1 दाऊद आ कुम्सो। “परमप्रभु, आं कली कोव़यीनी। मारदे हना गो इन कली जिम्मा गेंसीशो बाक्नुङ।
2 गो परमप्रभु यावे कली ‘गे आं परमप्रभु बाक्नीनी। गो इन क्येङा अर्को मारेइ रिम्शो मतुइक्नुङ’ देंती। भजन संग्रह ७३:२५
3 रागीम बाक्ब इन योव़शो मुर, थमा पा ठेयब मुर बाक्नीम। गो मेको मुर आन कली तशा ग्येरसीनुङ।
4 मिनु देवी देवता आन नोले खोइक्ब आन श्येत बारना बारन लाइब। मेको आन तूतीक चढ़ेतीक ङा हुश गेनायो मचढ़ेनुङ। मेको आन नें यो मथीनुङ।
5 परमप्रभु यावे, गे आं भाग बाक्नीनी। मिनु आं कचौरा प्रिंनीनी। गे आं थेरशो रू कोव़ब बाक्नीनी। भजन संग्रह ७३:२६; गन्ती १८:२०; बिलाप ३:२४
6 इन गेशो रू रिम्शो बाक्ब। गो थम रिम्शो शोंप ताता।
7 आं कली अर्ती गेब, परमप्रभु यावे कली ठेयब सेल्नुङ। नाक्दो यो आं थुंमी आं कली मोदेंशो पचा शेंब।
8 गो परमप्रभु यावे कली गेना हना यो आं ङोंइती वोइक्ता। मोपा मेको आं ग्युरा गे बाक्मेनु, गो महिम्सीनुङ। प्रेरित २:२५-२८
9 मोपतीके आं थुं ग्येरसीब। गो आं थुंमी कुम्सो पाइनुङ। गो महिंथु बाक्ने चाप्नुङ।
10 मारदे हना गे आं कली बेक्चा मगेनीनी। इन योव़शो कली राक्चा मगेनीनी। प्रेरित १३:३५
11 गे आं कली ब्रोंइतीक लां कोंइनीनी। गो इन ङोंइती बाक्ङानु, आं थुं ग्येरतीकेम ब्रीब। इन ग्युरा गे बाक्ङानु, गेना हना यो थम रिम्शो दुम्नुङ” दे लोव़ पाता।
