቻን ሲሜዲኖ።

¹⁸ ዬሱሲካ ኡንቱንቶ፥ «ሴፃናይ ዋልቃንꬃዳን ሳሉዋፔ ዎꬊሺን ቤዓዲ።

¹⁹ ሲሚ ሾሻኔ ሶጉዋ ዬꬋናዳን ሂንቴንቱ ሞርኪያ ፃላሂያ ዎልቃ ፆናና ማላ ማታ ኢማዲ። ሂንቴንታ ቆሃናዌ ኣይኔካ ዴዔና።

²⁰ ጊዶፔ ኣቲን ሂንቴንቱ ሱንꬃይ ሳሉዋ ማዚጎቢያን ፃፌቶ ዲራው፥ ናሼቲቴፔ ኣቲን ኢታ ኣያናቱ ኣዛዜቶ ዲራው ናሼቶፒቴ» ያጌዳ።

²¹ ሄ ዎዲያን ዬሱሲ ኣያና ጌሻን ዳሮ ናሼቲዴ፥ «ሳሉዋኔ ሳዓ ጎዳው፥ ኔኒ ሃ ዬዉዋ ታማሮዋንቱፔኔ ኣꬎ ኤራንቻቱዋፔ ጌንꬃዴ፥ ቄሪ ናናው ቆንጪሶ ዲራው፥ ኔና ጋላታይ፤ ኤ፥ ታ ኣቦ፥ ኣዪሲ ጎፔ፥ ሃዋ ኦꬃናው ኔ ሎዖ ሼኔ ጊዴዳ።

²² «ኡባ ዬዉ ታው ታ ኣቡፔ ኢሜቴዳ። ናዓይ ኦኔንቶ ኣዉዋፔ ኣቲሺን ኦኒኔ ኤሪያዌ ባዋ፤ ሄዋዳንካ ኣዉ ኦኔንቶ ናዓፔኔ ኢ ቆንጪሳናው ኮዮ ኡራፔ ኣቲን፥ ሃራይ ኦኒኔ ኤሪያዌ ባዋ» ያጌዳ።

²³ ካሊዴካ ዬሱሲ ባሬና ካሊያዋንቱኮ ሲሚ ዎꬊዴ፥ ኡንቱንቱ ፃላላ፥ «ሂንቴንቱ ቤዒያዋ ፄሊያ ኣይፋቱ ኣንጄቴዳዋንታ።

²⁴ ታ ሂንቴው ኦዲያዌ ኣዬ ጎፔ፥ ጮራ ናባቱኔ ካታቱ ሂንቴንቱ ቤዒያዋ ቤዓናው ኣሞቴዲኖሺን ቤዒቤይኪኖ፤ ሂንቴንቱ ሲሲያዋካ ሲሳናው ኣሞቴዲኖ፤ ሺን ሲሲቤይኪኖ» ያጌዳ።

²⁵ ኢቲ ጋላሲ ሂጊያ ኤሪያዌ ኢቱ ዬሱሳ ፓጫናው ኣኮ ዪዴ፥ «ታማሪሲያዎ፥ ሜꬊና ዴዑዋ ላታናው፥ ታኒ ኣያ ኡዶ?» ያጊ ኦቼዳ።

²⁶ ዬሱሲ ዛሪዴ፥ «ሙሴ ሂጊያ ማፃፋን ፃፌቶዌ ኣዬ? ኔኒ ኣያ ጋዴ ቢላይ?» ያጌዳ።

²⁷ ቢታኒካ፥ «ሙሴ ሂጊያ ማፃፋይ፥ ‹ፆሳ ኔ ጎዳ ፖሎ ኔ ዎዛናፔ፥ ፖሎ ኔ ሼምፑዋፔ፥ ፖሎ ኔ ዎልቃፔኔ ፖሎ ኔ ቆፋፔ ሲቃ፤ ሄዋዳንካ ኔ ላጌꬃካ ኔ ሁጲያዳን ዶሳ› ጌ» ያጌዳ።

²⁸ ዬሱሲ ኣ፥ «ሊኬ፥ ቱሙዋ ጋዳ፤ ሲሚ ኔኒካ ሃዋ ኦꬃ፤ ዴዑዋን ዴዓናሳ» ያጌዳ።

²⁹ ሙሴ ሂጊያ ታማሪሲያ ቢታኒ ቃይ ባሬና ፂሎ ኦꬃናው ኮዪዴ ዬሱሳ፥ «ሃኖሺን፥ ታ ላጌꬃይ ኦኔ?» ያጊዴ ኦቼዳ።

³⁰ ዬሱሲ ዛሪዴ፥ «ኢቲ ቢታኒ ዬሩሳላሜፔ ኢያርኮ ቢዴ ዴዒሺን፥ ኦጊያ ቦላን ፓናቱ ኣ ዴሚዴ፥ ኣ ማዩዋ ቃሮዋፔ ጉዬ ሾጪዴ፥ ሃይቃናው ፖሉ ጎዴ ኦሊዴ ቤዲኖ።

³¹ ቆፔናን ኢቲ ቄሳይ ሄ ኦጊያና ቢዴዒያዌ፥ ሾጬቲዴ ኩንዴዳ ቢታኒያ ቤዔዳ ዎዴ፥ ኣያኔ ኡዴናን ሚዪያና ኣꬊዴ ቤዳ።

³² ሄዋዳንካ ኢቲ ሌዊ ሄ ኦጊያና ቢዴዔ። ኢካ ቢታኒያ ቤዒዴ፥ ሚዬቲ ኣꬌዳ።

³³ ሺን ሳማሪያ ኣሳ ጊዴዳ ኢቲ ቢታኒ፥ ሄ ባጋና ኣꬊዴ፥ ሃ ቢታኒያኮ ዬዳ። ኣ ቤዔዳ ዎዴ ኣው ቃሬቴዳ።

³⁴ ኣኮካ ሺቂዴ፥ ዛይቲያኔ ዎዪኒያ ኤሳ ኣ ማይꬃን ቲጊዴ፥ ቃቼዳ። ሄዋፔ ጉዬ ባሬ ሃሪያ ቶጊሲዴ፥ ኢማꬃይ ኣቂያ ጎሊያ ኣኪ ቤዳ፤ ሄዋን ቢꬋዪዴ ናጌዳ።

³⁵ ዎንቴꬃ ጋላሲ ጉꬃ ቢራ ባሬ ኪሲያፔ ኬሲዴ፥ ኢማꬃይ ኣቂያ ጎሊያ ጎዳው ኢሚዴ፥ ‹ሃ ቢታኒያ ታው ሎይꬃ ቢꬋያ፤ ሃዋፔ ዳሩዋ ኔኒ ኬሶፔካ፥ ታኒ ሲሚያ ዎዴ ኔው ጪጋና› ያጌዳ።

³⁶ «ሲሚ ሃ ሄዙ ኣሳቱዋፔ፥ ፓናቱዋ ኩሺያን ሾጬቲዴ ኩንዴዳ ቢታኔው፥ ላጌ ጊዴዳዌ ሃቃዋ ማላቲ?» ያጌዳ።

³⁷ ሂጊያ ታማሪሲያዌካ፥ «ሄ ኣው ቃሬቶዋ» ያጌዳ። ዬሱሲካ ኣ፥ «ሲሚ ባዴ ኔኒካ ሄዋዳን ኦꬃ» ያጌዳ።

³⁸ ዬሱሲ ባሬና ካሊያዋንቱና ኦጊያ ቢዴ፥ ኢቲ ሄራ ጋርሳ ጋኬዳ። ሄዋን ማርቶ ጌቴቲያ ኢቲ ሚሺራታ ባሬ ጎሌን ሞካዱ።

³⁹ ኢዚዉካ ማይራሞ ጌቴቲያ ሚቻታ ዴዓው፤ ሄናካ ዬሱሳ ጌዲያ ማታን ኡታዴ፥ ኢ ኦዲያዋ ሃይዛዴ ዴዓው።

⁴⁰ ማርታ ቃይ ሶይባ ጊጊሳዴ ዳቡራ ዴዓው፤ ሄዋ ዲራው ዬሱሳኮ ሺቃዴ፥ «ሃና ታ ሚቻታ፥ ኪታ ኡባ ታ ቦላ ኦሊና፥ ታኒ ታሬካ ላባኖዴ ፄላዴ ጮዑ ጋይ? ሃያና ታና ማዳናዳን ኢዚው ኦዳ» ያጋዱ።

⁴¹ ዬሱሲካ ዛሪዴ ኢዞ፥ «ማርቴ፥ ማርቴ፥ ኔኒ ጮራ ዬዉዋ ቆፓዴ ሂርጋ፤ ቃሲካ ሜቶታ።

³ Taani dorssatuwaadan wallatuwaa giddo hinttena kiittay, biite.

⁴ Hinttenttu ogew ayaanne oyqqoppite: borssaa, qarcciitiyaa, caammaa, gidinakka oyqqoppite; asaanna sarotettiidde ogiyaan wodiyaa wurssoppite.

⁵ “Hinttenttu geliyaa golle ubbaa kasiyan, ‘Sarotethay ha gollew gido’ yaagite.

⁶ He golliyan sarotethaa dosiyaa asay de7ooppe, hinttenttu sarotay he golliyan aqanawaa; koyyennawaa gidooppe, hinttenttu sarotay hinttenttoo simmanawaa.

⁷ He golliyan unttunttoo de7iyaawaappe miiddinne ushiidde de7ishshite; oosanchchaw A dirgguwaa cigay koshshee; itti golliyaappe hara golliyaa yuuyyoppite.

⁸ “Ay katamaanne hinttenttu geliyaa wode, asay hinttena mokki akkiide mizanaw shiishshowaa ayaanne miite.

⁹ He katamattin de7iyaa hargganchchatuwaa pathiidde asaw, ‘Xoossaa Kawutethay hinttekko mateedda’ yaagiide odite.

¹⁰ Yewuwaan qassi ay katamaanne geloode, asay hinttentta mokki akkennawantta gidooppe he katamaa qadhdhaakko kesinnee,

¹¹ ‘Nuuni hinttena yeellayanaw, haray atto nu gediya bollan de7iyaa hinttenttu katamaa baanaakka hinttenttoo qoqqofeetto; yewuwaan qassi, Xoossaa Kawutethay hinttenttukko mateeddawaa erite’ yaagite.

¹² Pirdda gallassi ha katamattippe Sodoomaa katamaa gakkeedda muray kawushanawaa yaagaade taani hinttew oday.

¹³ “Aayye new Koraaziine; aayye new Beetesayde; hinttenttun haneedda malaatatuu Xiiroosa katamaaninne Sidoonaa katamaan haneeddentto, hewaan de7iyaa asatuu kayyuwaa mayuwaa mayyiide, bidinthaa bollan uttiide, benippe barenttu nagaraappe simmanawanttashshin.

¹⁴ Hawaa diraw, murettiyaa gallassi hinttenttuppe aathiide Xiiroosa katamawunne Sidoonaa katamaw muray kawushanawaa.

¹⁵ Hanne Qifirinaahoome, neeni saluwaa pude dhoqqu gaanaw koyyaaddi? Duge Si7ooliyaa wodhdhanaassa.

¹⁶ “Hinttenttu giyaawaa sisiyaa asay, taani giyaawaa sisee; hinttentta ixxiyaa uray taana ixxee; taana ixxiyaa uray taana kiitteeddawaakka ixxee” yaageedda.

¹⁷ Laappun tammu asatuukka, “Godaw, iita ayyaanatuukka ne sunthaan nuussi azazetteeddino” yaagiidde nashechchaan simmeeddino.

¹⁸ Yesuusikka unttunttoo, “Seexaanay walqqanthaadan saluwaappe wodhdhishshin be7aaddi.

¹⁹ Simmi shooshshaanne sogguwaa yedhdhanaadan hinttenttu morkkiyaa xalahiyaa wolqqaa xoonana mala maataa immaaddi. Hinttentta qohanawe aynneekka de7enna.

²⁰ Gidoppe attin hinttenttu sunthay saluwaa maziggobiyaan xaafetto diraw, nashettiteppe attin iita ayyaanatuu azazetto diraw nashettoppite” yaageedda.

²¹ He wodiyaan Yesuusi Ayyaanaa Geeshshaan daro nashettiide, “Saluwaanne sa7aa Godaw, neeni ha yewuwaa tamaarowanttuppenne aadho eranchchatuwaappe genthaade, qeeri naanaw qonccisso diraw, neena galatay; E, ta Aabboo, ayissi gooppe, hawaa oothanaw ne lo77o shene gideedda.

²² “Ubba yewuu taw ta Aabbuppe imetteedda. Na7ay oonentto Aawuwappe attishshin ooninne eriyaawe baawa; hewaadankka Aawuu oonentto Na7aappenne I qonccissanaw koyyo uraappe attin, haray ooninne eriyaawe baawa” yaageedda.

²³ Kaalliiddekka Yesuusi barena kaalliyaawanttukko simmi wodhdhiide, unttunttu xalalaa, “Hinttenttu be7iyaawaa xeelliyaa ayfatuu anjjetteeddawantta.

²⁴ Ta hinttew odiyaawe ayee gooppe, cora nabatuunne kaatatuu hinttenttu be7iyaawaa be7anaw amotteeddinoshshin be7ibeykkino; hinttenttu sisiyawaakka sisanaw amotteeddino; shin sisibeykkino” yaageedda.

²⁵ Itti gallassi higgiyaa eriyaawe ittu Yesuusa paaccanaw aakko yiide, “Tamaarissiyaawoo, medhinaa de7uwa laattanaw, taani ayaa udoo?” yaagi oochcheedda.

²⁶ Yesuusi zaariide, “Muse higgiyaa maxaafan xaafettowe ayee? Neeni ayaa gaade billay?” yaageedda.

²⁷ Bitaniikka, “Muse higgiyaa maxaafay, ‘Xoossaa ne Godaa polo ne wozanaappe, polo ne shemppuwaappe, polo ne wolqqaappenne polo ne qofaappe siiqa; hewaadankka ne laggethaakka ne huuphiyaadan dosa’ gee” yaageedda.

²⁸ Yesuusi A, “Likke, tumuwaa gaadda; simmi neenikka hawaa ootha; de7uwan de7anaassa” yaageedda.

²⁹ Muse higgiyaa tamaarissiyaa bitani qay barena xillo oothanaw koyyiide Yesuusa, “Hanoshshin, ta laggethay oonee?” yaagiide oochcheedda.

³⁰ Yesuusi zaariide, “Itti bitani Yeerusalaameppe Iyyarkko biidde de7ishshin, ogiyaa bollan paannatuu A demmiide, A mayuwaa qaarowaappe guyye shociide, hayqqanaw pollu goode oliide beeddino.

³¹ Qoppennaan itti qeesay he ogiyaanna bide7iyaawe, shocettiide kunddeedda bitaniyaa be7eedda wode, ayaanne udennaan miyyiyaanna aadhdhiide beedda.

³² Hewaadankka itti Leewii he ogiyaanna bide7ee. Ikka bitaniyaa be7iide, miyyeti aadhdheedda.

³³ Shin Sammaariyaa asa gideedda itti bitani, he bagganna aadhdhiidde, ha bitaniyaakko yeedda. A be7eedda wode aw qaretteedda.

³⁴ Aakkokka shiiqiide, zaytiyaanne woyiniyaa eessaa A maythaan tigiide, qachcheedda. Hewaappe guyye bare hariyaa togissiide, imathay aqiyaa golliyaa akki beedda; hewaan bidhayiidde naageedda.

³⁵ Wonttetha gallassi guutha biraa bare kiisiyaappe kessiide, imathay aqiyaa golliyaa godaw immiide, ‘Ha bitaniyaa taw loytha bidhaya; hawaappe daruwaa neeni kessooppekka, taani simmiyaa wode new ciggana’ yaageedda.

³⁶ “Simmi ha heezzu asatuwaappe, paannatuwaa kushiyan shocettiide kunddeedda bitanew, lagge gideeddawe haqawaa malatii?” yaageedda.

³⁷ Higgiyaa tamaarissiyaawekka, “He aw qarettowaa” yaageedda. Yesuusikka A, “Simmi baade neenikka hewaadan ootha” yaageedda.

³⁸ Yesuusi barena kaalliyaawanttunna ogiyaa biidde, itti heeraa garssa gakkeedda. Hewaan Martto geetettiyaa itti mishiratta bare gollen mokkaaddu.

³⁹ Iziwukka Mayraamo geetettiyaa michchatta de7aw; hennakka Yesuusa gediyaa mataan uttaade, I odiyaawaa hayzzaadde de7aw.

⁴⁰ Martta qay soybaa giigissaadde daabura de7aw; hewaa diraw Yesuusakko shiiqaade, “Hanna ta michchatta, kiitaa ubbaa ta bolla olina, taani taarekka labbanoode xeellaadde co77u gay? Hayyanaa taana maaddanaadan iziw oda” yaagaaddu.

⁴¹ Yesuusikka zaariide izo, “Marttee, Marttee, neeni cora yewuwaa qoppaadde hirggaa; qassikka metootaa.