5 तेको थोव़क आ पर्बम जोल पा कसम जशो बाक्मे, मेकोमी मेको थोव़क नेल्लेमी ५ भाग तेम्शा, आ होव़प कली लेश्शा गेचा माल्ब। मेकोमी दोस आ पर्बम चढ़ेतीक नाक्ती मेको सु के बाक्मे मेको आ नेक्था ङा मुर कली लेश्शा गेचा माल्ब।
6 मिनु मेकोमी परमप्रभु यावे आ ङोंइती ठीक पा हिक्शो क्येट कि आ बगाल रे मारेइ मदुम्शो थम रिम्शो सांड का आ मरिम्शो पशो आ पर्बम चढ़ेब आ नेक्था परमप्रभु यावे आ बाक्तीकेमी चढ़ेचा कली चाक्चा माल्ब।
7 मिनु मेको चढ़ेबमी मेको आ पर्बम परमप्रभु यावे आ ङोंइती पाप क्याम्तीक गेय पचा माल्ब। मिनु मेकोमी मार आ पर्बम दोस तशो बाक्मे, मेकोम माफ ताइब” देंत।
8 मिनु परमप्रभु यावेमी मोसा कली
9 “गे हारून नु आ तौ आन कली चोशा चढ़ेचा आ पर्बम अरेमी। मेको चोशा चढ़ेतीक नाक्दो रे सुनी सम्म चढ़ेतीके शी तार बाक्चा माल्ब। मिनु चढ़ेतीक ङा मी यो ब्रस ङा ब्रस बाक्चा माल्ब।
10 मिनु चढ़ेबमी आ सुती के आगा फेक्तीक वा नु सुती के फेक्तीके फेक्चा माल्ब। मिनु मेकोमी मीम दाक्शो चोशा चढ़ेशो आ पुलु हुइश्शा चढ़ेतीक आ नेक्था वोइक्चा माल्ब। प्रस्थान २८:४२
11 मिनु नोले मेकोमी आ फेक्शो वा प्रुइश्शा, अर्को वा फेक्शा, मेको पुलु ताम्बु रे ग्रुंइशा चोव़खो पुलु ताइक्तीकेमी लाइश्शा ताइक्चा माल्ब।
12 चढ़ेतीक ङा मी चहिं ब्रस ङा ब्रस बाक्चा माल्ब। मेको काप्चा मदुम्ब। मिनु सुनी कुस कुस चढ़ेबमी मेकेर शी तेम्चा माल्ब। मिनु चोशा चढ़ेतीके मीम दुशा बाक्तीक आ पर्बम चढ़ेशो आ बोंसो चोचा माल्ब।
13 चढ़ेतीक ङा मी ब्रस ङा ब्रस बाक्चा माल्ब। मेको गेनायो काप्चा मदुम्ब।
