12 मिनु ब्वाक्कुम बाक्ब नेल्ले फ्रां नु कत्ला मपाइश्शो जन्तु, इन कली ग्रांग्रा बाक्नीम।
13 मिनु चिक्ब आन दातेमी इन कली तेको तेको ग्रांग्रा दिशो नु ब्वचा मदुम्शो बाक्नीम देंशा हना, ककाकुली, गिद, क्येर गिद,
14 लल ब्वारदे नु नेल्ल खाल ङा क्येर ब्वारदे, लेवी ५:२
15 खद नेल्ले,
16 ठेयब हुहुचील, ग्रीब बुक्स, ब्वाक्कुम बाक्ब चिक्ब, मिनु बाज नेल्ले,
17 आइक्च हुहुचील, ब्वाक्कु ङा खदी, भुल्का,
18 बुश हुहुचील, गोरशो रागी ङा हुहुचीलपुकी, ङांइ ब्वाइब ब्वारदे,
19 सारस, बोकुला नेल्ल, फाप्रे चिक्ब नु पकातिक्ती मब्वने। यसैया ६६:१७
20 फ्रां पाइश्शो, ४ ओटा खोइलीम ग्रेशा गाक्ब जन्तु नेल्ल इन कली ग्रांग्रा बाक्नीम।
21 मिनु ४ ओटा खोइलीम ग्रेशा गाक्ब, फ्रां पाइश्शो खपीम प्रेक्चा कली खोइल बोइश्शो नेल्ल मालेपुकी ब्वने चाप्नीनी।
22 गे सल्हा माले, खुइले माले, किथ्रो माले नु फटेङग्रापुकी ब्वने चाप्नीनी।
23 ४ ओटा खोइल पाइश्शो नु फ्रां पाइश्शो नेल्ल इन कली ग्रांग्रा बाक्नीम।
24 मेकोपुकी रे गेपुकी ग्रांग्रा दिशो दुम्नीनी। सुमी मेको आन सिनु थीबा, मेको नां मरिक्म सम्म ग्रांग्रा दिशो दुम्ब।
25 मिनु सुमी मेको सिनु रे इच्का कुरबा, मेकोमी आ वा मुरचा माल्ब। मिनु नां मरिक्म सम्म ग्रांग्रा दिशो दुम्ब।
26 मिनु तेको जन्तु आन गेंच जेश्शो बाक्बा, तन्न मब्राक्शो बाक्बा, मेको शोंया महेक्बा, मेको इन कली ग्रांग्रा बाक्ब। मेको थीब नेल्ल ग्रांग्रा दिशो दुम्नीम।
27 मिनु ब्रेप्चोम थेक्शा ४ ओटा खोइलीम गाक्ब जन्तु नेल्ल इन कली ग्रांग्रा बाक्नीम। मेको आन सिनु थीब नेल्ल नां मरिक्म सम्म ग्रांग्रा दिशो दुम्नीम।
28 मेको सुमी आन सिनु कुरब मेकोमी आ वा मुरचा माल्ब। मिनु मेको नां मरिक्म सम्म ग्रांग्रा दिशो दुम्ब। मेको इन कली ग्रांग्रा दिशो बाक्नीम।
29 मिनु खपीम ग्रेशा गाक्ब आइक्च जन्तु तेको ग्रांग्रा दिशो बाक्नीम देंशा हना, कोचोम्बो, यिच, ठेयब नु आइक्च खोते नेल्ले,
30 माउसुली, घोरी, भाले मुङग्रो, बाल्वाम बाक्ब खोते नु रङ फाइक्ब खोतेपुकी,
31 मेको ग्रेशा गाक्ब नेल्ल इन कली ग्रांग्रा बाक्नीम। सुमी मेको आन सिनु थीबा, मेको नां मरिक्म सम्म ग्रांग्रा दिशो दुम्ब।
32 मोदेंशो जन्तु बेक्शा, मार तारी दोक्बा, मेको थोव़क ग्रांग्रा दिशो दुम्ब। शी के सेल्शो, वा, कुशुल, भाङग्रा नु मारेइ के बाक्ल, मेको थोव़क ब्वाक्कुम नुप्चा माल्ब। मिनु मेको नां मरिक्म सम्म ग्रांग्रा दिशो दुम्ब। मिनु नोले ठीक दुम्ब।
33 मिनु मेको मार मार खप के बोसुम दोक्त हना, मेको बोस नेल्ल ग्रांग्रा दिशो दुम्ब। गेपुकीमी मेको बोस प्रोल्चा माल्नीनी।
34 मेको आगाम ब्वाक्कु बाक्त हना, मिनु मेको ब्वाक्कुम थिशो मारेइ मारेइ जचा थोव़क ग्रांग्रा दिशो दुम्ब। मिनु मेको बोसुम बाक्शो तूचा थोव़क नेल्ल ग्रांग्रा दिशो दुम्नीम।
35 मेको आन सिनु मारेइ थोव़कम दोक्त हना, चुप्लुम बाक्त हना यो, मेको प्रेश्शा ताइक्चा माल्ब। मेको ग्रांग्रा दिशो बाक्ब। मेको गेना हना यो इन कली ग्रांग्रा बाक्ब।
36 मो हना यो ब्वाक्कु बुक्तीके, कुवा नु ब्वाक्कु वोइक्तीके चोव़खो बाक्नीम। तन्न मेको आन सिनु थीब चहिं ग्रांग्रा दिशो बाक्ब।
37 मेको आन श्ये शोक्तीक वांचेरम दोक्त हना, मेको चहिं चोव़खो लीब।
38 तन्न मेको आ सिनु शोक्चा कली ब्वाक्कुम वोइश्शो वांचेर तारी दोक्त हना, मेको इन कली ग्रांग्रा दिशो दुम्ब।
39 इन बस्तु भाव बेक्त हना, सुमी मेको कली थीब, मेको नां मरिक्म सम्म ग्रांग्रा दिशो दुम्ब।
40 मेको सुम ब्वाइबा, मेकोमी आ वा मुरचा माल्ब नु नां मरिक्म सम्म ग्रांग्रा दिशो दुम्ब। मेको सिनु कुरबमी यो आ वा मुरचा माल्ब। मिनु मेको नां मरिक्म सम्म ग्रांग्रा दिशो दुम्ब। प्रस्थान २२:३०
41 खपीम ग्रेशा गाक्ब जन्तु नेल्ल ग्रांग्रा दिशो बाक्नीम। मेको ब्वचा मदुम्ब।
42 कोव़जीम ग्रेशा गाक्ब, ४ ओटा खोइलीम गाक्ब नु शुश खोइल पाइश्शो खपीम गाक्ब जन्तुपुकी ब्वचा मदुम्ब। मारदे हना मेकोपुकी ग्रांग्रा दिशो बाक्नीम।
43 मिनु गेपुकी तेकोइ ग्रेशा गाक्ब जन्तु रे ग्रांग्रा दिशो मदुमीन। मेकोपुकी रे इन कली ग्रांग्रा दिशो मसेलीन।
44 मिनु गो परमप्रभु यावे, इन परमप्रभु नङ। मोपतीके गेपुकी ग्रांग्रा दिशो मदुम्थु मेको रे ङोन बाक्कीन। मारदे हना गो ग्रांग्रा दिशो रे ङोन बाक्नुङ। गेपुकी खपीम ग्रेशा गाक्ब जन्तु रे ग्रांग्रा दिशो मदुमीन। लेवी १९:२
45 गो परमप्रभु यावे, इन कली इजीप्त रागी रे ग्रुंइशा एक चाक्ब, इन परमप्रभु नङ। मोपतीके गेपुकी ग्रांग्रा दिशो रे ङोन बाक्कीन। मारदे हना गो ग्रांग्रा दिशो रे ङोन बाक्नुङ’ देनो” देंत।
