ᤖᤥᤔᤡ 16:1-14 in Limbu

¹ ᤁᤡᤱᤁᤪᤡᤕᤠ ᤐᤠᤱᤈᤢᤶᤔᤥ ᤁᤧᤘᤠ᤹ᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤔᤠᤱᤛᤣᤘᤠᤖᤥᤔᤠ ᤀᤠᤏᤡ᤹ ᤏᤢᤛᤠ᤹ ᤑᤡᤒᤡᤖᤧ ᤁᤢᤏᤠᤖᤠ ᤑᤥ᤺ᤛᤢᤱᤗᤥ॥

² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤗᤠ᤹ᤖᤢᤛᤡᤒᤠ ᤗᤠᤱᤍᤠ᤺ᤰᤔᤠᤴ ᤂᤢᤏᤧ᤹ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤐᤡᤖᤧᤶᤔᤧ᤹ ᤑᤠ᤹ᤀᤠᤱ ᤔᤧᤳᤏᤡᤱᤗᤥ॥ ᤂᤡᤏᤡ᤹ ᤛᤢᤰᤛᤢᤰ ᤂᤢᤏᤧ᤹ ᤁᤢᤓᤠ᤹ ᤐᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ᤃ ᤀᤡᤱᤃᤠ᤹ ᤏᤢ ᤕᤖᤡᤰ ᤔᤏᤠᤜᤠ᤹ ᤁᤢᤓᤠ᤹ ᤐᤡᤖᤢᤛᤡᤀᤠᤱ ᤘᤠ᤹ᤖᤥ॥

³ ᤀᤡᤱᤃᤠ᤹ᤏᤢ ᤛᤥᤖᤡᤰ ᤂᤪᤡᤛ᤻ᤋ ᤕᤧᤛᤢᤖᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤠᤴᤈᤢᤶᤜᤠ᤹ ᤐᤪᤡᤛ᤻ᤁᤡᤗᤠ ᤏᤢ ᤁᤢᤕᤧᤶᤒᤠ᤹ ᤀᤁᤫᤡᤗᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

⁴ ᤂᤧᤱᤜᤠ᤹ᤖᤧ ᤀᤡᤱᤃᤠ᤹ ᤀᤠᤛᤧ᤺ᤵᤛᤧ ᤂᤢᤴᤇᤡ᤹ ᤜᤡᤱᤔᤴᤏᤡᤴᤏᤣ ᤁᤧᤛᤠᤰᤐᤠᤀᤥ ᤌᤠᤛᤧᤳᤇᤢᤖᤥ॥ ᤀᤡᤱᤃᤠ᤹ᤖᤰ ᤔᤧ᤺ᤴ. ᤁᤖ ᤕᤖᤡᤰ ᤌᤡᤶᤔᤧᤴᤍᤱ ᤛᤢᤘᤠᤱᤛ᤻ᤔᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤖᤧᤀᤠᤱ ᤂᤧᤱᤜᤠ᤹ ᤏᤥᤃᤧᤴ ᤔᤧᤒᤡᤖᤢᤛᤡ᤹॥

⁵ ᤂᤢᤴᤇᤡ᤹ ᤜᤡᤶᤔᤥ ᤁᤧᤈᤢᤶᤒᤠ ᤛᤣᤛᤣᤜᤢᤵᤗᤰᤁᤥᤒᤠ ᤏᤛᤠᤏᤡᤒᤠᤜᤠ᤹ᤀᤠᤱ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤀᤠᤔᤡ᤺ᤶ ᤀᤠᤴᤈᤢᤶ ᤀᤧᤐᤣᤏᤧᤋᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥ ᤂᤢᤏᤧ᤹ᤃ ᤀᤣᤛᤡᤕᤠ ᤋᤧᤱᤃᤵᤐᤥ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤔᤏᤠ ᤘᤕᤧᤖᤥ॥

⁶ ᤂᤡᤏᤡ᤹ ᤗᤠᤃᤡ ᤕᤠᤶᤒᤢᤎᤡᤰᤁᤠᤱ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤖᤡᤕᤶᤔᤡᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥

⁷ ᤀᤡᤱᤃᤠ᤹ᤏᤢ ᤛᤠᤰᤐᤠ ᤁᤧᤎᤠ᤺ᤒᤠ ᤕᤜᤢᤍᤡ ᤀᤠᤴᤈᤢᤶ ᤀᤧᤴᤍᤪᤥᤏᤡᤁᤛ ᤏᤢ ᤕᤢᤏᤡᤕᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤢᤴᤇᤡ᤹ᤃ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤋᤃᤡ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤠᤃᤧᤳᤇᤢᤀᤠᤱ ᤘᤕᤧᤳᤇᤡᤖᤥ॥

⁸ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤀᤠᤔᤡ᤺ᤶ ᤀᤠᤴᤈᤢᤶ ᤀᤧᤶᤐᤗᤡᤀᤧᤋᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥

⁹ ᤀᤠᤏᤡᤃᤧᤏᤢ ᤛᤥᤖᤡᤰ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤢᤷᤒᤠᤏᤛ ᤏᤢ ᤀᤠᤔᤡ᤺ᤶ ᤀᤠᤴᤈᤢᤶ ᤀᤡᤛ᤻ᤋᤠᤂᤢᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹⁰ ᤂᤪᤡᤛ᤻ᤋᤀᤥ ᤆᤥᤃᤢᤒᤠ ᤁᤢᤏᤛᤠ᤺ᤴᤏᤡᤴ ᤔᤧᤛᤠ᤹ᤖᤢᤸᤗᤧ ᤏᤢ᤺ᤒᤠ ᤁᤧᤎᤠ᤺ᤵᤐᤠ ᤀᤵᤐᤧᤸᤗᤧᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥ ᤀᤖᤡᤛ᤻ᤋᤥᤒᤢᤗᤛ ᤏᤢ ᤁᤢᤜᤡᤶᤔᤥ ᤁᤧᤘᤠ᤹ᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹¹ ᤀᤡᤱᤃᤠ᤹ ᤕᤜᤢᤍᤡ ᤀᤠᤴᤈᤢᤶ ᤜᤧᤖᤥᤍᤡᤕᤏᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥ ᤏᤠᤷᤁᤡᤁᤛᤖᤧ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹² ᤋᤪᤡᤑᤣᤏᤠ ᤏᤢ ᤋᤪᤡᤑᤥᤛᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤁᤴ ᤔᤧᤴᤇᤢᤔᤠᤜᤠ᤹ᤖᤧᤃ ᤕᤠᤶᤒᤢᤎᤡᤰᤁᤠᤱ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤧᤳᤇᤢᤖᤥ॥ ᤛᤠ᤹ᤖᤡᤰ ᤕᤠᤶᤒᤢᤎᤡᤰᤁᤠᤱ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤠᤔᤡ᤺ᤶ ᤀᤠᤴᤈᤢᤶ ᤐᤷᤛᤡᤛ᤻ᤛᤧᤴᤏᤠᤱ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥

¹³ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤛᤧ ᤛᤣᤃᤢᤒᤠ ᤖᤢᤑᤛ ᤏᤢ ᤁᤢᤶᤔᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤁᤢᤶᤔᤠᤖᤧᤃ ᤀᤡᤱᤃᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤁᤢᤀᤡᤛᤡ᤺ᤰ ᤀᤡ᤺ᤳᤋᤠᤱᤅᤠᤱ ᤘᤕᤧᤖᤥ॥

¹⁴ ᤀᤠᤛᤡᤴᤁᤪᤡᤋᤛ. ᤑ᤻ᤗᤧᤃᤏ. ᤜᤷᤔᤠᤛ. ᤐᤠᤋᤪᤥᤒᤠᤛ. ᤜᤷᤔᤣᤛ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤛᤠᤏᤡᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹ किङ्‌क्रिया पाङ्‌जुम्‍मो के़वाॽबा सेसेहुप्‍लक्‍कोबा माङ्‌सेवारोमा आनिॽ नुसाॽ फिबिरे़ कुनारा फोःसुङ्‌लो॥

² निङ्‌वाॽफुमाङ्‌ङिल्‍ले़ सेसे कुमनाहाॽ लाॽरुसिबा लाङ्‌दाःक्‍मान् खुने़ॽ दाङ्‌बाल्‍ले़ कुमिङ्‌ङो पिरे़म्‍मे़ॽ फाॽआङ् मे़त्‍निङ्‌लो॥ खिनिॽ सुक्‍सुक् खुने़ॽ कुभाॽ पिरे़म्‍मे़ॽ, थेआङ्‌भे़ल्‍ले़ खुने़ॽग इङ्‌गाॽ नु यरिक् मनाहाॽ कुभाॽ पिरुसिआङ् वाॽरो॥

³ इङ्‌गाॽनु सोरिक् ख्रिस्‍त ये़सुरे़ कुयाःम्‍बक् के़जोःक्‍पा आन्‍जुम्‍हाॽ प्रिस्‍किला नु कुये़म्‍बाॽ अक्‍विलाःन् आसेवारो मे़त्ते़म्‍सिम्‍मे़ॽओ॥

⁴ खे़ङ्‌हाॽरे़ इङ्‌गाॽ आसे़ःप्‍से़ खुन्‍छिॽ हिङ्‌मन्‍निन्‍ने के़साक्‍पाओ थासे़त्‍छुरो॥ इङ्‌गाॽरक् मे़ःन्, कर यरिक् थिम्‍मे़न्‍दङ् सुवाङ्‌स्‍मा सेसेहुप्‍लक्‍कोबा नसानिबाहाॽरे़आङ् खे़ङ्‌हाॽ नोगे़न् मे़बिरुसिॽ॥

⁵ खुन्‍छिॽ हिम्‍मो के़जुम्‍बा सेसेहुप्‍लक्‍कोबा नसानिबाहाॽआङ् आसेवारो मे़त्ते़म्‍सिम्‍मे़ॽओ॥ हे़क्‍क्‍याङ् आमिःम् आन्‍जुम् ए़पेने़तसे़न् आसेवारो मे़त्ते़म्‍मे़ॽओ॥ खुने़ॽग एसिया ते़ङ्‌गप्‍पो के़रे़क्‍नुःल्‍ले़ तगि ख्रिस्‍ते़न्‌नसाःन् के़जोःक्‍पा मना वये़रो॥

⁶ खिनिॽ लागि याम्‍बुधिक्‍काङ् याःम्‍बक् के़जोःक्‍मा मरियम्‍मिन् आसेवारो मे़त्ते़म्‍मे़ॽओ॥

⁷ इङ्‌गाॽनु साक्‍पा के़धाःबा यहुदि आन्‍जुम् ए़न्‍द्रोनिकस नु युनियसे़न् आसेवारो मे़त्ते़म्‍सिम्‍मे़ॽओ॥ खे़ङ्‌हाॽग सेःक्‌युक्‍मिबाहाॽओ साॽरिक् मिङ्‌सो इङ्‌धाःङ् पिमा लाॽरुसिॽ, हे़क्‍क्‍याङ् खुन्‍छिॽग इङ्‌गाॽनुःल्‍ले़आङ् तगि ख्रिस्‍ते़न्‌नसाःन् चागे़त्‍छुआङ् वये़त्‍छिरो॥

⁸ दाङ्‌बान् नसाःन् के़जोःक्‍पा आमिःम् आन्‍जुम् ए़म्‍पलिए़तसे़न् आसेवारो मे़त्ते़म्‍मे़ॽ॥

⁹ आनिगे़नु सोरिक् ख्रिस्‍तरे़ कुयाःम्‍बक् के़जोःक्‍पा उर्बानस नु आमिःम् आन्‍जुम् इस्‍ताखुसे़न् आसेवारो मे़त्ते़म्‍सिम्‍मे़ॽओ॥

¹⁰ ख्रिस्‍तओ चोगुबा कुनसाःन्‍निन् मे़साॽरुल्‍ले़ नुःबा के़धाःप्‍पा अप्‍पे़ल्‍ले़से़न् आसेवारो मे़त्ते़म्‍मे़ॽ॥ अरिस्‍तोबुलस नु कुहिम्‍मो के़वाॽबाहाॽ आसेवारो मे़त्ते़म्‍सिम्‍मे़ॽओ॥

¹¹ इङ्‌गाॽ यहुदि आन्‍जुम् हे़रोदियने़न्‌आसेवारो मे़त्ते़म्‍मे़ॽओ॥ नार्किकसरे़ कुहिम्‍मो के़वाॽबा दाङ्‌बान् नसाःन् के़जोःक्‍पाहाॽ आसेवारो मे़त्ते़म्‍सिम्‍मे़ॽओ॥

¹² त्रिफेना नु त्रिफोसाःन् आसेवारो मे़त्ते़म्‍सिम्‍मे़ॽओ॥ कन् मे़न्‍छुमाहाॽरे़ग याम्‍बुधिक्‍काङ् दाङ्‌बाल्‍ले़ कुयाःम्‍बक् चोगे़त्‍छुरो॥ साॽरिक् याम्‍बुधिक्‍काङ् दाङ्‌बाल्‍ले़ कुयाःम्‍बक् के़जोःक्‍मा आमिःम् आन्‍जुम् पर्सिस्‍से़न्‍नाङ् आसेवारो मे़त्ते़म्‍मे़ॽ॥

¹³ दाङ्‌बाल्‍ले़ कुयाःम्‍बक् चोःक्‍से़ सेगुबा रुफस नु कुम्‍माःन् आसेवारो मे़त्ते़म्‍सिम्‍मे़ॽओ॥ कुम्‍मारे़ग इङ्‌गाॽ आबाङे कुस्‍साः कुइसिःक् इःत्ताङ्‌ङाङ् वये़रो॥

¹⁴ आसिन्‍क्रितस, फ्‍ले़गन, हर्मास, पात्रोबास, हर्मेस हे़क्‍क्‍याङ् खे़ङ्‌हाॽनु के़वाॽबा काक् नसानिबाहाॽ आसेवारो मे़त्ते़म्‍सिम्‍मे़ॽओ॥