ሃዋሬታ ኦሱዋ 2:3-26 in Gofa

³ ቃሲ ታማ ላጮ ዳኒያ ኢንፃርሳቲ ኤንታው ቤንቲሼ፥ ሻኬቲ ሻኬቲ ኤንታ ኡባ ቦላ ዎꬊዶሶና።

⁴ ኤንቲ ኡባይ ጌሻ ኣያናን ኩሚዲ ዱማ ዱማ ዶናን ኦዴታና ሜላ ጌሻ ኣያናይ ኤንታ ዳንዳዒሲን ሃሳያ ዶሚዶሶና።

⁵ ሄ ዎዴ ቢታ ኡባፌ ዪዳ ፆሳ ያያ ኣይሁዴቲ ዬሩሳላሜን ዴዖሶና።

⁶ ሄ ጉንꬃ ሲዒዳ ዎዴ ዳሮ ኣሳይ ሺቂዶሶና። ኣማኒያ ኣሳይ ኤንታ ቃላን ኦዴቲሺን ሲዒዳ ጊሾ

⁷ ማላሌቲዲ፥ «ሃ ኦዴቲያ ኣሳ ኡባይ ጋሊላ ኣሴ ጊዶኮናዬ?

⁸ ያቲን፥ ኑኒ፥ ኑ ዬሌቲዳ ቢታ ዶናን ኤንቲ ኦዴቲሺን ዋኒዲ ሲዓናው ዳንዳዒዶ?

⁹ ኑኒ ጳርፄን፥ ሜዶናን፥ ኤላሜን፥ ናምዑ ሻፋታፔ ጊዶን ዴዔይሳቲ፥ ዪሁዳን፥ ቃጳዶቂያን፥ ጳንፆሳን፥ ኢሲያን፥

¹⁰ ጲርጌን፥ ጲንፊሌን፥ ጊብፄን፥ ቃሬና ማታን ዴዒያ ሊቢያን ዴዔይሳታ። ኑፔ ባጋቲካ ሮሜፔ ዪዳ ኣሳታ።

¹¹ ኣይሁዴቲኔ ኣይሁዴቴꬃ ኣማኖ ጌሊዳ ኣሳቲ፥ ቃርፄሳኔ ኣራቤ ኣሳቲ፥ ፆሳይ ኦꬂዳ ጊታ ኦሱዋ ኑ ቃላን ኦዴቲሺን ሲዖስ» ያጊዶሶና።

¹² ኡባይ ማላሌቲዲ፥ ጋናባ ꬋዪዲ ዎሊኮ፥ «ላ ሃይሲ ኣይ ጉሴ?» ያጊዶሶና።

¹³ ሺን ሃራቲ፥ «ሃይሳቲ ኡዪዲ ማꬆቲዶሶና» ያጊዲ ቄልቂሲዶሶና።

¹⁴ ሺን ጴፂሮሲ፥ ታማኔ ኢሲ ሃዋሬታራ ዴንዲ ኤቂዲ፥ ባ ቃላ ꬎቁ ኦꬂዲ፥ ኤንታው ሃይሳዳ ያጊዲ ኦዲስ፡ «ኣይሁዴቶ፥ ዬሩሳላሜን ዴዒያ ኡባቶ፥ ታኒ ኦዴይሳ ሲዒቴ።

¹⁵ ዎንታፌ ሄꬑ ሳቴ ጊዲያ ጊሾ ሂንቴ ቆፔይሳዳ ሃ ኣሳቲ ማꬆቲቦኮና፤ ሄሲ ሂንቴው ኤሬቶ።

¹⁶ ሺን ሃይሲ ሃኒዳይ ናቢያ ኢዩዔሊ ኦዲዳይሲ ፖሌታና ሜላሳ።

¹⁷ « ‹ፆሳይ፥ ዎዲያ ዉርሴꬃን ሃይሳዳ ሃናና ያጌስ፡ ታኒ ኣሳ ኡባ ቦላ ታ ኣያና ጉሳና። ሂንቴ ኣዴ ናይቲኔ ማጫ ናይቲ፥ ቲንቢቴ ኦዳና። ሂንቴ ያላጋቲ ቆንጬꬂ ቤዓና፤ ሂንቴ ጪማቲ ኣሙሆ ኣሙሃና።

¹⁸ ሄ ጋላሳታን ታና ኣማኒያ ኣዴ ኣይሌታ ቦላኔ ማጫ ኣይሌታ ቦላ ታኒ ታ ኣያና ጉሳና፤ ኤንቲ ቲንቢቴ ኦዳና።

¹⁹ ቃሲ ታኒ ቦላ ሳሉዋን ኦራꬃባ፥ ጋርሳ ሳዓንካ ማላ ቤሳና። ሱꬂ፥ ታሚኔ ዎልቃማ ጫጋኒ ቤንታና።

²⁰ ጊታኔ ቦንቾ ጊዲዳ ጎዳ ጋላሳይ ጋካናፔ ሲንꬄ ኣዋይ ꬉማና፤ ኣጌናይካ ሱꬂ ዳናና።

²¹ ሄ ዎዴ ሄሳዳ ሃናና፤ ጎዳ ሱንꬃ ፄጊያ ኦኒካ ኣታና› ያጊስ።

²² «ኢስራዔሌ ኣሳው፥ ሃ ቃላ ሲዒቴ። ናዚሬቴ ዬሱሳ ኦናቴꬃይ፥ ፆሳይ ሂንቴ ጊዶን ኦꬂዳ ዎልቃማ ኦሱዋኒኔ ማላታታን ሂንቴው ቆንጮይሳ ሂንቴ፥ ሂንቴ ሁዔን ኤሬታ።

²³ ፆሳ ካሴ ኤራኒኔ ኢያ ሼኒያን ዬሱሲ ሂንቴው ኣꬊ ኢሜቲስ። ሂንቴ ኢያ ናጋራንቾቲ ማስቃሊያ ቦላ ካቂዲ ዎꬋና ሜላ ኣꬂ ኢሚዴታ።

²⁴ ሺን ፆሳይ ሃይቆ ዎልቃ ዲጊዲ ኢያ ዴንꬂስ። ሄሳ ጊሾ፥ ሃይቆይ ኢያ ኦይካናው ዳንዳዒቤና።

²⁵ ዳዊቴይ ኢያባ ኦዲሼ፥ ‹ታኒ ያርኮና ሜላ፥ ጎዳይ ታ ኡሻቻን ዴዔስ። ጎዳ ኡባ ዎዴ ታ ማታን ቤዓይስ።

²⁶ ሄሳ ጊሾ፥ ታ ዎዛናይ ኡፋይቲስ፤ ታ ኢንፃርሳን ኡፋይሲ ኩሚስ፤ ሃይቂያ ታ ኣሳቴꬃይ ኡፋይሳን ዳና።

³ Qassi tama laco daaniya inxarssati enttaw benttishe, shaaketti shaaketti entta ubbaa bolla wodhdhidosona.

⁴ Entti ubbay Geeshsha Ayyaanan kumidi dumma dumma doonan odettana mela Geeshsha Ayyaanay entta dandda7isin haasaya doomidosona.

⁵ He wode biitta ubbaafe yida Xoossaa yayyaa Ayhudeti Yerusalaamen de7oosona.

⁶ He guunthaa si7ida wode daro asay shiiqidosona. Ammaniya asay entta qaalan odettishin si7ida gisho

⁷ malaalettidi, “Ha odettiya asa ubbay Galiila ase gidokkonaayye?

⁸ Yaatin, nuuni, nu yelettida biittaa doonan entti odettishin waanidi si7anaw dandda7ido?

⁹ Nuuni Pharxen, Meedonan, Elaamen, nam77u shaafatappe giddon de7eyssati, Yihudan, Qaphadooqiyan, Phanxoosan, Iisiyan,

¹⁰ Phirggen, Phinfilen, Gibxxen, Qaarena matan de7iya Liibiyan de7eyssata. Nuuppe baggatikka Roomeppe yida asata.

¹¹ Ayhudetinne Ayhudetetha ammano gelida asati, Qarxeesanne Arabe asati, Xoossay oothida gita oosuwa nu qaalan odettishin si7oos” yaagidosona.

¹² Ubbay malaalettidi, gaanabaa dhayidi wolikko, “La hayssi ay guussee?” yaagidosona.

¹³ Shin harati, “Hayssati uyidi mathottidosona” yaagidi qelqisidosona.

¹⁴ Shin Phexiroosi, tammanne issi hawaaretara denddi eqqidi, ba qaala dhoqqu oothidi, enttaw hayssada yaagidi odis: “Ayhudetoo, Yerusalaamen de7iya ubbato, taani odeyssa si7ite.

¹⁵ Wonttafe heedzu saate gidiya gisho hintte qoppeyssada ha asati mathottibookkona; hessi hinttew eretto.

¹⁶ Shin hayssi haniday nabiya Iyyu7eeli odidayssi polettana melassa.

¹⁷ “ ‘Xoossay, wodiya wurssethan hayssada hanana yaagees: taani asa ubbaa bolla ta Ayyaana gussana. Hintte adde naytinne macca nayti, tinbbite odana. Hintte yalagati qonccethi be7ana; hintte cimati amuho amuhana.

¹⁸ He gallasatan tana ammaniyaa adde aylleta bollanne macca aylleta bolla taani ta Ayyaana gussana; entti tinbbite odana.

¹⁹ Qassi taani bolla saluwan oorathabaa, garssa sa7ankka malla bessana. Suuthi, taminne wolqqaama caagani benttana.

²⁰ Gitanne bonchcho gidida Godaa gallasay gakkanaappe sinthe away dhumana; ageenaykka suuthi daanana.

²¹ He wode hessada hanana; Godaa sunthaa xeegiya oonikka attana’ yaagis.

²² “Isra7eele asaw, ha qaala si7ite. Naazirete Yesuusa oonatethay, Xoossay hintte giddon oothida wolqqaama oosuwaninne malaatatan hinttew qonccoyssa hinttee, hintte huu7en ereeta.

²³ Xoossaa kase eraninne iya sheniyan Yesuusi hinttew aadhdhi imettis. Hintte iya nagaranchchoti masqaliya bolla kaqqidi wodhana mela aathi immideta.

²⁴ Shin Xoossay hayqo wolqqaa diggidi iya denthis. Hessa gisho, hayqoy iya oykkanaw dandda7ibeenna.

²⁵ Dawitey iyabaa odishe, ‘Taani yarkkonna mela, Goday ta ushachchan de7ees. Godaa ubba wode ta matan be7ays.

²⁶ Hessa gisho, ta wozanay ufayttis; ta inxarssan ufayssi kumis; hayqqiya ta asatethay ufayssan daana.