13 मिनु गे आं आगा ङा मारेइ मारेइ सेल्तीनी। गे आं कली आं ममा आ कोव़जम सेल्तीनी।
14 गो इन कली ठेयब सेल्नुङ। मारदे हना गे आं कली छक लाक्चा ङा नु रिम्शो पा सेल्तीनी। इन गेय नेल्ल छक लाक्चा ङा बाक्नीम। गे आं कली थमा पा तुइश्शो बाक्नीनी।
15 गो ख्रुइश्शा जोल्ना जोल्न बाक्ङानु, गे आं कली तशो बाक्तीनी। मेना गो रागी आगाम जोल्ना जोल्न बाक्शो नङ।
16 गे आं मजोल्शो रां तशो बाक्तीनी। मिनु आं कली गेशो ब्रोंइतीक नाक्ती नेल्ले इन किताबम ब्रेक्शो बाक्तेक्म। मेको दुम्चा क्येङा ङोंइतीन ब्रेक्शो बाक्त। भजन संग्रह ३१:१६
17 परमप्रभु, इन मिम्शो आं कली थम ठेयब बाक्ब। इन मिम्तीके शुश बाक्नीमी। भजन संग्रह ४०:६
18 गो मेको आन कली हिक्चा माल्शो नङ हना, मेको बाल्वा क्येङा यो शुश दुम वा। गो सेंसीङानु, गो गे नु बाक्शो बाक्नुङ। भजन संग्रह ६३:७
19 परमप्रभु, गे इन अरेशो मटीब आन कली साइक्नी हना, रिम्शो दुम वा। हुश ख्राक्श पोक्ब आं क्येङा ङोन लमल।
20 मेकोपुकीमी इन पर्बम मरिम्शो लोव़ पाइनीमी। मिनु ठेयब लेश्शा, शुश मरिम्शो पाइब बाक्नीमी।
21 परमप्रभु यावे, इन कली काइ मदाक्ब आन कली गो यो काइ मदाक्नुङमी। मिनु गो इन कली मरिम्शो पचा कली बोक्ब आन कली तशा ग्रांग्रा दित्नुङमी।