20 अदङ्हाॽरे़ खुनिॽ सुजादाङ्बा हे़क्क्याङ् निङ्वाॽफुमाङ्ङिल्ले़ कुयाःम्बेओ मे़ल्ले़ःमनाबाहाॽरे़ खुनिॽ सिक्साम्बाआ लॽरिक् के़इःत्तुॽ, थेआङ्भे़ल्ले़ खे़ने़ॽ साम्योथिम्मो काक् सिक्कुम्दिङ् निङ्वाॽ नु से़क्खा पाःन्हाॽ खोःसुङ्ङाङ् वाॽआ फाॽआङ् के़इःत्तुॽरो॥
21 हे़क्केने़ फाॽग्र खे़ने़ॽ वेॽहाॽ के़हुॽरुसिआङ् थेआङ् आबाङे के़न्हुॽसिङ्ङिन्बे? खुःम्मा मे़ःन् लॽरिक् इङ्गे़भोःसुआङ् के़घुःन्बि?
22 खे़ने़ॽ वेॽहाॽ चाराम्मा याःम्बक् चोःक्मा मे़नुॽने़न् लॽरिक् के़मे़त्तुसिआङ् आबाङे याम्बोःप्मा याःम्बक् के़जोःक्पि? नावाइत्लाहाॽ आसिक्मे़ले़ःङ् के़बाःत्तुआङ् नावाइत्ला के़युङ्बा माङ्हिम्मो मे़दोःन्दुबा याङ्ङिन् के़घुःत्तुॽबि?
23 खे़ने़ॽ साम्योथिम् इङ्जाःङ्ङिन् ले़स्सुङ् लॽरिक् आङ्दिङ् के़लॽ, कर साम्योथिम्मिन् के़भेःन्दुआङ् निङ्वाॽफुमाङ्ङिल्ले़ कुजाःत्थि के़देःसुरो॥
24 साम्योसाप्लाओ खिनिॽ याःम्बेओ अक्खेलॽरिक् साप्ते़आङ् पत्, “थिम्मे़न्दङ् सुवाङ्लुम्मो खिनिॽ के़जोगुम्मिल्ले़ए निङ्वाॽफुमाङ्ङिल्ले़ कुजाःत्थि पेआङ् वाॽरो॥”
25 खे़ने़ॽ साम्योथिम् इङ्जाःङ्ङिन् के़इःत्तु के़नाःत्तुॽने़ फाॽग्र हर्दो के़हे़गुबान् नुःबाए पोःङ्लो, कर साम्योथिम् इङ्जाःङ्ङिन् के़भेःन्दुने़ फाॽग्र हर्दो मे़न्हे़क्मनाबा कुइसिःक् के़बोःङ्लो॥
