1 अङगुर शांबुमी हेंथे ब्वाक्पाइक्ब। राकसीमी राम्शी पपाइक्ब। सु मेको तूशा दुक्नीमी, मेको जोक्ब तुइक्ब मदुम्नीम। हितोपदेस २३:२९-३५; हितोपदेस ३१:५; होसे ४:११
2 पिप आन शुश गाइश्शो गुप्स आन ग्रीशो खोदेंशो बाक्ब। सुम मेको कली गाइक्पाइक्बा, मेको साइक्चा पुंइसीब। हितोपदेस १६:१४
3 राम्शी पतीक रे ङोन बाक्ब मुरुमी मान ताइब। तन्न मूर्ख नेल्ल रीब पा राम्शी पाइब बाक्नीम।
4 ग्यू दुम्तीके अल्सेमी ब्यफ मवाक्ब। मिनु अन्न रिक्ची ना मारेइ यो मताइब। हितोपदेस ६:६-११;
5 मुर आन थुं ङा मिम्शो लुक्च लशो ब्वाक्कु खोदेंशो बाक्ब। तन्न निप्स पाइश्शो मुरुमी ला मेको कीशा ग्रुंइने चाप्ब।
6 शुश मुरुमी “गो रिम्शो मुर नङ” दे अरु आन कली तुइक्पाइक्नीम। तन्न थमा सुइक्चा ङा मुर सु थिन्ने चाम्सीबा ङा?
7 ठीक पाइब मुर गेना हना यो रिम्शो पाइब बाक्ब। मेको आ आलपुकी ग्येरसीशो बाक्नीम। भजन संग्रह ११२:१२
8 निसाफ पाइब नित्तीकेम निश्शो पिपमी कोव़शा, रिम्शो नु मरिम्शो नेल्ल तिल्ब। भजन संग्रह १०१:३
9 मिनु सुमी “गो आं थुं रिम्शो सेल्ता। आं पाप क्याम्ताक्ङ” देंने चाप्बा ङा? हितोपदेस ३०:१२; अय्युब ४:१७; अय्युब ९:२-३
10 जोल पा नाक्तीक नु मगारशो पुक्तीक निम्फा परमप्रभु यावे कली ग्रांग्रा बाक्ब।
11 मिनु आल यो आन पतीकेमी दोदेंशो दुम्नीमी मेको कोंइनीम। ठीक पाइब नु रिम्शो थुं पाइश्शो आल बाक्ब, दे तुंइसीब। हितोपदेस २२:६
12 नेंचा कली नोफा नु कोव़चा कली मिक्च मेको निम्फा परमप्रभु यावेमी सेल्तु।
13 शुश मइप्पो, मारदे हना गे प्रुङग दुम्नेवे। सेंसीशा बाक्को। मिनु शुश जचा ताइनेवे।
14 ग्याप्ब मुरुमी “एको मरिम्शो बाक्ब। मरिम्शो बाक्ब” दे इच्का आइक्ची लशा “गो सस्तो ग्याप्ता” दे आ नें बोरपाइक्ब।
15 शुश सुन नु शुश क्येट लाइब हीरा बाक्नीम। तन्न मेको आन क्येङा जोक्तीक लोव़ पाइब मुर रिम्शो बाक्ब।