10 जोल पा नाक्तीक नु मगारशो पुक्तीक निम्फा परमप्रभु यावे कली ग्रांग्रा बाक्ब।
11 मिनु आल यो आन पतीकेमी दोदेंशो दुम्नीमी मेको कोंइनीम। ठीक पाइब नु रिम्शो थुं पाइश्शो आल बाक्ब, दे तुंइसीब। हितोपदेस २२:६
12 नेंचा कली नोफा नु कोव़चा कली मिक्च मेको निम्फा परमप्रभु यावेमी सेल्तु।
13 शुश मइप्पो, मारदे हना गे प्रुङग दुम्नेवे। सेंसीशा बाक्को। मिनु शुश जचा ताइनेवे।
14 ग्याप्ब मुरुमी “एको मरिम्शो बाक्ब। मरिम्शो बाक्ब” दे इच्का आइक्ची लशा “गो सस्तो ग्याप्ता” दे आ नें बोरपाइक्ब।
15 शुश सुन नु शुश क्येट लाइब हीरा बाक्नीम। तन्न मेको आन क्येङा जोक्तीक लोव़ पाइब मुर रिम्शो बाक्ब।
16 अर्को रागी ङा मुर आ पर्बम जमानी दुम्शो मुर, आ वा रोइश्शा लतीन। मुर आ पर्बम जमानी बाक्शो आ मारेइ मारेइ नेल्ले लतीन। हितोपदेस ६:१-२; हितोपदेस २७:१३
17 खुइ पा जशो शोब्ले ङोंइती शुश ब्रोव़ब। नोले मेको फुल्लु नाक्शो खोदेंशो दुम्ब। हितोपदेस ९:१७
18 अर्ती नेंब मुर आ मिम्शो रिम्शो दुम्ब। जोक्ब तुइक्ब आन लोव़ नेंशा ला लडाइ पावो। हितोपदेस २४:६
19 लोव़ क्याल्ब मुरुमी ख्रुइश्शा पशो लोव़ यो फ्राइब। मोपतीके शुश लोव़ पाइब मुर नु वारच मदुमो।
20 सुम आ आम आफ आस कली सराप पाइबा, मेको आ बत्ती नेल्ल क्येङा छिङछिङमी काप्ब। हितोपदेस ३०:१७; प्रस्थान २१:१७
21 ङोंइती रीब पा थेरशो रू नोले आसीक मराइब।
22 गे मरिम्शो पाइब कली क्येक्क लेत्नुङ मदेनो। परमप्रभु यावेमी पाइब, दे रिम्दो। मिनु इ कली वारच पाइब। हितोपदेस २४:२९; रोमी १२:१७
23 जोल पा नाक्तीक तशा परमप्रभु यावे ग्रांग्रा दीब। मिनु दूली नाक्तीक ठीक मबाक्नीम।
24 परमप्रभु यावेमी मुर आन कली लां कोंइब। सुमी आंम लां रुप्ने चाप्बा ङा?
25 मुरुमी ममिम्थु “परमप्रभु यावे केन बाक्ब” देंशा, कसम जचा, थम हिंचा ङा बाक्ब। मारदे हना नोले मिम्शा, मार दुम्बा ङा?
26 जोक्ब तुइक्ब पिपमी परमप्रभु यावे आ अरेशो मटीब आन कली तिल्ब। मिनु मेको आन कली साइक्ब।
27 मुर आन थुं परमप्रभु यावे आ बत्ती बाक्ब। मिनु मेकोमी रां नेल्ल कली कोव़ब। १कोरिन्थी २:११
28 गेना हना यो दाक्शा गेनायो मप्रोंइतीकेमी पिप कली खाल पाइब। आ ठीक पतीकेमी आ सासन पतीके मजाम्ब। हितोपदेस १६:१२
