1 मिनु यहोसु शुश खाल्पा दुम्त। मिनु परमप्रभु यावेमी मेको कली “गे मुल शुश खाल्पा दुम्ते। रागी शुश इन के सेल्चा माल्शो लीशो बाक्नीम।
2 मिनु तेको तेको रागी लीशो बाक्तेक्म देंशा हना, पलिस्ती नु गेशुरी आन रागी नेल्ल, १सामुएल २७:८
3 इजीप्त रागी ङा पूर्ब ङा शीहोर खोला रे लाइश्शा इजीप्त आ उत्तर ङा एक्रोन सम्म लीशो बाक्तेक्म। मेको नेल्ल कनानी आन रागी बाक्ब। मिनु पलिस्ती आन ५ जना सासन पाइब आन सहर गाजा, अश्दोद, अश्कलोन, गाथ नु एक्रोन लीशो बाक्नीम। मिनु दक्खिन ङा आव्वीम ङा मुर आन रागी यो लीशो बाक्त।
4 मिनु दक्खिन गे कनानी आन रागी नेल्ल नु सीदोनी आन मेआरा रागी रे लाइश्शा, अफेक सहर एमोरी आन सांद सम्म लीशो बाक्नीम।
5 गेबाली आन रागी, लेबानोन नेल्ल नु पूर्ब गे ङा हेरमोन डांडा दी ङा बाल-गाद रे लाइश्शा, लेबो-हमाथ सम्म लीशो बाक्नीम।
6 मिनु लेबानोन रे मिस्रेपोत-माइम सम्म पहाड ङा मुर नेल्ल नु सीदोनी आन रागी लीशो बाक्नीम। गो मेको मुर नेल्ल आन कली इस्राएली आन ङोंइती रे ग्रुंइनुङमी। गोम इ कली अरेशो खोदेंशो पा मेको रागी इस्राएली आन कली योक्शा गेवो। मेको रागी आंम के सेल्चा कली योक्शा गेमी।
7 मिनु एको रागी ९ थर नु मनस्से आ उइक्थ थर कली योक्शा गेवो” दे परमप्रभु यावेमी यहोसु कली देंत।
8 मिनु ङोंइती परमप्रभु यावे आ गेय पाइब मोसामी मनस्से आ उइक्थ थर, रूबेन आ थर नु गाद आ थर आन कली यर्दन आइक्ची हांबु पूर्बमी आन रागी गेने थुम्शो बाक्त। यहोसु १३:१५-३२
9 तेको रागी गेशो बाक्त देंशा हना, अरनोन खोला आ नेक्था बाक्शो आरोएर सहर नु दिंम आ दातेमी बाक्शो मेदेबा सहर ङा दिंम दीबोन सहर सम्म ङा रागी नेल्ल गेशो बाक्त।
10 मिनु हेश्बोन सहरम हुकुम पाइब एमोरी आन पिप सीहोन आ सहर नेल्ल अम्मोनी आन सांद सम्म गेशो बाक्त।
11 गिलाद रागी नु गेशुरी नु माकाथी आन रागी नु हेरमोन नेल्ल नु बाशान नेल्ल रे लाइश्शा साल्का सम्म गेशो बाक्त। ब्यवस्था ३:१४; २सामुएल ३:३; २सामुएल १५:८
12 मिनु अश्तारोथ नु एद्रेइमी सासन पाइब बाशान सहरम बाक्ब ओग माइश्शो पिप आ रागी नेल्ल गेशो बाक्त। मेको पिप ओग ला रेफाइम आन दातेमी ब्रोंइशा लीशो बाक्माक्त। मोसामी मेको आन कली ग्राशा, खेरशो बाक्त।
13 तन्न इस्राएलीपुकीमी गेशुरी नु माकाथ आ मुर आन कली मखेरेम। मोपतीके मुल सम्म मेको गेशुरी नु माकाथी इस्राएली आन दातेमी बाक्शो बाक्नीम।
14 मोसामी लेवी आ थर कली ला रागी मगेवो। मारदे हना परमप्रभु यावे आ देंशो खोदेंशो पा परमप्रभु यावे, इस्राएली आन परमप्रभु कली चोशा चढ़ेशो मेको आन भाग बाक्ब। यहोसु १३:३३; उत्पत्ती ४९:५; गन्ती १८:२०-२१
15 मिनु मोसामी रूबेन आ थर ङा खिं खिं ङा मुर गिश बाक्नीमी, दे कोव़शा, रागी गेशो बाक्त।
16 मेको आन रागी अरनोन खोला आ नेक्था बाक्शो आरोएर सहर नु मेको दिंम आ दातेम बाक्शो सहर नु मेदेबा दिंम आ नेक्था ङा रागी नेल्ल,
17 हेश्बोन नु दिंम ङा सहर नेल्ल, दीबोन, बामोथ-बाल नु बेथ-बाल-मेओन,
18 याहास, केदेमोथ नु मेफा-आथ,
19 किरयथ-थाइम, सिब्मा नु बेंसी ङा डांडामी बाक्शो सेरेथ-शाहार,
20 बेथ-पेओर, पिस्गा ङा देम्सीलो, बेथ-येशीमोथ,
21 दिंम ङा सहर नेल्ल नु एमोरी आन पिप सीहोन आ रागी नेल्ल गेशो बाक्त। सीहोन हेश्बोनमी सासन पाइब बाक्त। मिनु मोसामी मेको कली नु मिदयान ङा सासन पाइब आन कली ग्राशा साइश्शो बाक्त। मेको सासन पाइब सु सु बाक्तेक्म देंशा हना, मिदयानमी बाक्शो एवी, रेकेम, सुर, हुर नु रेबा, सीहोनमी वोइश्शो सासन पाइब बाक्तेक्म।
22 मिनु इस्राएलीपुकीमी मेकोपुकी नु बेओर आ तौ बालाम, लिंक्यु कोव़ब कली यो तरवारमी साइक्तेक्म। गन्ती २२:५; गन्ती ३१:८
23 मिनु रूबेन आ थर ङा मुर आन सांद यर्दन नु आ सुर सम्म बाक्त। मेको रूबेन आ थर आन खिं खिं ङा मुर आन कली गेशो सहर नु गाउंपुकी एकोन बाक्तेक्म।
24 मिनु मोसामी गाद आ थर ङा खिं खिं ङा मुर आन कली कोव़शा, रागी गेशो बाक्त। उत्पत्ती ४९:१९
25 मेको आन कली याजेर नु गिलाद ङा सहर नेल्ल नु अम्मोनी आन आधा रागी, रब्बाह आ पूर्ब ङा आरोएर सम्म गेशो बाक्त।
26 मिनु हेश्बोन रे रामाथ-मिस्पे नु बेतोनीम सम्म नु महा-नाइम रे देबीर सहर सम्म गेशो बाक्त।
27 मिनु हेश्बोन ङा पिप सीहोन आ लीशो राज्य नेल्ल, दिंम बेथ-हाराम, बेथ-निम्रा, सुक्कोथ, साफोन, यर्दन नु आ सुर मेको आ सांद बाक्त। मेको आन कली यर्दन ङा पूर्ब गे किन्नेरेथ समुन्द्र आ दक्खिन उइ सम्म गेशो बाक्त।
28 मेको गाद आ थर आन खिं खिं ङा मुर आन कली कोव़शा गेशो रागी ङा सहर नु गाउंपुकी एकोन बाक्नीम।
29 मिनु मोसामी मनस्से आ उइक्थ थर कली रागी गेशो बाक्त। मेको आ खिं खिं ङा मुर आन कली गिश बाक्नीम, दे कोव़शा, रागी योक्शा गेशो बाक्त।
30 मेको आन रागी महा-नाइम रे लाइश्शा, बाशान नेल्ल गेशो बाक्त। बाशान ङा पिप ओग आ राज्य नेल्ल नु बाशान ङा याइर आ सहर नेल्ल पा ६० ओटा सहर गेशो बाक्त। यहोसु १७:१; न्यायाधीस १०:३-४
