ᤗᤢᤁᤠ 10:4-20 in Limbu

⁴ ᤂᤡᤏᤡ᤹ ᤗᤠᤶᤍᤡ᤺ᤰᤁᤥ ᤛᤠᤒᤪᤡᤜᤠ᤹. ᤛᤢ᤺ᤰᤘᤠᤜᤠ᤹ ᤜᤧᤰᤁᤩᤠᤱ ᤗᤠᤱᤛᤢ᤺ᤵᤜᤠ᤹ ᤌᤣᤀᤠᤱ ᤔᤧᤕᤠᤱᤅᤠᤛᤡᤶᤔᤧᤴᤏᤧ᤹ᤀᤥ. ᤜᤧᤰᤁᤩᤠᤱ ᤗᤠᤶᤔᤥ ᤔᤏᤠᤜᤠ᤹ᤏᤢ ᤛᤣᤘᤠ ᤔᤕᤧᤶᤔᤧ᤹ᤖ ᤔᤧᤜᤶᤛᤡᤱᤅᤧᤶᤔᤡᤴᤏᤧ᤹ᤀᤥ॥

⁵ ᤂᤡᤏᤡ᤹ ᤀᤠᤳᤋᤡᤴ ᤜᤡᤶᤔᤥ ᤁᤧᤗᤠ᤺ᤛ᤻ᤛᤡ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤁᤴ ᤜᤡᤶᤔᤥ ᤜᤠᤖᤠ᤹ ᤛᤏᤠᤖᤢᤱ ᤋᤠᤏᤡᤖᤥ ᤗ᤹ᤖᤡᤰ ᤐᤠ᤺ᤳᤋᤧᤶᤔᤧ᤹॥

⁶ ᤂᤧᤴ ᤜᤡᤶᤔᤥ ᤛᤏᤠᤖᤢᤱ ᤂᤥ᤺ᤔᤠ ᤗᤠ᤹ᤖᤢᤒᤠ ᤔᤏᤠ ᤘᤠ᤹ᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤧᤵᤔᤥ ᤘᤠ᤹ ᤗᤠ᤺ᤳᤗᤥ. ᤁᤖ ᤜᤧᤰᤋᤱᤒᤠ ᤔᤏᤠ᤺ᤴ ᤜᤥ᤺ᤵᤏᤧ ᤑᤠ᤹ᤃᤪ ᤂᤡᤏᤡ᤹ ᤛᤏᤠᤖᤢᤱᤅᤡᤴ ᤂᤡᤏᤡ᤹ᤀᤥᤀᤣ ᤕᤠᤱᤏᤠ ᤏᤢ᤺ᤱ ᤋᤠ᤺ᤖᤥ॥

⁷ ᤀᤠᤳᤋᤡᤴ ᤜᤡᤶᤔᤥ ᤂᤡᤏᤡ᤹ ᤁᤧᤘᤕᤡ᤹. ᤒᤠ ᤂᤧᤵᤔᤥᤀᤣ ᤘᤕᤧᤶᤔᤧ᤹ᤀᤠᤱ ᤂᤡᤏᤡ᤹ ᤁᤧᤶᤒᤡᤖᤡᤒᤠ ᤆᤠᤔᤠ ᤌᤢᤱᤔᤠᤜᤠ᤹ ᤆᤧᤶᤔᤧ᤹ ᤌᤢᤅᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤕᤠ᤺ᤗᤡᤰᤁᤡᤴ ᤏᤠᤶᤕᤠᤰ ᤂᤥ᤺ᤔᤠ ᤗᤠ᤹ᤖᤢᤖᤥ॥ ᤂᤡᤏᤡ᤹ ᤜᤡᤶ ᤌᤵᤔᤣ ᤋᤠᤰᤔᤧᤃᤴᤍᤧᤶᤔᤡᤴᤏᤧ᤹ᤀᤥ॥

⁸ ᤂᤡᤏᤡ᤹ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤁᤧᤗᤠ᤺ᤛ᤻ᤛᤡᤸᤗᤧ ᤗᤠᤱᤍᤠ᤺ᤰᤔᤠ ᤁᤧᤶᤒᤡᤖᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤶᤍᤥ᤺ᤴᤍᤡ᤹ ᤁᤧᤶᤒᤡᤖᤡᤒᤠ ᤆᤠᤜᤠ᤹ ᤆᤧᤶᤔᤧ᤹.

⁹ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤧᤶᤛᤡᤶᤔᤧ᤹ᤀᤠᤱ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹. ‘ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ᤖᤥ॥’

¹⁰ ᤁᤖ ᤀᤠᤳᤋᤡᤴ ᤐᤠᤱᤈᤢᤶᤔᤥ ᤂᤡᤏᤡ᤹ ᤗᤠᤱᤍᤠ᤺ᤰᤔᤠ ᤁᤧᤔᤧᤶᤒᤡᤖᤡᤴ. ᤂᤧᤴ ᤐᤠᤱᤈᤢᤶᤜᤠ᤹ᤀᤥᤒᤠ ᤗᤠᤶ ᤜᤧᤱᤄᤠ᤺ᤳᤋᤡ ᤗ᤺ᤴᤍᤧᤶᤔᤧ᤹ᤀᤠᤱ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤶᤛᤡᤶᤔᤧ᤹.

¹¹ ‘ᤀᤠᤏᤡᤃᤧ ᤗᤠᤱᤅᤥ ᤂᤡᤵᤋᤢᤀᤠᤱ ᤁᤧᤒᤵᤐᤠ ᤂᤡᤏᤡ᤹ ᤐᤠᤱᤈᤢᤶᤔᤥᤒᤠ ᤂᤠᤶᤜᤡ᤺ᤰᤜᤠ᤹ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤠᤏᤡᤃᤧ ᤌᤠᤵᤛᤢᤶᤒᤧᤖᤥ॥ ᤜᤧᤰᤁᤣᤛᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤂᤡᤏᤡ᤹ ᤏᤡ᤺ᤳᤋᤠᤱ ᤋᤩᤧᤀᤠᤱ ᤘᤠ᤹ ᤁᤧᤗ᤹ᤒᤠ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹ᤀᤥ॥

¹² ᤂᤠᤛᤧᤴ ᤕᤧᤴᤏᤥ ᤂᤧᤴ ᤐᤠᤱᤈᤢᤶᤔᤡᤸᤗᤧ ᤁᤢᤍᤢᤰᤂᤣ᤺ᤱᤃ ᤛᤠᤍᤥᤔᤖᤧ ᤁᤢᤍᤢᤰᤂᤣ᤺ᤴᤏᤢ᤺ᤸᤗᤧᤀᤠᤱ ᤁᤧᤛᤠᤰᤐᤠ ᤐᤥ᤺ᤱ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥’”

¹³ “ᤂᤥᤖᤠᤈᤡᤏ ᤏᤢ ᤒᤧᤌᤛᤣᤍᤠ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤆᤡ᤺ᤳᤋᤧᤀᤠᤱᤗᤰ ᤛᤩᤧᤖᤥ᥄ ᤂᤡᤏᤡ᤹ ᤐᤠᤱᤈᤢᤶᤔᤥ ᤐᤥ᤺ᤰᤂᤧᤒᤠ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤜᤠ᤹ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤏᤡ᤹ ᤕᤧᤰᤕᤰ ᤋᤠᤕᤖ ᤏᤢ ᤛᤡᤍᤥᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤸᤗᤧᤃ ᤀᤢᤴᤇᤥ᤺ᤴᤇᤠ ᤂᤧᤵᤔᤥᤒᤠ ᤔᤏᤠᤜᤠ᤹ ᤗᤠᤕᤥᤗᤠᤶ ᤜᤡᤴᤍᤡᤃᤧ ᤑᤠ᤹ᤀᤠᤱ ᤛᤃᤡ ᤋᤣ᤺ᤳ ᤔᤧᤈᤠᤰᤛᤡᤱᤅᤠᤱ ᤂᤠᤵᤐᤢ ᤔᤧᤈᤢ᤺ᤳᤇᤡᤱᤒᤠᤔᤧᤴ॥

¹⁴ ᤁᤖ ᤂᤠᤛᤧᤴ ᤕᤧᤴᤏᤥᤃ ᤂᤡᤏᤡ᤹ ᤋᤢᤰᤂᤣᤏᤢ᤺ᤸᤗᤧ ᤋᤠᤕᤖ ᤏᤢ ᤛᤡᤍᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤴ ᤌᤶᤔᤠ ᤛᤢᤰᤁᤧᤍᤧᤵᤐᤠ ᤐᤥ᤺ᤱᤗᤥ॥

¹⁵ ᤜᤧᤰᤁᤩᤠᤱ ᤂᤡᤏᤡ᤹ ᤁᤐᤷᤏᤜᤢᤔ ᤐᤠᤱᤈᤢᤶᤔᤥᤒᤠ ᤔᤏᤠᤛᤣ. ᤛᤠᤱᤃᤪᤠᤶᤐᤣᤍᤠᤱ ᤌᤠᤖᤡᤰ ᤐᤣᤃᤡᤃᤧ᤹ ᤁᤧᤗ᤹ᤖᤡᤒᤡ᥅ ᤔᤧ᤺ᤴᤗᤥ᥄ ᤂᤡᤏᤡ᤹ᤃ ᤂᤧᤔᤠᤕᤱᤛᤱ ᤌᤠᤖᤡᤰ ᤁᤧᤎᤩᤧ᤹ᤀᤡᤖᤥ॥

¹⁶ ᤀᤠᤳᤋᤡᤸᤗᤧ ᤂᤡᤏᤡ᤹ ᤐᤠ᤺ᤴ ᤂᤧᤵᤛᤢ᤹. ᤂᤧᤸᤗᤧ ᤀᤠᤒᤠ᤺ᤴᤏᤡᤴᤏᤠᤱ ᤂᤧᤵᤛᤢ᤹॥ ᤀᤠᤳᤋᤡᤸᤗᤧ ᤁᤧᤏᤠ᤹ᤖᤡ᤹. ᤂᤧᤸᤗᤧ ᤀᤡᤱᤃᤠ᤹ᤀᤠᤱ ᤏᤠ᤹ᤀᤠᤖᤥ॥ ᤜᤧᤰᤁᤩᤠᤱ ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤏᤠ᤹ᤀᤠ. ᤂᤧᤸᤗᤧ ᤕᤠᤵᤔᤡ ᤁᤧᤒᤠᤱᤒᤧᤴᤏᤠᤱ ᤏᤠ᤹ᤖᤢ᤹ᤖᤥ॥”

¹⁷ ᤏᤢ-ᤏᤧᤳ (᥍᥈) ᤜᤢ᤹ᤛᤠᤶᤒᤠᤜᤠ᤹ ᤔᤧᤛ᤺ᤳᤋᤧᤖ ᤔᤧᤍᤩᤧᤀᤠᤱ ᤕᤧᤛᤢ᤺ᤴ ᤔᤧᤔᤧᤳᤋᤢ. “ᤀᤠᤍᤠᤱᤒᤣ. ᤂᤧᤏᤧ᤹ ᤁᤧᤔᤡᤱᤅᤥᤃ ᤑᤧᤴᤛᤠᤶᤜᤠ᤹ ᤀᤠᤏᤡᤃᤧ ᤕᤢᤰᤁᤥ ᤔᤧᤍᤩᤧᤖᤥ॥”

¹⁸ ᤕᤧᤛᤢᤖᤧ ᤂᤧᤱᤜᤠ᤹ ᤏᤥᤃᤵ ᤐᤡᤖᤢᤛᤡ. “ᤔᤠᤑᤧᤴᤛᤠᤶᤔᤡᤴ ᤛᤠ᤺ᤶᤓᤣ ᤗᤧᤰᤋᤧᤒᤠ ᤁᤢᤀᤡᤛᤡ᤺ᤰ ᤛᤠᤱᤃᤪᤠᤶᤐᤣᤍᤠᤱᤗᤠᤶ ᤔᤰᤌᤩᤧᤖ ᤐᤳᤇᤧᤒᤠ ᤀᤡᤱᤃᤠ᤹ ᤏᤡ᤺ᤛᤢᤱ॥

¹⁹ ᤏᤡᤱᤔᤡ᤺ᤸᤗᤧ ᤁᤢᤔᤢᤰᤛᤠᤶ ᤛᤶᤍᤠᤱ ᤀᤡᤱᤃᤠ᤹ ᤕᤢᤰ ᤐᤡᤏᤡᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤛᤣ᤺ᤰᤐᤠᤜᤠ᤹ ᤛᤶᤍᤠᤱ ᤂᤡᤏᤡ᤹ ᤗᤠᤱᤁᤧᤄᤣᤃᤡ᤹. ᤋᤠᤱᤛᤠᤱ ᤂᤧᤒᤰᤜᤠ᤹ ᤁᤧᤍᤥ᤹ᤖᤢᤶᤛᤡᤶ. ᤁᤖ ᤌᤣᤀᤠᤱ ᤁᤧᤔᤧᤶᤔᤧᤳᤋᤡᤴᤗᤥ॥

²⁰ ᤜᤧᤰᤁᤣᤛᤠᤱ ᤑᤧᤴᤛᤠᤶᤜᤠ᤹ ᤂᤡᤏᤡ᤹ ᤕᤢᤰᤁᤥ ᤔᤧᤘᤠ᤹ ᤑᤠ᤹ᤀᤠᤱ ᤔᤧ᤺ᤴ. ᤁᤖ ᤛᤠᤱᤃᤪᤠᤶᤐᤣᤍᤠᤱᤅᤥ ᤂᤡᤏᤡ᤹ ᤔᤡᤱ ᤛᤠᤵᤋᤧᤀᤠᤱ ᤐᤵᤐᤠᤸᤗᤧ ᤆᤥᤃᤢᤸᤗᤧ ᤛ᤺ᤳᤋᤧᤶᤔᤧ᤹ᤀᤥ॥”

⁴ खिनिॽ लाम्‍दिःक्‍को साब्रिहाॽ, सुःक्‌वाहाॽ हे़क्‍क्‍याङ् लाङ्‌सुःप्‍हाॽ थेआङ् मे़याङ्‌ङासिम्‍मे़न्‍ने़ॽओ, हे़क्‍क्‍याङ् लाम्‍मो मनाहाॽनु सेवा मये़म्‍मे़ॽर मे़हम्‍सिङ्‌ङे़म्‍मिन्‍ने़ॽओ॥

⁵ खिनिॽ आत्तिन् हिम्‍मो के़लाःस्‍सि के़रे़क्‍नुःल्‍ले़ तगि कन् हिम्‍मो हाराॽ सनारुङ् तानिरो लॽरिक् पाःत्ते़म्‍मे़ॽ॥

⁶ खे़न् हिम्‍मो सनारुङ् खोःमा लाॽरुबा मना वाॽने़ फाॽग्र खिनिॽ सनारुङ्‌ङिन् खे़प्‍मो वाॽ लाःत्‍लो, कर हे़क्‍तङ्‌बा मनाःन् होःप्‍ने़ फाॽग्र खिनिॽ सनारुङ्‌ङिन् खिनिॽओए याङ्‌ना नुःङ् ताःरो॥

⁷ आत्तिन् हिम्‍मो खिनिॽ के़वयिॽ, बा खे़प्‍मोए वये़म्‍मे़ॽआङ् खिनिॽ के़म्‍बिरिबा चामा थुङ्‌माहाॽ चे़म्‍मे़ॽ थुङे़म्‍मे़ॽ, थेआङ्‌भे़ल्‍ले़ याःलिक्‍किन् नाम्‌याक् खोःमा लाॽरुरो॥ खिनिॽ हिम् थप्‍मे ताक्‍मे़गन्‍दे़म्‍मिन्‍ने़ॽओ॥

⁸ खिनिॽ आत्तिन् पाङ्‌जुम्‍मो के़लाःस्‍सिल्‍ले़ लाङ्‌दाःक्‍मा के़म्‍बिरिॽ हे़क्‍क्‍याङ् खिनिॽ के़म्‍दोःन्‍दिॽ के़म्‍बिरिबा चाहाॽ चे़म्‍मे़ॽ,

⁹ के़दुक्‍पा के़यॽबाहाॽ वेःन्‍दे़म्‍सिम्‍मे़ॽआङ् अक्‍खे मे़त्ते़म्‍सिम्‍मे़ॽ, ‘निङ्‌वाॽफुहाङ्‌जुम्‍मिन् खिनिॽ निःत्ताङ् त्‍ये़आङ् वाॽरो॥’

¹⁰ कर आत्तिन् पाङ्‌जुम्‍मो खिनिॽ लाङ्‌दाःक्‍मा के़मे़म्‍बिरिन्, खे़न् पाङ्‌जुम्‍हाॽओबा लाम् हे़ङ्‌घाःत्ति लःन्‍दे़म्‍मे़ॽआङ् खे़ङ्‌हाॽ अक्‍खे मे़त्ते़म्‍सिम्‍मे़ॽ,

¹¹ ‘आनिगे़ लाङ्‌ङो खिप्‍तुआङ्‌के़बप्‍पा खिनिॽ पाङ्‌जुम्‍मोबा खाम्हिःक्‍हाॽ खिनिॽ तक्‍ले़ङ्‌वाओ आनिगे़ थाप्‍सुम्‍बे़रो॥ हे़क्‍केसाङ् निङ्‌वाॽफुहाङ्‌जुम्‍मिन् खिनिॽ निःत्ताङ् त्‍ये़आङ् वाॽ के़लॽबा कुसिङ् निःत्ते़म्‍मे़ॽओ॥

¹² खासे़न् ये़न्‍नो खे़न् पाङ्‌जुम्‍मिल्‍ले़ कुदुक्‍खेःङ्‌ग सादोमरे़ कुदुक्‍खेःन्‍नुःल्‍ले़आङ् के़साक्‍पा पोःङ् फाॽआङ् मे़त्‍निङ्‌लो॥’”

¹³ “खोराजिन नु बे़थसेदा पाङ्‌जुम्‍मोबा मनासे, चिःत्ते़आङ्‌लक् स्‍ये़रो! खिनिॽ पाङ्‌जुम्‍मो पोःक्‍खे़बा निङ्‌वाॽ के़माबा याःम्‍बक्‍हाॽ ताक्‍के़भे़ॽबाहाॽरे़ खुनिॽ ये़क्‌यक् तायर नु सिदोन्‍नो पोःक्‍खे़आङ् वये़ल्‍ले़ग उन्‍छोःन्‍छा खे़प्‍मोबा मनाहाॽ लायोलाम् हिन्‍दिगे़ फाॽआङ् सगि तेःत् मे़जाक्‍सिङ्‌ङाङ् खाप्‍पु मे़जुःत्‍छिङ्‌बामे़न्‌॥

¹⁴ कर खासे़न् ये़न्‍नोग खिनिॽ तुक्‍खेनुःल्‍ले़ तायर नु सिदोनबा मनाहाॽरे़ खुनिॽ तुक्‍खेःन् थम्‍मा सुक्‍के़दे़प्‍पा पोःङ्‌लो॥

¹⁵ हे़क्‍क्‍याङ् खिनिॽ कपर्नहुम पाङ्‌जुम्‍मोबा मनासे, साङ्‌ग्राम्‍पेदाङ् थारिक् पेगिगे़ॽ के़लॽरिबि? मे़ःन्‍लो! खिनिॽग खे़मायङ्‌सङ्‌थारिक् के़ध्‍ये़ॽइरो॥

¹⁶ आत्तिल्‍ले़ खिनिॽ पाःन् खे़प्‍सुॽ, खे़ल्‍ले़ आबाःन्‍निन्‍नाङ् खे़प्‍सुॽ॥ आत्तिल्‍ले़ के़नाॽरिॽ, खे़ल्‍ले़ इङ्‌गाॽआङ् नाॽआरो॥ हे़क्‍क्‍याङ् आत्तिल्‍ले़ इङ्‌गाॽ नाॽआ, खे़ल्‍ले़ याप्‍मि के़बाङ्‌बे़न्‍नाङ् नाॽरुॽरो॥”

¹⁷ नु-ने़त् (७२) हुॽसाम्‍बाहाॽ मे़सःत्ते़र मे़द्‌ये़आङ् ये़सुःन् मे़मे़त्तु, “आदाङ्‌बे, खे़ने़ॽ के़मिङ्‌ङोग फे़न्‍साम्‍हाॽ आनिगे़ युक्‍को मे़द्‌ये़रो॥”

¹⁸ ये़सुरे़ खे़ङ्‌हाॽ नोगप् पिरुसि, “माफे़न्‍साम्‍मिन् साःम्‍भे ले़क्‍ते़बा कुइसिःक् साङ्‌ग्राम्‍पेदाङ्‌लाम् मक्‍थ्‍ये़र पत्‍छे़बा इङ्‌गाॽ निःसुङ्॥

¹⁹ निङ्‌मिःल्‍ले़ कुमुक्‍साम् सम्‍दाङ् इङ्‌गाॽ युक् पिनिङ्‌ङाङ् वाॽ, हे़क्‍क्‍याङ् असेःक्‍पाहाॽ सम्‍दाङ् खिनिॽ लाङ्‌के़घेगिॽ, ताङ्‌साङ्‌खे़बक्‍हाॽ के़दोॽरुम्‍सिम्, कर थेआङ् के़मे़म्‍मे़त्तिन्‍लो॥

²⁰ हे़क्‍केसाङ् फे़न्‍साम्‍हाॽ खिनिॽ युक्‍को मे़वाॽ फाॽआङ् मे़ःन्, कर साङ्‌ग्राम्‍पेदाङ्‌ङो खिनिॽ मिङ् साप्‍ते़आङ् पप्‍पाल्‍ले़ चोगुल्‍ले़ सःत्ते़म्‍मे़ॽओ॥”