16 मोपतीके परमप्रभु, मुर नेल्ल आन परमप्रभु यावेमी अस्सुर ङा दोम्शो लडाइ पाइब मुर आन कली बेक्तीक रोइ सोइक्नुङ। मिनु मेको आन रां चोशो खोदेंशो पा जेश्शा नुप्ब।
17 मिनु इस्राएली आन छेङछेङ मी दुम्ब। मिनु आन का ला बाक्शो परमप्रभु नाप्पाइक्ब दुम्ब। मिनु मेकोमी आन चू नु चोंक काबुमी नेक्पाइक्ब। ब्यवस्था ४:२४
18 मिनु ब्वाकी ङा दारस नु फल फुल नेल्ले मुर खोदेंशो पा सोव़ना सोव़न लाइनीम। मेको आन रां नु थुं निम्फा खतम दुम्नीम। रोइ पाइब मुर ओंखां पा बेक्शा लशो खोदेंशो पा बेक्शा लाइनीम।
19 मिनु मेको आ ब्वाकी ङा लीशो रवा शुश मबाक्नीम। मेको आल कामी यो हिक्शा ब्रेक्ने चाप्ब।
20 मिनु मेको नाक्ती इस्राएल ङा लीशो मुरपुकी नु याकूब आ खिं ङा प्रोक्शा ब्रोंइशो मुरपुकी लेंशा, आंम कली तुप्ब गे मलाइनीम। तन्न मेकोपुकी थमा पा परमप्रभु यावे, इस्राएली आन का ला बाक्शो परमप्रभु आ नोले खोइक्नीम। यसैया ६:१३; यसैया ७:३
