3 रिम्शो थुं पाइश्शो मुर आन कली गेना हना यो आन रिम्शो पतीकेमी लां कोंइब। तन्न थमा सुइक्चा मपुंइसीब मुर आन कली आन मरिम्शो पतीकेमी खतम सेल्ब।
4 गाइश्शो नाक्ती शुश शोंप शोर गाक्शो दुम्ब। तन्न ठीक पतीकेमी बेक्तीक रे प्रोंइब। लूका १२:२०; हितोपदेस १०:२
5 दोस मताइब आन ठीक पतीकेमी मेको आन लां थेल्ब। तन्न परमप्रभु यावे आ अरेशो मटीब आन मटितीकेमी खतम दुम्नीम।
6 रिम्शो थुं पाइश्शो मुर आन ठीक पतीकेम ब्रोंइचा ताइनीम। तन्न थमा सुइक्चा मपुंइसीब मुर आन मरिम्शो पतीकेमी ग्याइक्चा पुंइसीनीम।
7 परमप्रभु यावे आ अरेशो मटीब मुर बेक्मानु, आन आस यो जाम्शा लाइब। मेको आन मिम्शो नेल्ल मदुम्ब। हितोपदेस १०:२८
8 ठीक पाइब मुर हिंचा ङा श्येत रे प्रोंइचा पुंइसीनीम। तन्न परमप्रभु यावे आ अरेशो मटीबपुकी मेको श्येतमी हुम्सीनीम।
9 मरिम्शो मुर आन लोव़मी आन नेक्था ङा मुर आन कली खतम सेल्नीम। तन्न ठीक पाइब मुर मेको आन जोक्तीकेमी प्रोंइचा पुंइसीनीम।
10 ठीक पाइब मुर आन कली रिम्शो दुम्त हना, सहर ङा मुर नेल्ल ग्येरसीनीम। परमप्रभु यावे आ अरेशो मटीब खतम दुम्मानु, मुर नेल्ल थाम्पा ग्येरसीनीम।
11 रिम्शो थुं पाइश्शो मुर आसीक तामेनु, सहर कली रिम्शो दुम्ब। तन्न परमप्रभु यावे आ अरेशो मटीब आन लोव़मी सहर कली मरिम्शो दुम्ब। हितोपदेस २८:१२
12 सुमी अरु मुर आन कली आइक्च सेल्बा, मेको निप्स मपाइश्शो बाक्ब। तन्न निप्स पाइश्शो मुर सिक्सी पा बाक्ब। भजन संग्रह १५:३
13 लोव़ क्याल्बमी ख्रुइश्शो लोव़ यो फ्राइनीम। तन्न थमा सुइक्चा पुंइसीब मुरुमी मोदेंशो लोव़ ख्राप्शा वोइक्नीम।
14 लां कोंइब मबाक्त हना, रागी खतम दुम्ब। तन्न अर्ती गेब शुश बाक्तेक्म हना, मेको लीब।
15 अरु मुर आन जमानी बाक्शोनु, मरिम्शो दुम्ब। तन्न जमानी मबाक्शो रिम्शो दुम्ब। हितोपदेस ६:१-२
16 रिम्शो थुं पाइश्शो मीश मुर कली मान पाइनीम। तन्न मरिम्शो पाइब मीश मुनेमी सुम्सीशो बाक्ब। गेय मपाइब मुर प्रुङग दुम्ब। तन्न आंट पा गेय पाइबमी क्येट चेम्ब।
17 रिम्शो पाइब मुरपुकीमी आंम कली रिम्शो पाइनीम। तन्न मरिम्शो पाइबपुकी श्येत गेंसीनीम।
18 परमप्रभु यावे आ अरेशो मटीब मुरुमी क्येट चेम्ब, तन्न मलीब। तन्न ठीक पाइब मुरुमी इनाम ताइनीम।
19 सु गेना हना यो ठीक पाइब बाक्बा, मेको ब्रोंइब। तन्न सु मरिम्शो पचा कली चुइक्बा, मेको बेक्ब। हितोपदेस १९:२३
20 मरिम्शो थुं परमप्रभु यावे कली ग्रांग्रा बाक्ब। तन्न दोस मताइब रिम्शो थुं पाइश्शो मुर आन लां गाक्शो तशा ग्येरसीब।
21 मरिम्शो पाइब मुर सजाइ मतथु मब्रोंइनीम। मेको थमा बाक्ब। तन्न ठीक पाइब आन चच युइ ब्रोंइचा ताइनीम।
22 निप्स मपाइश्शो दारशो मीश मुर सुन के मुन्द्री पांइशो पोव़ खोदेंशो बाक्ब। हितोपदेस ३१:३०
23 ठीक पाइब मुर आन दाक्शो थमा पा ताइनीम। परमप्रभु यावे आ अरेशो मटीबम गाइक्पाइक्नीम।
24 का निक्शी मुरुम शुश गेनीम हना यो, आन शोंप मेको क्येङा बारब। का निक्शी चहिं आन गेचा माल्शो मगेथु, प्रुङग दुम्नीम। मत्ती २५:२९; २कोरिन्थी ९:६
25 हाइश्शो मुरुमी शुश ताइब। सुम अरु आन कली वारच पाइक्बा, मेकोमी आंमा यो वारच पाइक्चा पुंइसीब।
26 अरु आन कली अन्न मगेथु खेक्शा वोइक्ब मुर सराप पाइक्चा पुंइसीब। तन्न अन्न लेयब मुर आसीक ताइब।
27 सुम रिम्शो पतीके माल्शा पाइबा, मेकोमी शिशी माल्ब। सुम मरिम्शो पतीके माल्बा, मेको मरिम्शो पाइक्चा पुंइसीब।
