8 मिनु अरु शेंसीबपुकीमी डोंगामी बाक्शा, ग्याइल कीना कीन पिम्तेक्म। ग्याइल ब्रीशो बाक्त। मेकोपुकी समुन्द्रमी सहे निक्शी गज खोदेंशो ङोन जाक्दीश्शो बाक्तेक्म।
9 मिनु मेकोपुकीमी डोंगा रे ग्रूशा, ङांइ नु शोब्ले मीमी चोशा, वोइश्शो ताम्तेक्म।
10 मिनु येसुमी “इन रेश्शो ङांइ का निक्शी पितीन” दे माइक्तीमी।
11 येसु आ देंशो टिशा, सिमोन पत्रुस डोंगामी ङोइश्शा, ग्याइल कली कीशा, ब्वाक्कु रे ग्रुंइताक्व। मेको ग्याइलीमी सहे का ५३ ओटा ठेयब ठेयब ङांइ बाक्तेक्म। मिश ङा ङांइ बाक्शा यो मेको ग्याइली मगाक्माक्त।
12 मिनु येसुमी “निस्सीन जने ब्वने” दे माइक्तीमी। मिनु शेंसीबपुकीमी “गे सु ननी?” दे हिल्लो मपाम। “प्रभु बाक्ब” दे तुइक्ताक्म।
13 मिनु येसुमी शोब्ले लाइश्शा, आ शेंसीब आन कली शोब्ले नु ङांइ योक्शा गेम्तीमी। यूहन्ना ६:११
14 मो दुम्मेनु, येसु सेंसीशो नोले आ शेंसीब आन कली खेयप सां तपांइसाक्व।
