ᤕᤢᤜᤢᤴᤏᤠ 20:7-16 in Limbu

⁷ ᤕᤧᤛᤢᤖᤧ ᤁᤢᤏᤠᤖᤠ ᤔᤧᤍᤧᤵᤋᤢᤒᤠ ᤋᤣ᤺ᤳᤋᤡᤴ ᤂᤧᤵᤔᤥ ᤏᤧᤛ᤻ᤛᤧᤒᤠ ᤏᤡ᤺ᤛᤢ॥ ᤂᤧᤴ ᤏᤠᤍᤧᤵᤔᤠ ᤋᤣ᤺ᤳᤋᤡᤴ ᤆᤣᤍᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤔᤧᤓᤠᤰᤋᤢᤀᤠᤱ ᤏᤧᤛ᤻ᤛᤧᤒᤠ ᤏᤡ᤺ᤛᤢᤖᤥ॥

⁸ ᤜᤧᤰᤁᤩᤠᤱ ᤋᤃᤡ ᤀᤡᤵᤐᤢᤱᤅᤥ ᤁᤧᤃᤧᤵᤐᤠ ᤜᤢ᤹ᤛᤠᤶᤒᤧᤴᤏᤠᤱ ᤛᤡᤃᤠᤱ ᤗᤠ᤺ᤛᤧ॥ ᤂᤧᤸᤗᤧ ᤂᤧᤴ ᤏᤡ᤺ᤛᤢᤀᤠᤱ ᤏᤛᤠ᤺ᤴ ᤆᤥᤃᤢᤖᤥ॥

⁹ (ᤂᤧᤱᤜᤠ᤹ᤖᤧ ᤀᤠᤸᤗᤛᤠᤱ ᤕᤧᤛᤢ᤺ᤴ ᤛᤡ᤺ᤔᤧᤴᤗᤠᤶ ᤜᤡᤱ ᤗ᤹ᤖᤡᤰ ᤛᤠᤶᤕᤥᤛᤠᤵᤗᤠᤀᤥ ᤁᤧᤒᤵᤐᤧᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤔᤧᤘᤕᤧᤖᤥ॥)

¹⁰ ᤜᤧᤰᤁᤩᤠᤱ ᤂᤧᤴ ᤜᤢ᤹ᤛᤠᤶᤒᤠᤜᤠ᤹ ᤏᤧᤵᤔᤠᤱ ᤜᤡᤶᤔᤥ ᤏᤢ᤺ᤰᤂᤧᤳᤇᤡᤖᤥ॥

¹¹ ᤁᤖ ᤔᤖᤡᤕᤶᤔᤡᤴ ᤀᤡ᤺ᤵᤐᤢᤱ ᤗᤠ᤺ᤰᤁᤠᤳ ᤜᤠᤒᤧᤖ ᤕᤧᤒᤧᤖᤥ॥ ᤂᤧᤴ ᤜᤠᤒᤧᤖ ᤀ᤺ᤰᤂᤢᤶ ᤑᤴᤇᤡᤱᤅᤠᤱ ᤀᤡ᤺ᤵᤐᤢᤱ ᤛᤡᤃᤠᤱ ᤀᤥᤔᤧᤳᤋᤢᤸᤗᤧ.

¹² ᤑ᤺ᤃᤧᤗ᤹ᤒᤠ ᤋᤣ᤺ᤳ ᤁᤧᤈᤠᤱᤒᤠ ᤏᤧᤵᤑᤢ ᤔᤠᤱᤗᤠᤀᤡᤱᤒᤠᤜᤠ᤹ ᤕᤧᤛᤢᤖᤧ ᤁᤢᤎᤰ ᤔᤧᤏᤧᤛ᤻ᤛᤢᤀᤠᤱ ᤏᤧᤛ᤻ᤛᤧᤒᤠ ᤋᤧᤴᤏᤥ ᤌᤡᤰᤁᤡᤴ ᤁᤢᤎᤧᤃᤣ᤺ᤰ ᤗᤧᤵᤔᤠᤱ ᤏᤢ ᤘᤧᤛ᤻ᤔᤠᤴ ᤁᤢᤗᤠᤱ ᤗᤧᤵᤔᤠᤱ ᤕᤢᤅᤧᤳᤇᤡᤒᤠ ᤏᤡ᤺ᤛᤢᤛᤡᤖᤥ॥

¹³ ᤂᤧᤴ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤧ᤹ ᤛᤣ᤺ᤴᤍᤥ᤺ᤛᤧᤳᤇᤢ. “ᤂᤧᤏᤧ᤹ ᤌᤣᤀᤠᤱ ᤁᤧᤜᤠ᤺ᤵᤐᤠᤒᤣ᥅” ᤂᤧᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤀᤠᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤁᤵᤔᤥᤗᤠᤶ ᤂᤧᤱᤜᤠ᤹ᤖᤧ ᤔᤧᤍᤣ᤹ᤖᤢᤖᤥ ᤜᤧᤰᤁᤩᤠᤱ ᤀᤠᤳᤋᤠᤴ ᤔᤧᤏᤧᤛ᤻ᤛᤢᤀᤠᤱ ᤏᤧᤀᤡ ᤀᤡᤱᤃᤠ᤹ ᤔᤧᤏᤡᤀᤠᤴᤗᤥ॥”

¹⁴ ᤜᤧᤰᤁᤣ ᤐᤠ᤺ᤳᤋᤢᤖ ᤔᤖᤡᤕᤶᤔᤡᤴ ᤂᤡᤖᤡ ᤜᤡᤛᤡᤱᤅᤡᤸᤗᤧ ᤕᤧᤛᤢ᤺ᤴ ᤂᤧᤵᤔᤥ ᤕᤧᤒᤧᤒᤠ ᤏᤡ᤺ᤛᤢ. ᤁᤖ ᤂᤢᤏᤧ᤹ ᤕᤧᤛᤢ᤺ᤴᤏᤣᤖᤥ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤵᤔᤠ ᤔᤧᤛᤢᤰᤋᤢᤴᤗᤥ॥

¹⁵ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤔᤠᤔᤢᤀᤣ. ᤂᤧᤏᤧ᤹ ᤌᤣᤀᤠᤱ ᤁᤧᤜᤠ᤺ᤵᤐᤠᤒᤣ᥅ ᤜᤠ᤺ᤳ ᤁᤧᤃᤥ᤺ᤳᤋᤢᤒᤠᤒᤣ᥅” ᤔᤖᤡᤕᤔᤖᤧ ᤂᤢᤏᤧ᤹ᤃ ᤑᤢᤱᤀᤡᤰ ᤁᤧᤃᤥ᤺ᤒᤠᤒᤡᤗᤠ ᤗ᤹ᤖᤡᤰ ᤏᤡᤱᤘᤠ᤹ ᤀᤡ᤺ᤳᤋᤢᤀᤠᤱ ᤔᤧᤳᤋᤢ. “ᤀᤠᤍᤠᤱᤒᤣ. ᤍᤠᤱᤒᤠᤸᤗᤧ ᤁᤢᤎᤰᤁᤡᤴ ᤁᤵᤔᤥᤗᤠᤶ ᤁᤧᤍᤣ᤹ᤖᤢᤀᤠᤱ ᤘᤠ᤹ᤏᤧ ᤑᤠ᤹ᤃᤪ ᤀᤠᤳᤋᤠᤴ ᤁᤧᤏᤧᤛ᤻ᤛᤢᤀᤠᤱ ᤏᤧ᤹᤺ ᤀᤡᤱᤃᤠ᤹ ᤔᤧᤳᤋᤠᤱᤅᤧ᤹ᤏᤠ. ᤜᤧᤰᤁᤩᤠᤱ ᤁᤢᤎᤰᤁᤡᤴ ᤀᤡᤱᤃᤠ᤹ ᤋᤣ᤹ᤖᤢᤱᤗᤥ॥”

¹⁶ ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤔᤖᤡᤕᤶᤔᤣ᥄” ᤂᤢᤏᤧ᤹ ᤕᤧᤛᤢ᤺ᤴ ᤗᤧᤵᤔᤠᤱ ᤜᤡᤛᤡᤱᤅᤠᤱ “ᤖᤒ᤻ᤒᤥᤏᤡ᥄” ᤔᤧᤳᤋᤢᤖᤥ॥ (ᤂᤧᤴ ᤑᤠ᤹ᤀᤡᤱᤃ ᤜᤡᤒᤪᤢ ᤐᤠ᤺ᤴᤏᤥ “ᤛᤡᤰᤛᤠᤶᤒᤣ” ᤐᤥ᤺ᤱᤗᤥ॥)

⁷ ये़सुरे़ कुनारा मे़दे़प्‍तुबा तेःत्तिन् खे़प्‍मो ने़स्‍से़बा निःसु॥ खे़न् नादे़प्‍मा तेःत्तिन् चेदेःत्तिल्‍ले़ कुबेसाङ् मे़भाक्‍तुआङ्‌ने़स्‍से़बा निःसुरो॥

⁸ हे़क्‍क्‍याङ् तगि इप्‍पुङ्‌ङो के़गे़प्‍पा हुॽसाम्‍बे़न्‍नाङ् सिगाङ् लाःसे़॥ खे़ल्‍ले़ खे़न् निःसुआङ् नसाःन् चोगुरो॥

⁹ (खे़ङ्‌हाॽरे़ आल्‍लसाङ् ये़सुःन् सिःमे़न्‍लाम् हिङ्‌लॽरिक् साम्‌योसाप्‍लाओ के़बप्‍पे़न्‌कुसिङ् मे़न्‍निःत्ते मे़वये़रो॥)

¹⁰ हे़क्‍क्‍याङ् खे़न् हुॽसाम्‍बाहाॽ ने़प्‍माङ् हिम्‍मो नुःक्‍खे़त्‍छिरो॥

¹¹ कर मरियम्‍मिन् इःप्‍पुङ् लाःक्‍कात् हाबे़र ये़बे़रो॥ खे़न् हाबे़र अःक्‍खुम् फन्‍छिङ्‌ङाङ् इःप्‍पुङ् सिगाङ् ओमे़त्तुल्‍ले़,

¹² फःगे़लॽबा तेःत् के़जाङ्‌बा ने़प्‍फु माङ्‌लाइङ्‌बाहाॽ ये़सुरे़ कुधक् मे़ने़स्‍सुआङ् ने़स्‍से़बा ते़न्‍नो थिक्‍किन् कुधे़गेःक् ले़प्‍माङ् नु वे़स्‍मान्‌कुलाङ् ले़प्‍माङ् युङे़त्‍छिबा निःसुसिरो॥

¹³ खे़न् माङ्‌लाइङ्‌बाहाॽरे़ खुने़ॽ सेःन्‍दोःसे़त्‍छु, “खे़ने़ॽ थेआङ् के़हाःप्‍पाबे?” खे़ल्‍ले़ खे़ङ्‌हाॽ मे़त्तुसि, “इङ्‌गाॽ आदाङ्‌बाल्‍ले़ कुधक्‍किन् कप्‍मोलाम् खे़ङ्‌हाॽरे़ मे़देॽरुरो हे़क्‍क्‍याङ् आत्तान् मे़ने़स्‍सुआङ् ने़इ इङ्‌गाॽ मे़निआन्‍लो॥”

¹⁴ हे़क्‍के पाःत्तुर मरियम्‍मिन् खिरि हिसिङ्‌ङिल्‍ले़ ये़सुःन् खे़प्‍मो ये़बे़बा निःसु, कर खुने़ॽ ये़सुःन्‍नेरो फाॽआङ् कुसिङ् निःप्‍मा मे़सुक्‍तुन्‍लो॥

¹⁵ ये़सुरे़ खे़न् मे़त्तु, “मामुए, खे़ने़ॽ थेआङ् के़हाःप्‍पाबे? हाःत् के़गोःत्तुबाबे?” मरियमरे़ खुने़ॽग फुङ्‌इक् के़गोःबाबिला लॽरिक् निङ्‌वाॽ इःत्तुआङ् मे़त्तु, “आदाङ्‌बे, दाङ्‌बाल्‍ले़ कुधक्‍किन् कप्‍मोलाम् के़देॽरुआङ् वाॽने़ फाॽग्र आत्तान् के़ने़स्‍सुआङ् ने़ःॽ इङ्‌गाॽ मे़त्ताङ्‌ङे़ॽना, हे़क्‍क्‍याङ् कुधक्‍किन् इङ्‌गाॽ तेॽरुङ्‌लो॥”

¹⁶ ये़सुरे़ खे़न् मे़त्तु, “मरियम्‍मे!” खुने़ॽ ये़सुःन्‌ले़प्‍माङ् हिसिङ्‌ङाङ् “रब्‍बोनि!” मे़त्तुरो॥ (खे़न् फाॽइङ्‌ग हिब्रु पाःन्‍नो “सिक्‍साम्‍बे” पोःङ्‌लो॥)