16 जोक्बपुकी होस पा मरिम्शो पतीक रे ङोन लाइनीम। तन्न मूर्ख मारेइ ममिम्थु, होस मपाइब।
17 रीब पा गाइक्ब मुरुमी मूर्खे गेय पाइब। मिनु मुर आन कली दोपा श्येत गेङा, दे मिम्ब। मेको सुइम मदाक्चा पुंइसीब।
18 मारेइ मजोक्ब मूर्खे गेयम ग्योम्सीशो बाक्नीम। तन्न निप्स पाइश्शो मुर जोक्तीके सिरपेच गुप्शो खोदेंशो बाक्नीम।
19 मरिम्शो पाइब मुरपुकी रिम्शो मुर आन ङोंइती बाप्नीम। मिनु परमप्रभु यावे आ अरेशो मटीबपुकी ठीक पाइब आन लाप्चोमी बाप्नीम।
20 आंम नेक्था ङा मुरुमी प्रुङग कली मदाक्नीम। तन्न शोंप पाइश्शो मुर आन के वारच शुश बाक्नीम।
21 सुम आ नेक्था ङा मुर कली दिप्बा, मेकोमी पाप पाइब। तन्न सुमी प्रुङग आन कली वारच पाइबा, मेको ग्येरसीशो मुर बाक्ब। भजन संग्रह ४१:२
22 मार, मरिम्शो मिम्शा पाइब हेंथे लां मगाक्नीमी, ङा? रिम्शो पचा मिम्शा पाइबमी गेना हना यो दाक्शा मप्रोंइचा पुंइसीनीम।
23 गेय पतीक नेल्लेमी दारतीक बाक्ब। तन्न लोव़ पा ला बाक्ब मुर प्रुङग दुम्ब।
24 जोक्ब मुर आन तुइक्तीके आन सिरपेच खोदेंशो बाक्ब। तन्न मूर्ख आन पशो आन माला खोदेंशो बाक्ब।
