49 इन किकी पिपीमी गोरशो रागीमी मन्ना शोब्ले जचा ताम्तेक्म हना यो, बेक्तेक्म। १कोरिन्थी १०:३-५
50 तन्न मुरपुकीमी स्वर्ग रे यिशो शोब्ले कली जाम्तेक्म हना, मबेक्थु ब्रोंइशा बाक्नीम।
51 गो स्वर्ग रे यिशो ब्रोंइतीक शोब्ले नङ। सुमी मेको शोब्ले जाइबा, मेको गेना हना यो परमप्रभु यावे नु बाक्शा ब्रोंइब। मिनु रागी ङा मुर आन कली ब्रोंइपाइक्चा, दे मार शोब्ले गेनुङ देंशा हना, आं गेशो शोब्ले आं रां बाक्ब” दे शेंताक्व। मर्कूस १४:२२
52 मिनु यहूदीपुकीमी “एको मुरुमी आंइ कली दोपा आ रां ब्वचा गेने चाप्बा?” दे लोव़ पा जिम्तेक्म।
