12 मिनु मेको लां एर ओंथ, शुश मुर बाक्तीके मेरे हिरशा, कुना मेर रिम्ना रिम्न बाक्ब।
13 मिनु मेको मीश मुरुमी मेको कली ग्याइश्शा, पुक्पु पा मुने मपथु
14 “गो मुलाक्ती दुशा बाक्चा आ पर्बम चढ़ेतीके चढ़ेचा माल्शो नङ। मेको आं कसम मुलाक्ती खाप्ता। लेवी ७:१५-१७
15 मोपतीके गो इ कली ग्रुम्थ जाक्ती। गो इ कली शुश माल्शा थित्ता।
16 गो आं ब्राख्येमी बरखी ब्राता। मेको इजीप्त रागी ङा श्येलेम प्रोव़शो बाक्ब।
17 गो आं ब्राख्येमी मूरे, एलोव़ नु सिन्कौलीमी ब्रोव़शो रिना पपाइक्ता।
18 पिवो। गो निक्शी इप्स। नेल्ल नाक्दो काथा ग्येरसीशा इप्स।
19 मारदे हना आं वोंइश खिंमी मबाक्ब। मेको ङोन लत।
20 मेको शुश क्येट कुरसीशा लत। मोपतीके पूर्ने सम्म मजाक्ब” देंत।
21 मोपा शुश लेम्शा, मेकोमी वोंइश आल कली लाइक्तु। आ मिलो शिलो लोव़मी मेको कली हेंथे खोइक्पाइक्तु।
22 मिनु मेको वोंइश आल मेको मीश मुर आ नोले रीब पा खोइक्तु। क्योरचा कली खुल्शो ब्यफ खोदेंशो पा गाक्त। ब्वारदमी रेत्चा कली प्रेक्शो किश्श खोदेंशो पा मेको आ नोले लत।
23 मिनु ब्राम ख्रशा, बेक्चा सम्म रिम्ब। चिक्ब ब्वारदम रेत्चा चिक्शो खोदेंशो पा “बेक्नुङ” दे मतुइक्ब।
24 मुल आं तौपुकी, आं लोव़ नेनीन। इन नोफा दाइश्शा, आं लोव़ नेनीन।
25 इन थुं मोदेंशो मीश मुर आ लांम लचा मगेने। मेको आ हेंथे लां मलने।
26 मेकोमी शुश मुर आन कली खतम सेल्तु। आ साइश्शो शुश बाक्नीम।
