10 मिनु गो आं रां नेल्लेमी “परमप्रभु यावे, इन खोदेंशो सु बाक्बा?” देंनुङ। गे मचाप्ब नु श्येत जाइब आन कली बोल्यो मुर आ गुइ रे प्रोंइनीनी।
11 जोल पाइब सांकछीपुकी ग्रूनीम। मिनु आं मतुइश्शो लोव़ हिल्लो पाइनीम।
12 गो मेको आन कली रिम्शो पाता। मेकोपुकीम चहिं मरिम्शो पाइक्तीमी। गो का ला दुम्ती, सुइम आं कली वारच मपाइय्यीमी।
13 मेकोपुकी रोइ पामेनु, गो अरन्डी फेक्शा, माइजा बाक्शा, सुर्ता पाता। गो बाप्शा मेको आन पर्बम परमप्रभु कली पुंइता। अय्युब ३१:२९
14 आं वारच नु आं लोक्ब आन पर्बम खोदेंशो पा, मेको आन पर्बम रोंका पाता। आं ममा आ पर्बम खोदेंशो पा आं पिया खुक्शा, रोंका पाता। रोमी १२:१५
15 तन्न गो दाइल पांइसीङानु, मेकोपुकी रिश्शा, आं पर्बम शुक्शी पचा कली बुक्तेक्म। आं मतुइश्शो शुक्शी पाइबपुकी आं कली मरिम्शो पचा कली बुक्तेक्म। मिनु मेकोपुकीम आं कली शुक्शी पस ङा पस पतीमी।
16 मेकोपुकी नेल्ल क्येङा मरिम्शो दुम्शा, शुक्शी पा, आन ख्रुइ शेप्नीम।
17 परमप्रभु, गे गेना सम्म मेको आन कली कोव़शा बाक्नीनी? परमप्रभु मरिम्शो पाइबपुकी रे आं कली प्रोंइयीनी। आं कली नेल्ल क्येङा बोल्यो मुर रे प्रोंइयीनी?
18 मिनु गो शुश मुर आन ङोंइती इन कली “गे ठेयब बाक्नीनी” देंनुङ। ठेयब हुल आन दातेमी इन कली कुम्सो पा ठेयब सेल्नुङ।
19 मेकोपुकी मोशान आं जोरी सत्रु दुम्शा, आं पर्बम ग्येरचा मतामेक्ल। मोशान खेदा पाइबपुकी आं पर्बम आन मिक्च रिक्चा मतामेक्ल। भजन संग्रह २५:१९; भजन संग्रह ६९:५
20 मारदे हना मेकोपुकी थुं नाइश्शा बाक्तीक आ पर्बम लोव़ मपाइनीम। रागीम थुं नाइश्शा बाक्ब आन कली जोल पा दोस गेचा कली मिम्नीम।
