21 ङोंइती आ थुं लुक्च लशा, कशो दुम्शो बाक्त।
22 गो ममिम्ब नु मारेइ मतुइक्ब बाक्ती। इन ङोंइती जन्तु खोदेंशो बाक्ती।
23 मो हना यो गो गेना हना यो गे नु काथा बाक्नुङ। गे आं ग्युरा गुइ ग्याइश्शो बाक्नीनी। रोमी ८:३५-३९
24 गे आं कली इन लोव़मी लां कोंइनीनी। मिनु नोले गे आं कली छेङछेङम ताक्नीनी। भजन संग्रह ४९:१६
25 स्वर्गम इन ङा लाक्शा, अरु आं के सु बाक्नीमी ङा? रागीमी यो आं माल्शो इन ङा लाक्शा अरु सुइ मबाक्नीम।
26 आं रां नु आं थुं निम्फा ग्येत्थ लुक्च दुम्शो बाक्नीस। तन्न परमप्रभु गेना हना यो आं सक्ति नु आं भाग बाक्ब। भजन संग्रह १६:५
27 इन क्येङा ङोन बाक्बपुकी थमा पा जाम्शा लाइनीम। गे इन क्येङा नोले शोंइसीशो नेल्ल आन कली खतम पोक्नीनी।
28 तन्न गो चहिं परमप्रभु आ नेक्था बाक्चा दाक्नुङ। परमप्रभु यावे आं प्रोक्शा लशा बाक्तीक बाक्ब। गो इन पशो गेय नेल्ल आन पर्बम लोव़ पाइनुङ।
