34 जमाहेन्से थे सिबा तेबान तबा म्हि मुबा ग्लारी निसी थेसे थे म्हिला पोरगदेरी छ्युगुदेन अङगुरला निङगु फोर्सी क्वानगेनसे खीजी। ओच्छे थेसे थे म्हिदा ह्राङलान गधाथोरी थान्सी म्हिगदे बास चिबा पाटी गिकरी भोर्सी म्हुन गिक ह्राङसेन थे म्हिला सयार लजी।
35 न्हङगरदङ निबा धुइरी थेसे थे पाटीला धनीदा म्हुइला डबल न्ही पिन्सी थेसे ‘ज्यना लसी चुला सयार लउ, अझ खर्च ल्हानान निसम ङा दोःसी खमा ह्राङदा पिन्ना’ भिसी भिजी।”
36 येशूसे थेदा “एला बिचाररी चु म्हि सोम न्हङरी खजिबा चा थे य्होसे स्याप्बा म्हिला खिम्जेम तजी?” भिसी ङ्योइमा,
37 थेसे येशूदा “थे य्होगदेसे तोबा म्हिदा दया लबा म्हि” भिसी भिजी। ओच्छे येशूसे थेदा “दाहेन्से निसी एसेनोन थेह्रङ्नोन लउ” भिसी सुङ्जी।
38 ओच्छे येशू ह्राङला चेलागदेदेन छ्याम फेप्बान लमा नाम्सा गिकरी धोजी, थे नाम्सारी मुबा मार्था भिबा म्रिङम्हेमेसे येशूदा ह्राङला दिमरी ङ्योइजी।
39 थे म्रिङम्हेमेला मरियम भिबा आङा गिक मुबा, थे चा येशूला ङामरी चिसी येशूला ताम ङ्यान्मुबा।
40 मार्था चा येशूदा क्योङ्बाला लागिरी चबा स्हे स्होबा गेरी कोल्सी चिबा मुबा। ओच्छे थे येशूला ङामरी खसी, “प्रभु, चबा स्हे स्होबारी आङासे ङादा ह्रो आलबा ह्राङसे म्राङ्बा आरे? ह्राङसे ङादा ह्रो लबारी निउ भिसी थेदा सुङ्सी पिन्गो” भिसी भिजी।
41 तर येशूसे थेदा “मार्था, ए ल्हानान तामरी धन्दा सुर्दा जे लमुला।
