14 सुमी सुनी कना बोक्शा, आ नेक्था ङा मुर कली ठेयब सेंदामी आसीक पाइबा। मेको आसीक ताइबमी “सराप पाइक्ती” देंब।
15 गेना हना यो जिचा पोक्ब मीश रेउ यिमेनु तप तप पा याप्ब ब्वाक्कु खोदेंशो बाक्ब। हितोपदेस १९:२३
16 मेको कली अरेचा फश गिवार कली नाइक्पाइक्चा खोदेंशो नु ग्युरा गुइमी तेल गुप्चा खोदेंशो बाक्ब।
17 फलाममी फलाम कली शेप्शो खोदेंशो पा, मुर कामी अर्को कली शेप्ब।
18 सुमी फोव़शी रवा खाल पाइबा, मेकोमी फल जचा ताइब। सुम आ होव़प कली रिम्शो पा कोव़बा, मेको मान पाइक्चा पुंइसीब।
19 दोपा ब्वाक्कुम कुल तांइसीबा, मोपा मुर आ थुं दोदेंशो बाक्बा, मेको अर्कोम तुइक्बा।
20 बेक्शो मुर आन बाक्तीके नु जाम्शा लतीके गेनायो मरूशो खोदेंशो पा, मुर आ मिक्च यो गेनायो मरूब। उपदेसक १:८
21 चांदी यपाइक्चा कली गारचा ङा ग्योंब नु सुन यपाइक्चा कली यो गारचा ङा ग्योंब माल्शो खोदेंशो पा, मुर आ पतीक अर्को मुर आन ठेयब सेल्तीक रे पा तुंइसीब।
22 मूर्ख कली अन्न नु चुम्लुम वोइश्शा तूलीमी चुशा हना यो, आ मूर्खे पचा गेनायो मग्रूब।
23 इ क्यारश भेडा दोदेंशो तांइसीनीमी रिम्शो पा कोव़ङो। इ बी ब्यफ आन कली होस पा कोव़ङो।
24 मारदे हना शोंप गेना हना यो मलीब। सिरपेच यो नेल्ल पाला कली मलीब।
25 घांस जाम्शा लाइब। मिनु नक कोच्वा दाप्ब। मिनु पहाड रे घांस खुप्नीमी,
26 पाठा आ ऊन इन कली वा फेक्चा दुम्ब। बोका लेयशा रू ग्याप्ने चाप्नीनी।
27 क्यारश आ दूध इ कली, इ खिं ङा मुर आन कली नु इ गेय पाइब आन कली तूचा गाप्ब।