2 ठेयब तेक्तीक नु या शेशा, आं कली वारच पथ बोक्कीन।
3 इन तूतीक नु तरवार शेशा, आं कली खेदा पाइब आन लां तेक्कीन। मिनु आं थुं कली “गो इ कली प्रोंइब नङ” देनीन।
4 आं कली साइक्चा माल्बपुकी खतम दुम्शा, मुने दोक्मल। आं कली मरिम्शो पाइक्चा, दे मिम्बपुकी नोले लेश्शा, मुने दोक्मल।
5 मेकोपुकी फशेम योल्शो भूस खोदेंशो दुम्मल। मिनु परमप्रभु यावे आ स्वर्ग ङा गेय पाइबमी मेको आन कली खेदा पस ङा पस पवल।
6 मेको आन लां छिङछिङ नु ग्रेक्शा थित्तीके दुम्ल। मोपा यो परमप्रभु यावे आ स्वर्ग ङा गेय पाइबमी खेदा पवल।
7 मारदे हना मेकोपुकीमी मोशान आं कली ब्वारद दाइक्ताक्यीमी। मिनु मोशान आं कली साइक्चा कली बिक्तीक दोम्तेक्म।
8 मेको आन मतुइक्थु, हिंचा ङा ठेयब श्येत दुम्ल। मिनु मेको आन ख्रुइश्शा दाइश्शो ब्वारदम आंमान रेम्मल। मेको आन दोशो बिक्तीकेमी आंमान बिक्शा, बेक्मल।
9 गो चहिं परमप्रभु यावेमी आं कली प्रोंइशो तशा ग्येरसीनुङ।
10 मिनु गो आं रां नेल्लेमी “परमप्रभु यावे, इन खोदेंशो सु बाक्बा?” देंनुङ। गे मचाप्ब नु श्येत जाइब आन कली बोल्यो मुर आ गुइ रे प्रोंइनीनी।
11 जोल पाइब सांकछीपुकी ग्रूनीम। मिनु आं मतुइश्शो लोव़ हिल्लो पाइनीम।
12 गो मेको आन कली रिम्शो पाता। मेकोपुकीम चहिं मरिम्शो पाइक्तीमी। गो का ला दुम्ती, सुइम आं कली वारच मपाइय्यीमी।
13 मेकोपुकी रोइ पामेनु, गो अरन्डी फेक्शा, माइजा बाक्शा, सुर्ता पाता। गो बाप्शा मेको आन पर्बम परमप्रभु कली पुंइता। अय्युब ३१:२९
