9 मिनु गेपुकीमी “येसु प्रभु बाक्ब” देंशा इन थुंमी “परमप्रभु यावेमी मेको कली बेक्शो रे सेंताक्व” दे थमा सुइक्तीनी हना, गे ब्रोंइचा ताइनीनी। मत्ती १०:३२; २कोरिन्थी ४:५
10 मुरुमी मेको थमा सुइश्शा, ठीक दुम्नीम। मिनु सु सुमी “येसु आं प्रभु बाक्ब” दे मुर आन ङोंइती देंबा, मेको ब्रोंइचा ताइनीम, दे तुइक्नय।
11 मिनु परमप्रभु यावे आ लोव़मी “सु सुमी मेको कली थमा सुइक्नीमी, मेको मुने मदोक्नीम” दे ब्रेक्शो बाक्ब। यसैया २८:१६
12 परमप्रभु यावेम नेल्ल आन कली कोव़ब। यहूदी नु अर्को रागी ङा मुर नेल्ल आन कली कांइचीक मिम्ब। मेको आन कली प्रभु का बाक्ब। मेको कली प्रभु देंब आन कली आसीक गेशा, रिम्शो पाइब। प्रेरित १०:३४-३५; प्रेरित १५:९
13 सु सुमी प्रभु आ नें थिशा “प्रोंइयीनी” दे पुंइबा, मेको कली प्रोंइब दे ब्रेक्शो बाक्ब। योएल ३:५
14 मेको कली थमा मसुइक्बपुकीमी “प्रोंइयीनी” दे पुंइने चाप्नीमी ङा? आ पर्बम मनेंशो कली थमा सुइक्ने चाप्नीमी ङा? सुइ शेंब मबाक्त हना, मेको लोव़ नेंने चाप्नीमी ङा?
15 शेंथ सोइश्शो मनम हना, शेंथ लाइनीमी ङा? शेंथ सोइक्चा पुंइसीब आन पर्बम ओदेंशो ब्रेक्शो बाक्ब “ग्येरपाइक्ब नु रिम्शो लोव़ शेंथ गाक्ब आन खोइल गिश रिम्शो बाक्ब” दे ब्रेक्शो बाक्ब। यसैया ५२:७
16 मेको आन लोव़ नेंशा कोइमी थमा मसुदेम। मेको आन पर्बम यसैयामी “हे प्रभु, आंइ शेंशो लोव़ सुम थमा सुदा ङा?” दे ब्रेक्शो बाक्त। यसैया ५३:१; यूहन्ना १७:२०
17 ङोंइती ख्रीस्त आ लोव़ नेंशा तुइक्पाइक्चा माल्नीम। मेको लोव़ नेंशा ला थमा सुइक्ने चाप्नीम।
18 मार, येसु ख्रीस्त आ लोव़ यहूदीपुकीम मनेन्मे ङा? नेंतेक्म। “एको लोव़ तेइ तेइ रागी नेल्लेमी ब्रशो बाक्त” दे ब्रेक्शो बाक्ब। भजन संग्रह १९:४
19 मोपा यो इस्राएलीमी एको लोव़ मरुप्मे ङा? मोसामी यहूदी आन पर्बम ओदेंशो ब्रेक्शो बाक्त “अर्को रागी ङा मुरपुकीमी आं कली थमा सुइक्चा गेनुङमी। मिनु गेपुकीमी अरु आन कली आं गे पिशो तशा, रुश पा थमा सुइक्नीनी, दे परमप्रभु यावेम देंत” दे ब्रेक्शो बाक्त। ब्यवस्था ३२:२१
