ሃዋሬታ ኦሱዋ 2:14-44 in Gofa

¹⁴ ሺን ጴፂሮሲ፥ ታማኔ ኢሲ ሃዋሬታራ ዴንዲ ኤቂዲ፥ ባ ቃላ ꬎቁ ኦꬂዲ፥ ኤንታው ሃይሳዳ ያጊዲ ኦዲስ፡ «ኣይሁዴቶ፥ ዬሩሳላሜን ዴዒያ ኡባቶ፥ ታኒ ኦዴይሳ ሲዒቴ።

¹⁵ ዎንታፌ ሄꬑ ሳቴ ጊዲያ ጊሾ ሂንቴ ቆፔይሳዳ ሃ ኣሳቲ ማꬆቲቦኮና፤ ሄሲ ሂንቴው ኤሬቶ።

¹⁶ ሺን ሃይሲ ሃኒዳይ ናቢያ ኢዩዔሊ ኦዲዳይሲ ፖሌታና ሜላሳ።

¹⁷ « ‹ፆሳይ፥ ዎዲያ ዉርሴꬃን ሃይሳዳ ሃናና ያጌስ፡ ታኒ ኣሳ ኡባ ቦላ ታ ኣያና ጉሳና። ሂንቴ ኣዴ ናይቲኔ ማጫ ናይቲ፥ ቲንቢቴ ኦዳና። ሂንቴ ያላጋቲ ቆንጬꬂ ቤዓና፤ ሂንቴ ጪማቲ ኣሙሆ ኣሙሃና።

¹⁸ ሄ ጋላሳታን ታና ኣማኒያ ኣዴ ኣይሌታ ቦላኔ ማጫ ኣይሌታ ቦላ ታኒ ታ ኣያና ጉሳና፤ ኤንቲ ቲንቢቴ ኦዳና።

¹⁹ ቃሲ ታኒ ቦላ ሳሉዋን ኦራꬃባ፥ ጋርሳ ሳዓንካ ማላ ቤሳና። ሱꬂ፥ ታሚኔ ዎልቃማ ጫጋኒ ቤንታና።

²⁰ ጊታኔ ቦንቾ ጊዲዳ ጎዳ ጋላሳይ ጋካናፔ ሲንꬄ ኣዋይ ꬉማና፤ ኣጌናይካ ሱꬂ ዳናና።

²¹ ሄ ዎዴ ሄሳዳ ሃናና፤ ጎዳ ሱንꬃ ፄጊያ ኦኒካ ኣታና› ያጊስ።

²² «ኢስራዔሌ ኣሳው፥ ሃ ቃላ ሲዒቴ። ናዚሬቴ ዬሱሳ ኦናቴꬃይ፥ ፆሳይ ሂንቴ ጊዶን ኦꬂዳ ዎልቃማ ኦሱዋኒኔ ማላታታን ሂንቴው ቆንጮይሳ ሂንቴ፥ ሂንቴ ሁዔን ኤሬታ።

²³ ፆሳ ካሴ ኤራኒኔ ኢያ ሼኒያን ዬሱሲ ሂንቴው ኣꬊ ኢሜቲስ። ሂንቴ ኢያ ናጋራንቾቲ ማስቃሊያ ቦላ ካቂዲ ዎꬋና ሜላ ኣꬂ ኢሚዴታ።

²⁴ ሺን ፆሳይ ሃይቆ ዎልቃ ዲጊዲ ኢያ ዴንꬂስ። ሄሳ ጊሾ፥ ሃይቆይ ኢያ ኦይካናው ዳንዳዒቤና።

²⁵ ዳዊቴይ ኢያባ ኦዲሼ፥ ‹ታኒ ያርኮና ሜላ፥ ጎዳይ ታ ኡሻቻን ዴዔስ። ጎዳ ኡባ ዎዴ ታ ማታን ቤዓይስ።

²⁶ ሄሳ ጊሾ፥ ታ ዎዛናይ ኡፋይቲስ፤ ታ ኢንፃርሳን ኡፋይሲ ኩሚስ፤ ሃይቂያ ታ ኣሳቴꬃይ ኡፋይሳን ዳና።

²⁷ ኣይስ ጊኮ፥ ታ ሼምፑዋ ሲዖሌን ኣጋካ። ቃሲ ኔ ጌሻ ናዓ ኣሃ ዎቂሳካ።

²⁸ ኔኒ ታና ዴዖ ኦጊያ ኤሪሳዳሳ። ኔኒ ታራ ዴዔይሳን ታ ኡፋይሳይ ኩሜꬂ ጊዴስ› ያጊስ።

²⁹ «ኣሳው፥ ኑ ኣዋ ዳዊቴባ ታ ሂንቴው ጌሻዳ ኦዳና። ዳዊቴይ ሃይቂዲ ሞጌቲስ፤ ኢያ ዱፎይ ሃቺ ጋካናው ኑ ማታን ዴዔስ።

³⁰ ዳዊቴይ ናቤ ጊዲዳ ጊሾ ፆሳይ ኢያ ሼሻፔ ኢሱዋ ኢያ ካዎቴꬃ ኣራታ ቦላ ኡቲሳናው ኢያው ጫቂዳ ጫቁዋ ኤሬስ።

³¹ ሄሳ ጊሾ፥ ኪሪስቶሳ ዴንዱዋ ሲንꬄ ፄሊዲ፥ ‹ኢያ ሼምፖይ ሲዖሌን ኣቲቤና፤ ኢያ ኣሳቴꬃይካ ዎቂቤና› ጊዲ ኦዲስ።

³² «ፆሳይ፥ ሃ ዬሱሳ ሃይቁዋፔ ዴንꬂዳይሳስ ኑኒ ኡባይ ማርካ።

³³ ሄሳ ጊሾ፥ ፆሳይ ባራ ሃራና ሜላ ባፔ ኡሻቻ ባጋራ ኢያ ꬎቁ ꬎቁ ኦꬂዲ፥ ኢያው ኢማና ጌቴቲዳ ጌሻ ኣያና ኤኪዲ፥ ሃይሳ ሂንቴ ሃዒ ቤዔይሳኔ ሲዔይሳ ኑ ቦላ ጉሲስ።

³⁴ ጋሶይካ፥ ዳዊቴይ ባ ሁዔን ሳሎ ቢቤናሺን ያጊስ፡ ‹ጎዳይ፥ ታ ጎዳ፥ «ታኒ ኔ ሞርኬታ ኔ ቶሆይ ዬꬊያሶ ኦꬃና ጋካናው ሃይሳን ታፔ ኡሻቻ ባጋን ኡታ» ጊስ› ያጊስ።

³⁶ «ሄሳ ጊሾ፥ ሃ ሂንቴ ማስቃሊያ ቦላ ካቂዳ ዬሱሳ፥ ፆሳይ ጎዳኔ ኪሪስቶሳ ኦꬂዳይሳ ኢስራዔሌ ኣሳ ኡባይ ቱማ ኤሮ» ያጊስ።

³⁷ ኣሳይ ጴፂሮሲ ጊዳይሳ ሲዒዳ ዎዴ ባንታ ዎዛናን ቦሼቲዲ ጴፂሮሳኔ ሃንኮ ሃዋሬታኮ፥ «ኢሻቶ፥ ያቲን ኑኒ ኣይ ኦꬂኖ?» ያጊዶሶና።

³⁸ ጴፂሮሲ ኤንታኮ፥ «ሂንቴ ናጋራይ ኣቶ ጌቴታና ሜላ ናጋራፔ ሲሚዲ፥ ሂንቴ ኢሶይ ኢሶይ ዬሱስ ኪሪስቶሳ ሱንꬃን ፃማቄቲቴ። ፆሳይ ኢሚያ ጌሻ ኣያና ሂንቴ ኤካና።

³⁹ ጋሶይካ ፆሳይ ኢማና ጊዳ ኡፋይሳ ቃላይ ሂንቴስ፥ ሂንቴ ናይታሲኔ ጎዳይ ኑ ፆሳይ ባኮ ፄጊያ ሃሆን ዴዒያ ኡባሳ» ያጊስ።

⁴⁰ ጴፂሮሲ ኤንታው ሃራ ቃላካ ጉጂ ማርካቲዲ፥ «ሃ ዎዲያ ጌላ ኣሳ ቦላ ያናው ዴዒያ ፒርዳፌ ሂንቴ ሁዒያ ኣሺቴ» ያጊዲ ዞሪስ።

⁴¹ ጴፂሮሲ ኦዲዳይሳ ኤኪዳይሳቲ ፃማቄቲዶሶና። ሄ ጋላስ ሄꬑ ሙኩሉ ጊዲያ ኣሳይ ኣማኒዶሶና።

⁴² ኤንቲ ሃዋሬታ ቲሚርቲያን፥ ኢሲፌቴꬃን፥ ኡይꬃ ሙሳኒኔ ፆሳ ዎሳን ሚኖሶና።

⁴³ ሃዋሬታ ኩሼን ዳሮ ኦራꬃባይኔ ማላቲ ኦሴቲያ ጊሾ ኣሳ ኡባይ ያዪዶሶና።

⁴⁴ ኣማኒዳ ኡባይ ኢሲፌ ዴዖሶና፤ ባንታው ዴዒያባ ኡባ ኢሲፌ ሻኬቶሶና።

¹⁴ Shin Phexiroosi, tammanne issi hawaaretara denddi eqqidi, ba qaala dhoqqu oothidi, enttaw hayssada yaagidi odis: “Ayhudetoo, Yerusalaamen de7iya ubbato, taani odeyssa si7ite.

¹⁵ Wonttafe heedzu saate gidiya gisho hintte qoppeyssada ha asati mathottibookkona; hessi hinttew eretto.

¹⁶ Shin hayssi haniday nabiya Iyyu7eeli odidayssi polettana melassa.

¹⁷ “ ‘Xoossay, wodiya wurssethan hayssada hanana yaagees: taani asa ubbaa bolla ta Ayyaana gussana. Hintte adde naytinne macca nayti, tinbbite odana. Hintte yalagati qonccethi be7ana; hintte cimati amuho amuhana.

¹⁸ He gallasatan tana ammaniyaa adde aylleta bollanne macca aylleta bolla taani ta Ayyaana gussana; entti tinbbite odana.

¹⁹ Qassi taani bolla saluwan oorathabaa, garssa sa7ankka malla bessana. Suuthi, taminne wolqqaama caagani benttana.

²⁰ Gitanne bonchcho gidida Godaa gallasay gakkanaappe sinthe away dhumana; ageenaykka suuthi daanana.

²¹ He wode hessada hanana; Godaa sunthaa xeegiya oonikka attana’ yaagis.

²² “Isra7eele asaw, ha qaala si7ite. Naazirete Yesuusa oonatethay, Xoossay hintte giddon oothida wolqqaama oosuwaninne malaatatan hinttew qonccoyssa hinttee, hintte huu7en ereeta.

²³ Xoossaa kase eraninne iya sheniyan Yesuusi hinttew aadhdhi imettis. Hintte iya nagaranchchoti masqaliya bolla kaqqidi wodhana mela aathi immideta.

²⁴ Shin Xoossay hayqo wolqqaa diggidi iya denthis. Hessa gisho, hayqoy iya oykkanaw dandda7ibeenna.

²⁵ Dawitey iyabaa odishe, ‘Taani yarkkonna mela, Goday ta ushachchan de7ees. Godaa ubba wode ta matan be7ays.

²⁶ Hessa gisho, ta wozanay ufayttis; ta inxarssan ufayssi kumis; hayqqiya ta asatethay ufayssan daana.

²⁷ Ays giikko, ta shemppuwa Si7oolen aggaka. Qassi ne Geeshsha Na7aa ahaa wooqisakka.

²⁸ Neeni tana de7o ogiya erisadasa. Neeni taara de7eyssan ta ufayssay kumethi gidees’ yaagis.

²⁹ “Asaw, nu aawa Dawitebaa ta hinttew geeshshada odana. Dawitey hayqqidi moogettis; iya duufoy hachchi gakkanaw nu matan de7ees.

³⁰ Dawitey nabe gidida gisho Xoossay iya sheeshaappe issuwa iya kawotethaa araata bolla utisanaw iyaw caaqqida caaquwa erees.

³¹ Hessa gisho, Kiristtoosa dendduwa sinthe xeellidi, ‘Iya shemppoy Si7oolen attibeenna; iya asatethaykka wooqibeenna’ gidi odis.

³² “Xoossay, ha Yesuusa hayquwappe denthidayssas nuuni ubbay markka.

³³ Hessa gisho, Xoossay baara haarana mela baappe ushachcha baggara iya dhoqqu dhoqqu oothidi, iyaw immana geetettida Geeshsha Ayyaana ekkidi, hayssa hintte ha77i be7eyssanne si7eyssa nu bolla gussis.

³⁴ Gaasoykka, Dawitey ba huu7en salo bibeennashin yaagis: ‘Goday, ta Godaa, “Taani ne morkketa ne tohoy yedhdhiyaso oothana gakkanaw hayssan taappe ushachcha baggan utta” gis’ yaagis.

³⁶ “Hessa gisho, ha hintte masqaliya bolla kaqqida Yesuusa, Xoossay Godanne Kiristtoosa oothidayssa Isra7eele asa ubbay tuma ero” yaagis.

³⁷ Asay Phexiroosi gidayssa si7ida wode bantta wozanan boshettidi Phexiroosanne hankko hawaaretakko, “Ishato, yaatin nuuni ay oothinoo?” yaagidosona.

³⁸ Phexiroosi enttako, “Hintte nagaray atto geetettana mela nagaraappe simmidi, hintte issoy issoy Yesuus Kiristtoosa sunthan xammaqetite. Xoossay immiya Geeshsha Ayyaana hintte ekkana.

³⁹ Gaasoykka Xoossay immana gida ufayssa qaalay hinttes, hintte naytasinne Goday nu Xoossay baakko xeegiya haahon de7iya ubbaassa” yaagis.

⁴⁰ Phexiroosi enttaw hara qaalakka gujji markkattidi, “Ha wodiya geella asaa bolla yaanaw de7iya pirddafe hintte huu7iya ashshite” yaagidi zoris.

⁴¹ Phexiroosi odidayssa ekkidayssati xammaqettidosona. He gallas heedzu mukulu gidiya asay ammanidosona.

⁴² Entti hawaareta timirttiyan, issifetethan, uythaa muusaninne Xoossaa woosan minnoosona.

⁴³ Hawaareta kushen daro oorathabaynne malaati oosettiya gisho asa ubbay yayyidosona.

⁴⁴ Ammanida ubbay issife de7oosona; banttaw de7iyaba ubbaa issife shaakettoosona.